Bhilali Bible
नीरगमन 15
मुसान गीत
तत्यार मुसु ने ईस्रायली माणसे यहोवा वाटे जो गीत गाया। ने चे कह्या,
“मे यहोवान गीत गावीस, काहाकी चु ताकत वाळु ठेरलु छे;
घुल्ला भेळ बसण्या काजे चु दर्या मां उहवाड़ देद्लु छे1।
यहोवा मारी ताकत ने राखवाळ्यु छे,
ने हीयुत मेसेक छुटकारु बी आपलु छे,
मारु भगवान हीयुत छे, मे तारीत बड़ाय करीस, मारा डाहा-डाहान भगवान हीयुत छे,
मे तारीत बड़ाय करीस।2
यहोवा मारु लड़ाय-लड़न्यु छे,
ने तेरो नाव यहोवा छे।
फीरोनेन घुड़ागाड्या ने सेना काजे चु दर्या मां नाख देदु;
ने तींद्रा वारलु-वारलु मुख्या रात्ली दर्या मां डुबी।
उंडलो पाणी तीनुक डाक लेदु,
ने चे दगड़ान तसा उंडला पाणी मां डुबी गुया।
ए यहोवा, तारु जेवड़्यु हात ताकत मां जुरभर्यु छे;
ए यहोवा, तारु जेवड़्यु हात वेरी माणसे काजे कुचळी देय।
तु तारा वीरुदी माणसे काजे तारी ताकत सी पाड़ देय;
तु तारी रीस काजे भड़कावे, ने तीनुक चारान तसा धपाड़ देय;
तारी नाक वाळी सास सी पाणी एक्ठो हंय गुयो,
पाणी ढेरेन तसो उबो रय गुयो;
दर्यान ईचमां उंडलो पाणी जम गुयो।
वेरी कह्यु, मे पछळ आवीस, मे जाय्न धर लीस, मे लुटीन माल-धन काजे वाट लीस,
हेरेसी मारु जीव आफरी जासे,
ने मे मारी तलवार हापकतेत मारा हात सी तीनुक खत्तम कर दीस।
तु तारी सास सी तीनुक फुक्यु, ती दर्या तीनुक टुप लेदो,
ने चे दर्या मां कासान तसा डुबी गुया।
ए यहोवा देवताम तारे बराबर कुण छे?
तु ते चुखलापणेन वजे सी ताकत वाळु,
ने तारी बड़ाय करने वाळान बीहाणान लायक, ने चकराड़न्यो काम करन्यु छे।
ने तु तारु जेवड़्यु हात लांबु कर्यु,
ने धरती तीनाक गीळ गुई।
तारी गीण-दया सी तु तारा छुड़ावला माणसेन अगवाय करलु छे,
ने आपसी ताकत सी तु तीनुक तारा चुखला जागाम ली जाती रयु।
देस-देसेन माणसे सामळीन घाबराय जासे;
ने पलीस्ती माणसे बीही जासे।
एदोमेन पुडारी नुर पाणी उतार लेसे,
मोआबेन ताकतवाळा कापणे बाजी जासे;
ने आखा कनान मां रहणे वाळान मन उदास हंय जासे।
तींद्रे मां बीहाणो ने धाक भराय जासे;
तारा खांदान ताकत सी चे दगड़ान तसा हंय जासे।
जत्यार तक ए यहोवा, तारा माणसे नीकळी नी जाय,
जत्यार तक तारा माणसे जीनुक तु मुल लेदलु छे,
पार नी नीकळी जाय।
ए यहोवा, तु तारा तीना बयड़ा पर, तारा तीनी जागा पर जां तु रह्णेन जागु बणावलु छे,
चां पुगाड़ीस। ए मालीक तारा चुखला जागा पर तीनाक तारा हात सी बणावलु छे,
तु तीनुक ठेहरावसी।
यहोवा जलेमकु राज करसे।”
मीरीयमेन गीत
ईना गीत काजे गावणेन जी वजे छे की, फीरोनेन घुल्ला, घुड़ागाड्या ने बसण्या भेळ दर्या मां जाती रया, ने यहोवा तींद्रे पर दर्यान पाणी पछु ली आयु। बाकुन ईस्रायेली माणसे दर्यान ईचमां सुकला जागा पर हय्न जाती रया।
तत्यार हारुनेन बहणीस तेरो नाव मीरीयम हतलो, ने ची भगवानेन अघी सी आवणे वाळी वात कहणे वाळी हतली, आपसा हातेम डुमेकड़ी लेदी, ने आखा बायरा डुमेकड़ी लीन नाचता-नाचता तेरे पछळ चाल पड़ी। ने मीरीयम तींद्रे साते जो गीत गावती गुई, ने कय
“यहोवान गीत गावु, काहाकी चु मट्ला-मट्ला काम करलु छे,
ने घुल्ला काजे ने घुड़ागाड्या पर बसण्या काजे चु दर्या मां नाख देदु।”
कड़वलो पाणी
तत्यार मुसु ईस्रायेली माणसे काजे रात्ली दर्या सी अगु ली गुयु, ने तीना सुर नावेन बयड़ा मां आया; ने तीन दाहड़ा तक बयड़ा मां चालता रया, ने तीनुक पीणे वाटे पाणी नी जड़्यो। अळतेन मारा नावेन एक जागा मां पुग्या, चाहान पाणी कड़वलो हतलो, तीना पाणी काजे चे पी नी सक्या, करीन तीना जागान नाव मारा3 पाड़्यु। तत्यार चे जो कय्न मुसान वीरुद मां कांय-कांय कवणे बाजी गुया, “हंय हामु कांय पीजे?” चां मुसु यहोवा काजे आयड़ीन कह्यु, ने यहोवा तीनुक एक झाड़को बताड़ देदु, ने तीनुक जत्यार चे पाणी मां नाख्या ती चो पाणी गुळ्ळो हंय गुयो।
चां यहोवा तींद्रे वाटे एक रीती ने नेम बणायु, ने चात तीनुक जो कय्न तींद्री पारख कर्यु, “कदी तुहुंं तुंद्रा भगवान यहोवान बुल काजे वारु मन लागाड़ीन सामळे ने जु आपसी नींगा मां वारलु छे चत करु, ने तेरा हुकुम पर कान्टा लागाड़ु, ने तेरी आखी रीती काजे मानु ती जत्रा रुग काजे मीस्री माणसे पर मकेल्लु छे, तींद्रे माय्न एक बी तुंद्रे पर नी मकल्यु; काहाकी मे तुहुंंक वारु करन्यु यहोवा छे।”
तत्यार चे एलीम नावेन जागा पर आया, जां पाणीन बारे झीर ने सत्तर खजुरेन झाड़का हतला, ने चां चे पाणी धड़े पड़ावु नाख्या।
Source notes (3)
- Cross-reference उजेंता बुले 15:3
- Cross-reference यसाया 12:2; भजन सहीता 18:14
- Footnote मारा कड़वो
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.