Bhilali Bible
नीरगमन 39
पुजारान पुथल्या काजे तीयार करनु
(नीरगमन 28:1-14)
अळतेन चे नीळ्ळा, ने जामण्या ने रात्ला रंगेन सजावला पुथल्यान चुखली वेदीन सेवा करने वाळा पुजारा वाटे, ने हारुन वाटे बी चुखला पुथल्या बणाया, जसु यहोवा भगवान मुसा काजे हुकुम आपलु।
चु एपोद काजे सोना ने नीळ्ळा, ने जामण्या, ने रात्ला रंगेन पुथल्या काजे पातेळ्ली सुतीन बणावला पुथल्यान बणाया। ने चे सोना काजे कुची-कुचीन तेरु फतरा बणाया, ने फतरा काजे तुड़ी-तुड़ीन तार बणाया, ने तार काजे नीळ्ळा, जामण्या, ने रात्ला रंगेन पुथल्या मां, ने पातेळ्ली सुतीन बणावला पुथल्या मां सजावट करलो मे भेसकी देदु। चु एपोदेन खांदान पट्टा बणायु, ने खांदान तीना पट्टा काजे एपोदेन खांदा पर जुड़्या। ने तीनाक बांदणे करीन जो वारु करलो बणावलो पट्टो हतलो चो तेरे साते बीना जुड़ेन, मतलब सोनो ने नीळ्ळा, जामण्या ने रात्ला रंगेन पुथल्यान, ने पातेळ्ळी सुतीन बणावला पुथल्यान बन्लो हतलो; जीनी रीते यहोवा मुसा काजे हुकम आपलो। चे सुलेमानी मणी काजे तुड़ीन तेरेमां ईस्रायेलेन बारे पुर्यान नाव असा लिख्या, जसा छाप टुचीन बणावे तसात खुद्या, ने सोनान खाचा मां बठाड़ देदा। ने चे तीनुक एपोदेन खुबा पर लागाड़ देदा, तेरेमां चे ईस्रायेली माणसे वाटे हेर करावण्या मण्या ठेहरे। जसु यहोवा भगवान मुसाक कहलु, तसात बणाया।
छात्ये बांदणेन पुथल्यान बणावणु
(नीरगमन 28:15-30)
चु छात्ये बांदणेन पुथल्या काजे एपोदेन तसु सोनान, ने नीळ्ळा, जामण्या ने रात्ला रंगेन पुथल्यान, ने पातेळ्ळी सुतीन बणावला पुथल्या, मां सजावलो बणायु। छात्ये बांदनेन पुथल्यो च्यार-खुट्यो हतलो, ने चे तीनाक डबल बणाया, ने चु डबल हय्न एक हेत लाम्बु ने एक हेत चवड़ो हयो। ने चे तेरेमां च्यार लाईन मां मणी बसाड़्या, ने पेहली लाईन मां माणीक्य, ने दुसरी लाईन मां पदमराग, ने लालड़ी हतली। ने दुसरी लाईन मां मरकत, ने नीळमणी, ने हीरा; ने तीसरी लाईन मां लसम, सुर्यकान्त, ने नीलम; ने चोवथी लाईन मां फीरोजा, सुलेमानी मणी, ने यसब बठाड़्या; जी आखा अगळ सोनान खाचा मां बठाड़ देदला। ने जे मण्या ईस्रायेलेन पुर्यान नावेन गीणतीन साहरे बारे हतला; बारे घराणा मां सी एक-एकेन नाव जसा छाप टुचीन बणावे, तसात टुचीन बणावला हतला। ने चे छात्ये बांदणेन पुथल्या परुन दुयड़ान तसा गुथला चुखला सोनान साकळ बणावीन लागाड़्या; अळतेन चे सोनान दुय खाचाम ने सोनान दुय कड़ा बणावीन दुय कड़ा काजे छात्ये वाळा पुथल्यान दुय छेवड़े लागाड़्या। तत्यार चे सोनान दुय गुथली साकळ काजे छात्ये बांदणेन पुथल्यो छेवड़े दुय कड़ा मां लागाड़्या। ने गुथली दुय साकळेन दुय बचला छेवड़ा काजे चे दुय खाचा मां जुड़ीन, एपोद अगळ दुय खांदा बांदणे वाळा पर लागाड़्या। अळतेन चे सोनान अळी दुय कड़्या बणायन छात्ये बांदणेन पुथल्यान दुय मुंहडा पर तीनी कुर पर, जे एपोदेन माहेन्ला हीस्सा मां हतली लागाड़्यु। ने चे सोनान दुय अळी कड़्या बणावीन एपोदेन दुयु खांदा पर बांदनेन नेचा सी तेरे अगळ ने जुड़ धड़े ने चां एपोदेन वारु बणावला पट्टा पर लागाड़्या। तत्यार चु छात्ये बांदणेन पुथल्या काजे तीना कड़ान साहरे एपोदेन कड़ा मां नीळ्ळा बंद सी असा बांद्या चु एपोदेन वारु बणावला पट्टान उपर रह्वे, ने छात्ये बांदणेन पुथल्यो एपोद सी अलग नी हंय सके; जसु यहोवा भगवान मुसा काजे हुकुम आपलु।
