Bhilali Bible
नीरगमन 40
भगवानेन हजुरीन तम्बा काजे उबु करनु ने तीनाक सुपणु
अळतेन यहोवा भगवान मुसा काजे कह्यु, पेहला महनान पेहले दाहड़े तु भगवानेन हजुरीन तम्बुन रवणेन जागा काजे उबु करजी। ने तेरेमां गवान पट्टीन पेटी मां मेकु, ने ईचमां वाळा पड़दा काजे आडळ कर देजी। ने खाणो खानेन टेबल काजे माहें ली जाय्न, जो काय तेरे पर सजावणु छे, तीनाक सजाय देजु, चां दीवु मेकणेन खुटा काजे माहें ली जाय्न तीना दीवा काजे धपाड़ देजी। ने गवान पट्टी पेटी अगळ सोनान वेदी काजे, जी धुप वाटे छे तीनाक मेकजी, ने रह्णेन जागान पड़दा काजे लागाड़ देजी। ने मीळने वाळा तम्बुन रह्णेन जागान बारना अगळ होम बादान वेदी काजे मेकजी। ने मीळने वाळा तम्बु काजे वेदीन ईचमां मट्ला तपला काजे मेकीन तेरेमां पाणी भरजी। ने च्यारे-मेर आंगणान कुर उबी करजी, ने तीना आंगणान बारने पड़दा काजे टांग देजी।
ने अभीसेक तेल लीन रह्णेन जागान, ने जो काय तेरेमां छे आखान अभीसेक करजी, ने आखा समान भेळ तीनाक चुखु करजी तत्यार चु चुखलु ठेरसे। आखा समान भेळ होम बादान वेदीन अभीसेक करीन तीनाक सुपजी; तत्यार चो चुखलो ठेरसे। पाया मट्ला तपला काजे बी अभीसेक करीन तीनाक चुखो करजी।
“तत्यार हारुन ने तेरा पुर्या काजे मीळने वाळा तम्बुन बारने ली जाय्न पाणी सी उंघळावजी। ने हारुन काजे चुखला पुथल्या पेहरावजी, ने तेरु अभीसेक करीन तीनाक चुखा करजी की चु मार वाटे पुजारान काम करे। ने तेरा पुर्या काजे ली जाय्न कुड़ता पेहरावजी। ने जसु तु तींद्रा बासेन अभीसेक करसी तसुत तींद्रो बी अभीसेक करजी की चे मारे वाटे पुजारान काम करे; ने तींद्रु अभीसेक तींद्री पीड़ी सी पीड़ी वाटे तींद्रा सदान पुजारान जागा पर पुजारु बणाय्न राखसे।”
हीनी रीते मुसु, जु-जु हुकुम यहोवा भगवान तीनुक आपलु तेरेत साहरे करजी। ने दीसरे सालेन पेहले मोहनेन पेहले दाहड़े रवणेन जागा चां तम्बु काजे उबु कर्या। मुसु रह्णेन जागान तम्बु काजे उबु कर्यु, ने तींद्रा पाया मेकीन तीना काजे चोवखट लागाड़ीन तेरेमां डांडा नाख्यु, ने तींद्रा खम्बा काजे उबा कर्यु। ने चु रह्णेन जागान उपर तम्बु काजे फेलायु, ने तम्बुन उपर चु ढाकणेन लागाड़्या, हीने रीते यहोवा भगवान मुसा काजे हुकुम आपलु। ने चु गवान पट्या काजे लीन पेटी मां मेक्यु, ने पेटी मां डेंगा काजे अटकाड़ीन तेरे उपर पसतावान ढाकणा काजे मेक देदु; ने चु पेटी काजे रह्णेन जागा मां पुगाड़्या, ने ईचमां वाळा पड़दा काजे टांगीन गवान चिट्ठी काजे चु माहें कर देदु, हीनी रीते यहोवा भगवान मुसा काजे हुकुम आपलु छे।
ने चु मीळने वाळान तम्बु मां रह्णेन जागान धुराव भीणी ईचमां वाळा पड़दा सी बाहर खाणेन टेबल मेक्यु। ने तेरे पर चु यहोवा भगवान अगळ रुटा सजाड़ीन मेक्यु, हीनी रीते यहोवा भगवान मुसा काजे हुकुम आपलु।1 ने चु मीळने वाळा तम्बु मां टेबल अगळ रह्णेन जागान दखणाव भीणी दीवु मेकणेन खुटा काजे मेक्यु, ने चु दीवा काजे यहोवा भगवान अगळ धपाड़ देदु, हीनी रीते यहोवा भगवान मुसा काजे हुकुम आप्यु। ने चु मीळने वाळान तम्बुन ईचमां वाळा पड़दा अगळ सोनान वेदी मेक्यु, ने चु तेरे पर वारु गंधायण्यान धुप धपाड़्यु, हीने रीते यहोवा भगवान मुसा काजे हुकुम आपलु। चु रह्णेन जागान झपले पड़दा काजे लागाड़्यु। ने मीळनेन तम्बुन रह्णेन जागान झपले होम बादान वेदी काजे मेकीन तेरे होम बादा ने अनबादा चड़ायु, हीने रीते यहोवा भगवान मुसा काजे हुकुम आपलु। ने चु मीळनेन तम्बु ने वेदीन ईचमां मट्ला तपला काजे मेकीन तेरेमां हात-पाय धुवणे करीन पाणी भर्यु। ने मुसु ने हारुन ने आपसा पुर्या तेरेमां आपसा-आपसान हात-पाय धुया; ने जत्यार-जत्यार चे मीळने वाळा तम्बु मां नीते वेदीन्चां जातला, चां-चां चे हात-पाय धुवतेला, हीनी रीते यहोवा भगवान मुसा काजे हुकुम आप्यु।2 ने चु रह्णेन जागान च्यारे-मेर ने वेदीन आड़े-धड़े आंगणान पड़दान वाड़ी काजे उबी कर्यु, ने आंगणान बारनान पड़दु टांग देदु। हीनी रीते मुसु आखो काम पुरो कर्यु।
भगवानेन हजुरीन तम्बु पर वादळो
(गिन्ती 9:15-23)
तत्यार भगवानेन हजुरीन तम्बु पर वादळो छावाय गुयो, ने यहोवा भगवानेन वीजाळो रह्णेन जागा मां भराय ज्यो।3 चु सेक-सींगार बेसकु सेक वाळु हतलु, तेरेमां मुसा काजे मीळने वाळा तम्बु मां जावायो नी। ईस्रायेली माणसेन आखी यात्रा मां असोत हवतेलो की, जत्यार-जत्यार चो वादळो चुखला तम्बुन उपर सी छेटु हय्न जातलो, चां-चां चे अगा बड़ता गुया। ने कदी च वादळो छेटे नी हवतो, तत्यार तीने दाहड़े तक चु छेटे नी हवतु तीने दाहड़े तक चे अगा नी बड़तेला। ईस्रायेलेन माणसेन आखी यात्रा मां दीसु ते यहोवा भगवानेन वादळो रह्णेन जागा पर, ने राते तीनात वादळा मां आक्ठो तीनु आखा काजे देखाव पड़तेलो।
Source notes (3)
- Cross-reference नीरगमन 25:30; 39:36; लेवयवेवस्था 24:5-9
- Cross-reference नीरगमन 30:18-21
- Cross-reference 1 राजा 8:10,11; यसाया 6:4; यहेजकेल 43:4,5; उजेंता बुले 15:8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.