Bhilali Bible
भजन सहीता 3
भगवान धड़े मदत वाटे संदारली दुवा
दावुदेन लिखलो भजन, जत्यार राजु दावुद्यु आपसा पुर्या अबसालोमेन धाके ढासीन गुयलु तीनी टेमे लिख्यु।
ए यहोवा भगवान, जे मारी वीरुद कर रया, चे बेसका जणा छे;
बेसका माणसे मारा वेरी बण गुयला छे।
चे वेरी माणसे मार बारामां असी वात करे,
“भगवान हीनाक कदी नी बचाड़े।”
बाकुन ए यहोवा भगवान, तुत मारी आड़-आवणयु ढाळ छे।
तु मेसेक ईज्जत आपाड़े।
ने मेसेक हिम्मत आपण्यु छे।
मे यहोवा भगवान काजे जुर्येत आयड़ीस,
ने चु, तीना चुखला बयड़ा पर सी मारी सामळसे। सेला
मे आडु पड़ीन सुय जाम, ने संदारे जागी जाम;
काहाकी यहोवा भगवान आखी रात मारी राखवाळी करे।
मे तीनु, दस हजार वेरी माणसे सी नी बीहो,
जे मारी वीरुद करीन मार साते लड़ाय करने आवे।
ए मारा भगवान! मेसेक बचाड़!
काहाकी तु ते ताकतवाळु छे, कांखुर माय्न तु मारा कुहर्या वेरीन घाड़से मेक्यु,
ती ते, तींद्रा घाड़सा भांज नाख्यु।
छुटकारु ते यहोवा भगवानुत आपे;
ए यहोवा भगवान तारी संयबरकत तारा माणसे पर,आवती रवणु चाहजे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.