भजन सहीता 2

भगवानेन नेवाड़लु राजु

1राज्‌य-राज्‌येन माणसे असलात कुहराये काहा आयड़े?

ने देस-देसन माणसे रीकामी युजना काहा बणावे?

2धरतीन राजा ने राज-राजेम राज-करन्‌या आखा भेळा हंय रया;

चे यहोवा भगवान भीणी,

ने तेरा नेवाड़ला राजा भीणी रीस कर रया।1

3“आवु, आपणु भगवान सी तेरा नेवाड़ला कायदान वीरुद करजे;

भगवानेन कायदान कबजु आपणे पर सी छेटु कर देता।”

4बाकुन जो आखो देखीन, सरग मां रवण्‌यु मालीक हास्‌से;

मालीक तींद्‌री हासी उडाड़से।

5अळतेन भगवान रीसवाय्‌न तीनु राजाक लड़से,

ने रीसवाय्‌न तीनुक घाबराड़ देसे,

6“मे मारा चुखला सीयोन बयड़ान राजगादी पर,

मारा नेवाड़ला राजा काजे बसाड़ देदलु छे।”

7नेवाड़लु राजु कवे, “मे यहोवा भगवानेन जे बुल दीसराक सामळावीस,

चु यहोवा भगवान ते मेसेक असु कवलु, ‘तु मारु पुर्‌यु छे’

ने आज सी मे, तारु बास बण गुयु।2

8बेटा, मार धड़े सी मांग, मे तुसेक तारा वाटा मां, धरतीन आखा राज राजेन माणसेक आप दीस;

ईनी धरतीन आखा देसे तारा हक मां हंय जासे।

9ने तु, तीनु आखाक लुहड़ान डेंगा सी डंड आपसी;

तु तीनुक धुळान बन्‌ला ठाहरान तसु भुकरा-भुकरा कर देसी।”3

10तेरेमां हंय, ए आखा राजा जी वात सामळु, ए कळीन राजा जी वात सीखु।

11यहोवा भगवानेन बीहाणो मानीन तेरी सेवा करु।

ने कापता जाय्‌न खुसी मनावु।

12भगवानेन पुर्‌यान पाये पड़ु;

तुहुंं असा नी करु, ती चु तत्‌यारुत रीसवाय जासे,

ने तत्‌यारुत तुहुंं काजे सार देसे। काहाकी भगवानेक रीसवायते वार नी लागे।

बाकुन भगवानेन आसरु लेण्‌या माणसे, बेसका वारु छे।4