Bhilali Bible
नीरगमन 14
रात्ली दर्या काजे पार करनु
यहोवा मुसा काजे कह्यु, “ईस्रायेली माणसे काजे हुकुम आप्यु की, चे पछा आवीन मीगदोल ने दर्यान ईचमां, पीहाहीरोत अगळ ने बालसपोन अगळ आपसु पड़ावु नाख्या, ने तींद्रेत अगळ दर्या धड़े तम्बु उबा कर्या।” तत्यार फीरोन राजु ईस्रायेली माणसेन बारामां वीच्यार करसे, चे अंजाण्या देस मां भटकी गुया, ने उजाड़ी जागा मां घेरवाय गुयला छे। तत्यार मे फीरोनेन मन काजे काठु कर दीस, ने चु तींद्रे पछळ जासे, तत्यार फीरोन तेरी सेनान साहरे मारी बड़ाय करसे: ने मीस्री माणसे जाण लेसे की मेत यहोवा छे। ने चे तसात कर्या।
जत्यार मीस्र देसेन राजा काजे जी खबर जड़ी की चे माणसे ढासी गुया, ती फीरोन तीना पावर्यान मन तींद्रा वीरुद मां पल्टी देदु, ने चे कह्णे बाजी ज्या, “हामु जो काय कर्या की, ईस्रायेली माणसे काजे हामरी गुलामी मां सी छुटकारु आपीन जाणे देदा?” तत्यार चु आपसी घुड़ागाड़ी जुपाड़्यु, ने आपसी सेना काजे साते ली लेदु। चु छव सोव वारु सी वारु घुड़ागाड्या, ने मीस्र देसेन आखा घुड़ागाड्या लेदा, ने तींद्रे आखा पर मुख्या ठेरायु। ने यहोवा फीरोन राजान मन काजे काठो कर देदु। करीन चु ईस्रायेली माणसे पछळ गुयु; बाकुन ईस्रायेली माणसे हिम्मत करीन अगा नीकळीन जाती रवतेला।1 बाकुन फीरोन आखा घुड़ागाड्या, ने घुल्ला पर बसण्या भेळ मीस्री माणसेन सेना तींद्रे पछळ जाय्न, तींद्रेन्चा जे पीहाहीरोत साते, बालसपोन अगळ दर्या धड़े पड़ावु नाखीन रय रवला, चां पुग्या।
जत्यार फीरोन राजा धड़े आयु, ती ईस्रायेली माणसे देख्या की मीस्री माणसे हामरे पछळ-पछळ आवणे बाजी रया, ती चे बेसका बीह ज्या, ने आयड़ीन यहोवा धड़े मदत मांग्या। ने चे मुसा काजे कह्णे बाजी गुया, “मीस्र देस मां माणसे काजे गाड़ने करीन मसाण नी हतली काय तु चां सी हामुक मारने करीन उजाड़ी जागा मां ली आयु? तु हामुक मीस्र देस मां सी नीकाळीन लाय्न हामरे साते जो काय कर्यु? काय हामु जी वात तुसेक मीस्र देस मां नी करता रया की, हामुक रह्णे दे की हामु मीस्री माणसेन सेवा कर्या? हामरे वाटे उजाड़ी जागा मां मरने सी वारु ते मीस्री माणसेन सेवा करनु वारु हतलो।”2
मुसु माणसे काजे कह्यु, “बीहु मां उबा-उबा छुटकारान काम देखु, जु यहोवा तुंद्रे वाटे आज करसे, काहाकी जे मीस्री माणसे काजे आज तुहुंं देखु, हीनुक अळतेन कदी नी देखु। यहोवा आपसुत तुंद्रे वाटे लड़ाय करसे, तेरेमां तुहुंं हुगा हंय रह्वु।”
तत्यार यहोवा मुसा काजे कह्यु, “तु काहा मेसेक आयड़ी रयु? ईस्रायेली माणसे काजे कवु की अगा जावु।” ने तु तारी लाकड़ी ईछीन तारु हात दर्या भीणी लांबु कर, ने चे दुय हीस्सा हंय गुया। ती ईस्रायेली माणसे दर्यान ईचमां हय्न धरती पर माय्न चालीन जाती रवसे। ने सामळ मे खुदुत मीस्री माणसेन मन काजे काठो करीस, ने चे दर्या मां बी तींद्रे पछळ जासे। ती फीरोन ने आपसी आखी सेना, ने घुड़ागाड्या, ने बसण्या काजे खत्तम हवणेन