Skip to content
BibleKenya

Bhilali Bible

नीरगमन 38

होम बादान वेदी काजे बणावणु

(नीरगमन 27:1-8)

तत्‌यार बाबळ्‌यान लाकड़ान होम बादान वेदी बी बणायु; तेरी लम्‌बाय पांच हात, ने चोवड़ाय पांच हातेन हतली, ने ची च्‌यार खुणान बन्‌ली हतली, ने उचाय तीन हातेन हतली। चु तीना च्‌यारु खुणा पर तेरा च्‌यार सींगड़ा बणायु, वेदी ने तीना सींगड़ा लाकड़ान एकुत टुकड़ान बणावला हतला; ने तीनुक चु पीतळेन सी झाळ्‌यु। ने चु वेदीन आखी चीज, मतलब तेरु रखड़ु भरनेन ठाहरा, पावड़ा, कटेवरा, ने सीकार वाटे काटा, ने कड़छी बणायु। आपसा आखा समान चु पीतळेन बणायु। ने वेदी वाटे तेरे च्‌यारे-मेर कांगणी तळे चु पीतळेन जाळीन एक झारो बणायु, ची नेची सी वेदीन उचायन ईचमां तक पुगी। चु पीतळेन झारान च्‌यारु खुणा वाटे च्‌यार कड़ा बणायु, जे डेंगान खाचान काम देय। अळतेन चु डेंगा काजे बाबळ्‌यान लाकड़ान बणायु, ने पीतळेन झाळ चड़ायु। तत्‌यार चु डेंगा काजे वेदीन खुणान कड़ा मां वेदी काजे हाकलने वाटे नाख देदु। ने वेदी काजे चु चोवखट सी माहे पुल्‌टी बणायु।

पीतळेन मट्‌लो तपलो बणावणु

(नीरगमन 30:18)

चु मट्‌ला तपला काजे ने तेरा दुयु पाया पीतळेन बणायु, जु मीळने वाळा तम्‌बुन बारनाम सेवा करने वाळा बायरान आरस्‌या पीतळ सी बणायु।

रह्‌णे जागान आंगणा काजे बणावणु

(नीरगमन 27:9-19)

अळतेन चु आंगणो बणायु; ने दखणाव भीणी सी आंगणान पड़दा पातेळ्‌ळा सुतीन पुथल्‌यान बणावला हतला, ने आखो मेळीन सोव हात लाम्‌बलो हतलो। तींद्‌रे वाटे वीस खम्‌बा, ने तींद्‌रा पीतळेन वीस पाया हतला, बाकुन हेकड़ा ने जुड़नेन पट्‌टी चांदीन हतली। धुराव भीणी बी सोव हात लाम्‌बला पड़दा हतला, ने तींद्‌रे वाटे वीस खम्‌बा ने तींद्‌रे वाटे पीतळेन वीसुत पाया हतला, ने खम्‌बान हेकड़ा ने जुड़ने पट्‌या चांदीन हतला। ने बुडवणी भीणी आखा पड़दा भेळा करीन पचास हातेन हतला, तींद्‌रे वाटे दस खम्‌बा ने दसुत पाया हतला, ने खम्‌बान हेकड़ा ने जुड़नेन पट्‌टी चांदीन हतली। ने उगेवणी आंगे बी पचास हातेन हतला। आंगणान झपलान एक भीणी वाटे पंद्‌रे हातेन पड़दा हतला, ने तींद्‌रे वाटे तीन खम्‌बा ने तीन पाया हतला। ने आंगणान झपलान दीसरे भीणी बी तसात बन्‌ला हतला; ने आंगणान झपलान दुय धड़े पंद्‌रे-पंद्‌रे हातेन पड़दा बन्‌ला हतला; ने तींद्‌रे वाटे तीन-तीन खम्‌बा, ने तीन-तीन तींद्‌रा पाया हतला। आंगणान च्‌यारे-मेर आखा पड़दा पातेळ्‌ळा सुतीन बणावला पुथल्‌यान हतला। खम्‌बान पाया पीतळेन ने हेकड़ा ने जुड़नेन पट्‌टी चांदीन हतली, ने तींद्‌रा मुंहडा चांदीन सी झाळ्‌ला हतला, ने आंगणान आखा खम्‌बा चांदीन पट्‌या सी जुड़ायला हतला। आंगणान बारनान पड़दा पर सजाड़लो हतलो, ने चो नीळ्‌ळा, रात्‌ला, ने जामण्‌या रंगेन पुथल्‌यान ने सणेन दुरीन खास पुथल्‌या बन्‌ला हतला, ने तेरी लाम्‌बाय बीस हात हतली, ने तेरी उचाय आंगणान कनातेन चोवड़ायन तसी पांच हातेन बन्‌ली हतली। ने तींद्‌रे वाटे च्‌यार खम्‌बा, ने खम्‌बान आड़े-धड़े पाया पीतळेन हतला, चे छल्‌ला चांदीन हतला, ने तींद्‌रा मुंहडा चांदीन झाळ्‌ला हतला, ने तीनुक जुड़नेन पट्‌या चांदीन हतला। ने रह्‌णे जागान ने आंगणान आड़े-धड़ेन आखा खुटा पीतळेन हतला।