दीसरा अळी पुजारान झगल्या बणावणु
(नीरगमन 28:31-43)
अळतेन एपोदन झगल्यो आखा नीळ्ळा रंगेन बणाया। बख्तरेन डुचा संय झगल्यान ईचमां एक डुचु हतलु, तीना डुचान च्यारे-मेर गुथली कीनारी हतली, तेरेसी चो फाटी नी सके। चे तीना नेचली धड़े घेरा मां नीळ्ळा, जामण्या ने रात्ला रंगेन पुथल्यान अनार बणाया। चे चुखला सोनान घंट्या बी बणायन झगल्यान नेचला घेरान चारे-मेर अनारेन ईचमां लागाड़्यु। मतलब झगल्यान नेचला घेरान च्यारे-मेर एक सोनान घंटी, ने एक अनार लागाड़्या की, तीनुक पेहरीन सेवा करे, जसु यहोवा भगवान मुसा काजे हुकुम आपलु।
अळतेन चे हारुन ने तेरा पुर्या वाटे पातेळ्ळी सुतीन बणावला पुथल्यान चड्डा बणाया। ने पातेळ्ळी सुतीन बणावला पुथल्यान पागड़ी, पातेळ्ळी सुतीन बणावला पुथल्यान टुप्या; ने पातेळ्ळी सुतीन पुथल्यान चड्डा, ने पातेळ्ळी सुतीन बणावळा पुथल्यान ने नीळ्ळा, जामण्या ने रात्ला रंगेन सजावळी पागड़ी; हीना आखान जसु यहोवा मुसा काजे आपलु तसुत बणाया। अळतेन चे चुखली पागड़ीन पट्टी चुखला सोनान बणाया; ने जसा छाप मां हतला, तसात तेरेमां जे आकड़ा लिखला हतला, मतलब “यहोवा भगवान वाटे चुखला।” ने चे तेरेमां नीळ्ळा बंद सी बांद्या, जेरे सी चे उपर पागड़ी पर रवे, जसु यहोवा भगवान मुसाक हुकुम आपलु।
मीळणेन तम्बु बणाय्न तीयार करनु
(नीरगमन 35:10-19)
हीनी रीते मीळने वाळा तम्बुन रह्णेन जागान आखा काम खत्तम हयो, ने जो-जो काम यहोवा भगवान मुसा काजे हुकुम आपलु छे, ईस्रायेली माणसे तेरेत साहरे कर्या। तत्यार चे रह्णेन जागान समान मुसान्चां लाया; मतलब हेकड़ा, चोवखट, डांडा, खम्बा, पाया, ने अळी आखा समान समत तम्बु, ने रात्ला रंग सी रंगली गाडरान खालड़ो पांघेरनु, ने सुईसो नावेन मट्ली माछीन खालड़ान पांघेरनु, ने ईचमां वाळु पड़दु; डेंगा भेळे गवान पट्टीन पेटी, ने पसतावान ढाकणो; आखा समान भेळे टेबल, ने भेटन रुटा;1 आखा समान भेळे दीवु मेकणेन खुटु, ने तीनाक सजावणेन दीवु, ने वीजाळो करने करीन तेल; सोनान वेदी, ने अभीसेकेन तेल, ने वारु गंधायण्यो धुप, ने तम्बुन झपलान पड़दु; पीतळेन जाळी, डेंगा ने आखो समान भेळ पीतळेन वेदी; ने पाया भेळ मट्लो तपलो; खम्बा ने पाया भेळ आंगणान पड़दा,ने आंगणान झपलान पड़दा, ने दुयड़ा, ने खुटा, ने मीळनेन तम्बुन रह्णेन जागान सेवान आखो समान; चुखला जागा मां सेवान काम करने करीन सजावला बणावला पुथल्या, ने हारुन पुजारान चुखला पुथल्या, ने तेरा पुर्यान पुथल्या जीनुक पेरीन तीनुक पुजारान काम करनु हतलो। मतलब जो-जो हुकुम यहोवा भगवान मुसा काजे आपलु, तेरेत साहरे ईस्रायेली माणसे आखो काम कर्या। तत्यार मुसु आखो काम करीन देख्यु, ने चु यहोवा भगवानेन हुकुमेन साहरे आखो कांय करला छे। ने मुसु तीनुक संयबरकत आप्यु।
Source notes (1)
- Cross-reference नीरगमन 25:30; 40:23; लेवयवेवस्था 24:5-9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.