साहरे मारी बड़ाय करसे। ने जत्यार फीरोन, तीना घुड़ागाड्या ने बसण्या पर मारी जीतेन साहरे मारी बड़ाय हवसे, ती मीस्री माणसे जाण लेसे की मेत यहोवा छे। तत्यार भगवानेन सरगदुत जे ईस्रायेली माणसे अगळ-अगळ चाल्या करतेलु, चां सी जाय्न तींद्रे पछळ जाती रयु, ने वादळान खम्बु तींद्रे अगळ सी छेटु हय्न, पछळ जाय्न उबु हंय गुयु। हीने रीते चु मीस्री माणसेन सेना ने ईस्रायेली माणसेन सेनान ईचमां आय गुयु; ने वादळा ने आंदारलो ते हतलो, तेबी तीनुक ईजाळो जड़तो रयो; ने दुयु सेना रात भर एक दीसरा धड़े नी आया।
तत्यार मुसु आपसु हात दर्या भीणी लांबु कर्यु; ने यहोवा आखी रात उगेवणी वाहळी मकल्यु, ने दर्या काजे दुय वाटा करीन पाणी काजे छेटु कर देदु, की तींद्रे ईचमां सुकली जागा हंय गुई। तत्यार ईस्रायेली माणसे दर्यान ईचमां माय्न, धरती पर चाल्या, ने पाणी तींद्रे डाखरे हात भीणी, ने जेवड़्या हात भीणी भीतड़ान तसु उबु हंय रह्लु।3 तत्यार मीस्री, मतलब फीरोन राजान आखा घुल्ला, घुड़ागाड्या ने बसण्या तींद्रे पछळ दर्यान ईचमां माय्न जाती रया। ने संदारे एगात यहोवान वादळा ने आक्ठान खम्बा मां सी मीस्री माणसेन सेना पर नींगा नाखीन तीनुक घाबराड़ देदु। ने चु तींद्रा घुड़ागाड्यान चाकटा काजे पुणा मां देदु, तेरेसी तीनुक चालनु बेसको काठो हंय रयो। तत्यार मीस्री माणसे आपसा-आपसात कह्णे बाजी गुया, “आवु आपणु ईस्रायेली माणसे अगळ सी ढासी जाजे; काहाकी यहोवा तींद्रे भीणी सी आपणे साते लड़ाय करने बाजी रयु।”
अळतेन यहोवा मुसा काजे कह्यु, “तारु हात दर्या भीणी लांबु कर की पाणी मीस्री माणसे, ने तींद्रा घुल्ला, ने घुड़ागाड्या पर बसण्या पर पछो उहणे बाजी जाय।” तत्यार मुसु आपसु हात दर्या भीणी लांबु कर्यु, ने दर्या संदारे हवते-हवते पेहल जसी हतली तसी हंय गुई, ती मीस्री माणसे ढासणे बाजी गुया, बाकुन यहोवा तीनुक दर्या मां उहवाड़ नाख्यु। पाणी तीना पेहला जागा पर आवणे सी, जतरा घुड़ागाड्या पर बसण्या ईस्रायेली माणसे पछळ दर्या मां आवला हतला, चे आखा मतलब फीरोनेन आखी सेना दर्या मां डुबी गुया, ने तींद्रे मां सी एक बी नी बच्यो। बाकुन ईस्रायेली माणसे दर्यान ईचमां धरती-धरती पर हय्न जाती रया, ने पाणी तींद्रे जेवड़्या हात भीणी, ने डाखर्या हात भीणी भीतड़ान तसु बणीन उबु हंय रवलु।
हेरेसी यहोवा तीने दाहड़े ईस्रायेली माणसे काजे मीस्री माणसेन हक मां सी छुड़ायु, ने ईस्रायेली माणसे, मीस्री माणसे काजे दर्या धड़े मरला पड़ रह्ला देख्या। जत्यार ईस्रायली माणसे, यहोवा मीस्री माणसे पर जे आपसान हातेन सक्ती देखाड़्यु, तीनाक देखीन ईस्रायली माणसे बीहणे बाजी गुया, ने यहोवा पर ने तेरा चाकर्या मुसा पर बी भुरसु कर्या।
Source notes (3)
- Cross-reference नेवताळान काम 13:17
- Cross-reference नीरगमन 16:3; 17:3
- Cross-reference 1 कुरींथी 10:1; ईब्रानीयो 11:29
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.