Bhilali Bible
भजन सहीता 1
पेहलु भाग
(भजन सहीता 1—41)
धरमी माणसे ने पापी माणसे
वारु छे चे माणसे जे,
पापी माणसेन कहला पर नी चाले,
ने कुहर्या माणसेन वात नी माने,
ने भगवानेन हासी उडाड़न्या माणसेन बठक मां नी बसे!
बाकुन चु ते यहोवा भगवानेन कायदा सी खुस रवे,
ने रात-दाहड़ु नेम-कायदाक भणीन वीच्यार करता रवे
असला माणसे ते नदी धड़े चुपला तीना झाड़कान तसा छे;
तीना झाड़कान पांटा कदी नी चीमाये,
ने सीजन आवे ती, चो फळे।
हेरेसी असला माणसे, जो बी करे, तेरेम तींद्रो वारलुत हवे।1
बाकुन कुहर्या माणसे, हीनु धरमी माणसेन तसा टेकला नी रवे;
चे ते, तीना चारान बगदा सांय छे, तीना बगदाक वाहळो उडाड़ी ली जाय।2
भगवान, नीयावेन टेमे तीनु पापी माणसेक डंड आपसे,
हेरेसी तीनुक धरमी माणसेन मंडळी मां जागा नी जड़े।
यहोवा भगवान ते, जाणे की, धरमी कुण-कुण छे, बाकुन चु तींद्री राखवाळी करतु रवे,
बाकुन पापी माणसेक भगवान खत्तम कर देसे। 3
Source notes (3)
- Cross-reference यीरम्या 17:8
- Cross-reference अय्युब 21:18
- Cross-reference वेवस्थावीवरन 30:15-20; मत्ती 7:13,14
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.