नीरगमन 27

होमबादान वेदी

(नीरगमन 38:1-7)

1अळतेन वेदी काजे बाबळ्‌यान लाकड़ान पांच हात लांबी ने पांच हात चोवड़ी बणावजी, वेदी च्‌यार खुणान रहणु चाहजे, ने ची तीन हात उंची रह्‌णु चाहजे। 2ने तेर वाटे च्‌यारु खुणाम चार सींगड़ा बणावजी; वेदी ने सींगड़ा एकुत टुकड़ान रह्‌णु चाहजे, ने तीनाक तु पीतळ सी पालीस कराड़जी। 3ने तेरु रखड़ु भरनेन ठाहरा, ने पावड़ा, ने कटवरा, ने काटा, ने दुय दाता वाळा पावड़ा बणावजी; तेरी आखी चीज पीतळेन बणावजी। 4तु तींद्‌रे वाटे पीतळेन जाळीन एक झारो बणावजी; ने तेरे आड़े-धड़े च्‌यारु खुणा मां कड़ा लागाड़जी। 5ने तीनी झारा काजे वेदीन आड़े-धड़े चाळनी तळे असु लागाड़जी की, चु वेदीन उचायन ईचमां पुगे। 6ने वेदी वाटे बाबळ्‌यान लाकड़ान डेंगा बणावजी, ने तीनुक पीतळ सी पालीस कराड़जी। 7ने डेंगा काजे कड़ा मां भरजी की, जत्‌यार-जत्‌यार वेदी काजे हाकले तत्‌यार चे दुयु धड़े रह्‌वे। 8वेदी ने पाट्‌या सी खुकली बणावजी; जसो तुहुंंक हीना बयड़ा पर देखाड़ली छे, तसीत वेदी बन्‌नु चाहजे।

मालीक भगवानेन मेळने वाळा तम्‌बुन आंगणो

(नीरगमन 38:9-20)

9अळतेन चुखला जागान आंगणा काजे बणावजी। तीना दखणाव भीणी सी झीळ्‌ळो सुतीन बणावला पुथल्‌यान पड़दा हवणु, चु सोव हात लांबु हवणु चाहजे: एक धड़े हतरोत हवणु चाहजे। 10तींद्‌रे वाटे बीस खाम्‌बा बणावजी, ने तींद्‌रे वाटे पीतळेन बीस पाया बणावजी, बाकुन खाम्‌बान छल्‌ला, ने तीनुक जुड़ने वाळी पट्‌टी चांदीन रह्‌णु चाहजे। 11ने हीनीत रीते आंगणान दखणाव भीणीन लंबाय मां बी सोव हात लांबा पड़दा हवणु चाहजे, ने तींद्‌रे वाटे बी बीस खम्‌बा, ने तींद्‌रे वाटे बी पीतळेन बीस खाडा हवणु चाहजे, ने तीनु खम्‌बान कुंडे ने पट्‌टी बी चांदीन हवणु चाहजे। 12अळी आंगणान चोवड़ाय वाटे बुडनली भीणी पचास हातेन पड़दा रह्‌णु चाहजे, तींद्‌रे वाटे खम्‌बा बी दस ने खाचा बी दस रह्‌णु चाहजे। 13उगवणी भीणी आंगणान चोवड़ाय पचास हात रह्‌णु चाहजे। 14आंगणान झपलान एक भीणी पंद्‌रे हात पड़दा रह्‌णु चाहजे, ने तींद्‌रे वाटे खम्‌बा तीन ने खाचा बी तीन रह्‌णु चाहजे। 15ने दीसरी भीणी बी पंद्‌रे हातेन पड़दा रह्‌णु चाहजे, तींद्‌रे वाटे बी खाम्‌बा तीन ने खाचा तीन रह्‌णु चाहजे। 16आंगणान झपला वाटे एक पड़दु बणावजी, जे नीळ्‌ळा, जामण्‌या ने रात्‌ला रंगेन पुथल्‌या, ने पातेळ्‌ळा सुतीन पुथल्‌यान चमकण्‌या सीतारा लागला बीस हातेन हवणु चाहजे, तेरे वाटे खम्‌बा चार ने खाचा बी चार हवणु चाहजे। 17आंगणान आड़े-धड़ेन आखा खम्‌बा चांदीन पट्‌टी सी वारु जुड़ायला रह्‌णु चाहजे, तींद्‌रा कड़ा चांदीन रह्‌णु चाहजे, ने खाचा पीतळेन रह्‌णु चाहजे। 18आंगणान लम्‌बाय सोव हातेन, ने तेरी चवड़ाय पचास हातेन, ने पड़दान उचाय पांच हातेन रह्‌णु चाहजे, तेरा पड़दा पातेळ्‌ळी सुतीन बणावला पुथल्‌यान बणावजी, ने खम्‌बान खाचा पीतळेन रह्‌णु चाहजे। 19चुखला जागान भाती-भातीन ठाहरा ने आखा समान ने तेरा आखा खुटा ने आंगणान बी आखा खुटा पीतळेन रह्‌णु चाहजे।

दीवान देख-भाळ

(लेवयवेवस्‌था 24:1-4)

20“अळतेन तु ईस्‌रायली माणसे काजे हुकुम आपजी, की, मारेन्‌चां दीवा वाटे कुचीन नीकाळ्‌ळो जेतुनेन चुखलो तेल ली आवजी, तेरेसी दीवु लगत धपतु रह्‌वे। 21मीळने वाळा तम्‌बु मां, तीना बीच वाळा पड़दा सी बाहर जी गवान चिट्‌ठी अगळ रह्‌वे, हारुन ने आपसा पुर्‌या दीवा काजे सांता ती संदारे तक यहोवा अगळ सजाड़ीन राखे। हीनी रीते ईस्‌रायली माणसेन पीड़ी वाटे जलम बन्‌ली रह्‌वे।”