रह्‌णेन जागा मां वापरायण्‌यो समान

गवान चिट्‌ठी मेकणेन जागान समान लेवीमेन सेवान काम वाटे बन्‌लो छे, ने तींद्‌री गीणती हारुनेन पुजारान पुर्‌या ईतामारेन साहरे मुसान कह्‌णे सी हवली, तेरी पाक्‌की गिन्‌ती जी छे।

जीनी-जीनी चीज काजे बणावणेन हुकुम यहोवा भगवान मुसा काजे आपलु, तीनुक यहुदान घराणा माय्‌न बसलेल, जु हुरेन पुर्‌यान पुर्‌यु ने उरीन पुर्‌यु हतलु, बणाय देदु। ने तेरे साते दानेन घराणा मां वाळु, अहीसामाकेन पुर्‌यु, ओहोलीआब हतलु, जे सजाड़ने ने घड़ने वाळु ने नीळ्‌ळा, जामण्‌या ने रात्‌लान पातेळ्‌ळी सुतीन बणावलु पुथल्‌या मां सजावणे करने मां वारु मीस्‌तरी हतलु।

चुखला जागान आखा काम मां जो भेट मां सोनो लाग्‌यो चो चुखला जागान सेकेलेन हीसाब सी एक हजार दुय कीलुन आड़े-धड़े हतलो। ने मंडळीन गीणला माणसेन भेट करली चांदी चुखला जागान सेकेलेन हीसाब सी सोव कीक्‌कार ने एक हजार सात सोव ने सत्‌तर ने पांच सेकेल हतला। आखा माणसे जतरा वीस सालेन ने तेरेसी वदु उमरेन गीणला हतला, चे छव लाख तीन हजार साढ़े पांच सोव अदमी हतला, ने एक-एक जणान सेकेलेन साहरे आदु सेकेल जे एक बेका मतलब छव गराम हवे, जड़्‌यो।1 ने चे सोव कीक्‌कार चांदी चुखला जागा ने ईचमां वाळा पड़दा दुयु मां पाया बणावणे मां लाग गुया; सोव कीक्‌कार सी सोव पाया बणाया, एक-एक पायु एक कीक्‌कार सी बणी। ने सत्‌तरे सोव पीच्‌युतर सेकेल जे बच गुयला, तेरेसी खम्‌बान चटी काजे रंग्‌या, ने तीनुक जुड़नेन पट्‌टी बी बणाया। ने भेट करली पीतळ सत्‌तर कीक्‌कार ने दुय हजार ने च्‌यार सोव सेकेल हतली; हेरेसी मीळने वाळा तम्‌बुन पाया, ने पीतळेन वेदी, पीतळेन जाळी, ने वेदीन आखो समान; ने आंगणान च्‌यारे-मेरेन पाया, ने तीना झपलान पाया, रह्‌णेन जागान ने आंगणान च्‌यारे-मेरेन खुटा बी बणाया।

Source notes (1)
  1. Cross-reference मत्‌ती 17:24

Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.