नीरगमन 13

पेहला-खुळ्‌या पुर्‌या काजे सुपणु

1अळी यहोवा मुसा काजे कह्‌यु, 2“आखा सी पेहला पुर्‌या माय्‌न आखा पुर्‌या काजे मेसेक आप दे, आखा पुर्‌या जे ईस्‌रायेल मां पेहला माय्‌न छे, भले माणसेन हंय, ने भले जानवर्‌यान हंय, चे मारात छे।”1

खमीर वीगुरेन रुटान तीहवार

3अळी मुसु माणसे काजे कह्‌यु, “ईना दाहड़ा काजे हेर राखु तीने दाहड़े तुहुंं गुलामीन घर, मतलब मीस्‌र देस मां सी नीकाळी लावला; यहोवा भगवान तुहुंंक चां सी आपसा हातेन ताकत सी नीकाळ लावलु छे; तीने दाहड़े खमीर वाळा रुटा घुण खावु।” 4अबीबेन महनान पेहले दाहड़े सी आजुन दाहड़े तुहुंं नीकळ्‌ळा छे। 5हेरेसी जत्‌यार यहोवा तुहुंं काजे कनानी, हीत्‌ती, एमोरी, हीव्‌वी, ने यबुसी माणसेन देस मां पुगाड़से, तीनुक चु तुंद्‌रा डाहा-डाहा काजे आपणे करीन सगुन खाद्‌लु, तींद्‌रे मां दुत ने मुहाळेन नदी उह्‌वे, ती तुहुंं तीनात मोहनाम तीहवार वाळजु। 6सात दाहड़ा तक बीना खमीर वाळा रुटा खाया करजु, ने सातवे दाहड़े यहोवा वाटे तीहवार मनावजु। 7ईनु सात दाहड़ा मां बीना खमीर वाळा रुटा खाजु, ने तुंद्‌रा आखा देस धड़े खमीर वाळा रुटा, ने नी ते तुंद्‌रे धड़े खमीर देखायणु चाहजे। 8ने तीने दाहड़े तुहुंं आपणा-आपणा पुर्‌या काजे जो कय्‌न समजाड़ देजु की, जो हामु कामेन वजे सी कर रया, जु यहोवा हामुक मीस्‌र देस मां सी नीकळनेन टेमे हामरे वाटे करलु। 9पछेन तुंद्‌रे वाटे तुंद्‌रा हात मां एक सहलाणी रवसे, ने तुंद्‌रा डुळा अगळ हेर करने वाळी चीज ठेरसे; हेरेसी यहोवान नेम तुंद्‌रा मुंहडा पर रवे: काहाकी यहोवा आपसान ताकत वाळा हात सी मीस्‌र देस मां सी तुहुंक नीकाळलु छे। 10करीन तुहुंं हीना नेम काजे हर साल संय टेम पर मान्‌या करजु।

पेहेल खुळ्‌यु पुर्‌यु

11“अळी यहोवा तींद्‌री सगुनेन अनसारे, जे तीनुक हामरा डाहा-डाहा साते, ने तुंद्‌रे साते खाद्‌लु, तुहुंंक कनान देस मां पुगाड़ीन चु तुहुंंक आप देसे, 12ती तुहुं तीना पुरा आखा सी पेहेल-खुळ्‌या पुर्‌या काजे मालीक वाटे अलग करजु, तुंद्‌रा जानवर्‌यान आखा पेहला नर पीला मालीकेन छे।2 13ने गदड़ीन आखा पेहला पीलान बदले गाडरो आपीन छुड़ाय लेजु, ने कदी तुहुंं तीनुक नी छुड़ावु ती तींद्‌रु गळु तुड़ देजु। बाकुन आपणा आखा मां सी माणसेन पेहला पुर्‌या काजे छुड़ाय लेजु। 14ने आवणे वाळा दाहड़ा मां जत्‌यार तुंद्‌रा पुर्‌या पुछे की, ‘जु कुण छे?’ ती तीनुक कह्‌जु, यहोवा हामुक गुलामीन घर सी मतलब मीस्‌र देस मां सी आपसा हातेन ताकत सी नीकाळ लावलु छे। 15मीस्‌र देसेम सी तीनी टेमे जत्‌यार फीरोन एक हेट्‌यु हय्‌न, हामुक जाणे नी देणे हींड्‌यु, तत्‌यार यहोवा मीस्‌र देस मां माणसे सी लागाड़ीन जानवर्‌या तक, आखान पेहेल-खुळ्‌या काजे मार नाख्‌यु। हीनात वजे सी जानवर्‌या मां सी जतरा आपसा-आपसान आय्‌सेन पेहला नर हतला, तीनुक हामु यहोवान वाटे बादा चड़ाया; बाकुन खुदेन पेहला-खुळ्‌या पुर्‌या काजे हामु बदलु आपीन छुड़ाय लेदा। 16जु तुंद्‌रा हात पर एक सहलाणी सारको तुंद्‌रा नींडाळेन ईचमां टीका सांय छे; काहाकी यहोवा हामुक मीस्‌र देस मां सी आपसी ताकतेन साहरे नीकाळ लावलु।”

आदळान खाम्‌बु ने आक्‌ठान खाम्‌बु

17जत्‌यार फीरोन ईस्‌रायेली माणसेक जाणेन हुकुम आप देदु, तत्‌यार पलीस्‌ती माणसेन देस मां हंय जे वाट देख रह्‌ला, ची वाट धड़ेत हतली; तेबी भगवान जो सुचीन तीनी वाटे माय्‌न नी ली गुयु, काहाकी कांखुर माय्‌न असो नी हंय जाय की, जत्‌यार जे माणसे लड़ाय देखे ती पस्‌तायन पछा मीस्‌र देस मां आवती रवे। 18हेरेसी भगवान तीनुक हींडाड़ी-हींडाड़ीन रात्‌ली दर्‌यान बयड़ान वाटे माय्‌न ली गुयु। ने ईस्‌रायेली माणसे लड़ाय करने मीस्‌र देस मां सी नीकळी गुया।

19ने मुसु युसुफेन हाटका काजे साते लेतु गुयु, काहाकी युसुफ ईस्‌रायेली माणसे काजे जो कय्‌न, भगवान तुहुंंक हेर करनेन कह्‌वे, ने तुहुंंक हींद्‌रे बारामां पाक्‌की सगुन खावाड़लु की, चु तीना हाटका काजे आपसे साते ली जाय3।

20अळतेन चे सुक्‌कोत सहर मां सी अगा गुया, ने चे उजाड़ी जागान देसेन आखरी मां वसला एताम सहर मां पड़ावु नाख्‌या। 21यहोवा तीनुक दीसु वाट देखाड़ने करीन पाणीन खाम्‌बा मां, ने राते वीजाळो आपणे करीन आक्‌ठान खाम्‌बा मां हय्‌न, तींद्‌रे अगळ-अगळ चाल्‌या करतेलु, तींद्‌रे सी चु राते बी, ने दीसु बी चाल सके। 22चु नी ते वादळान खाम्‌बा काजे, ने नी दीसु आक्‌ठान खाम्‌बा काजे राते माणसे अगळ सी छेटु कर्‌यु।