नीरगमन 12

फसहन तीहवार

1अळतेन यहोवा मीस्‌र देस मां मुसा काजे ने हारुन काजे कह्‌यु, 2जो मोहनो तुंद्‌रे वाटे आखा महना मां सी पेहलो मानायसे; तुहुंं ईना महना काजे सालेन पेहलो मोहनो मान्‌जु। 3ईस्‌रायेली माणसेन आखी मंडळी काजे असो कह्‌वु; ईना महनान दसवे दाहड़े तुहुंं आपणा-आपणा बासेन घराणान अनसारे एक-एक गाडरो नेवाड़ीन मेक लेजु। 4ने कदी कुयन घर मां एक गाडरान सीकार काजे खाणे करीन माणसे कम हय, ती चु आपसान आखा सी साते रवणे वाळा माणसे भेळे माणसेन गिन्‌तीन अनसारे एक गाडरो लीन राखे; ने तुहुं एक-एक जणान अनसारे गाडरान हीसाब राखजु। 5तुंद्‌रो गाडरो चुखलो ने एक सालेन गाडरो रह्‌णु चाहजे, भले तीनाक गाडरा मां सी लेणु चाहजे, नीते बुकड़ा मां सी लेणु चाहजे। 6तुहुंं ईना महनान चोवदवे दाहड़े तक जीवतेलु राखजु, ने तीने दाहड़े सांती वेळाय ईस्‌रायेली माणसेन आखी मंडळीन माणसे तीनाक मारीन बादा चड़ाया। 7तत्‌यार चे तीना लुही मां सी थुड़ोक लुही लीन जीना घर मां तीना गाडरा काजे खाय तीना बारनान दुय धड़े ने डेहळीन छेंडे लागाड़ु। 8ने चे तीना सीकार काजे तीनीत राते आक्‌ठा मां भुंजीन अखमीरी रुटा, ने कड़वली भाजी साते खादा। 9आपसो मुंहडो, पाय ने आतड़ा साते आक्‌ठा मां भुंजीन खाजु, काचलो नीते पाणी नाखीन रांदीन कुय बी घुण खावु। 10ने तींद्‌रे मां सी काय बी संदारे तक घुण रह्‌णे देवु, ने कदी थुड़ोक संदारे तक रय बी जाय, ती तीनाक आक्‌ठा मां धपाड़ देजु। 11ने सीकार खाणेन पेहेल काठी कमर बांदीन कस लेजु, ने पाय मां खासड़ा पेहर लेजु, ने एक हातेम डेंगु धर लेजु। ने अळतेन छाटा-छाटा खाजु; जोत यहोवान तीहवार छे।

12काहाकी तीनीत राते मे मीस्‌र देस माय्‌न नीकळीन जायस, ने मीस्‌र देस मां जानवर्‌या, ने माणसेन पेहला पुर्‌या काजे मारीस; मे मीस्‌र देसेन आखा देवता काजे डंड आपीस; मेत यहोवा छे। 13ने तीनु घर मां तुहुंं रह्‌वु, तींद्‌रे पर चुपड़लो लुही तुंद्‌रे वाटे एक सहलाणी ठेरसे; मतलब जत्‌यार मे तीना लुही काजे देखीस ती तुहुंंक छुड़ीन अगु जाती रय्‌स। ने जत्‌यार मे मीस्‌र देसेन माणसे काजे मारीस, ती तींद्‌री गरा तुंद्‌रे पर नी आवे, ने तुहुंं खत्‌तम नी हवु।1 14ने चु दाहड़ु तुहुंंक हेर कराड़णे वाळु ठेरसे, तुहुंं तीना यहोवा वाटे तीहवार करीन मनावजु; तुहुंं ईनी पीड़ी-डीट जलमकी रीती मान्‌जु।

बीना खमीर रुटान तीहवार

15“तुहुंं सात दाहड़ा लग बीना खमीरेन रुटा खाया करजु। तुहुंं पेहले दाहड़े आपणा-आपणा घर मां सी खमीर छेटु कर देजु; काहाकी जे कुई पेहले दाहड़े सी सातवे दाहड़े तक खमीर वाळी चीज खाय, तीनुत काजे ईस्‌रायेली माणसे मां सी खत्‌तम कर देसे। 16तुहुं पेहले ने सांतवे दाहड़े चुखली मंडळी बुलावजु। ईनु दाहड़ा मां कांय बी काम घुण करु; बाकुन माणसे काजे ततरो खाणो चाहजे च अतरोत रांदी सकसु। 17तुहुंं खमीर बीगुर रुटान तीहवार पाळजु। काहाकी तीने दाहड़े मानु मे तुहुंंक टुळा-टुळा करीन मीस्‌र देस मां सी नीकाळ्‌ळु छे। करीन तुहुंं पीड़ी सी पीड़ी तक जलमका नेम जाणीन पाळनी पाळजु। 18तुहुंं पेहला महना मां चोवदवे दाहड़ान सांता सी लागाड़ीन वीस ने एक दाहड़ान सांता तक तुहुंं बीना खमीरेन रुटा खाया करजु। 19सात दाहड़ा तक तुंद्‌रा घरे मां काय बी बीना खमीर वाळी चीज नी रह्‌णु चाहजे; काहाकी बीना खमीर काजे खाणे वाळा आखा माणसे भले चे दीसरा देसेन हंय सके नीते की आपणा देस माय्‌न हय, तीनुक ईस्‌रायेली माणसेन मंडळी मां सी सार देसे। 20तुहुंं काय बी बीना खमीर वाळी चीज मां खाजु; तुहुंं आखा आपणात घरे मां बीना खमीरेन रुटा खाया करजु।”

पेहला फसहन तीहवार

21तत्‌यार मुसु ईस्‌रायेलेन आखा डाहला माणसे काजे बुलायन कह्‌यु, “तुहुंं आपणा-आपणा घराणान अनसारे गाडराक अलग करु, ने फसहन तीहवार पर बादा चड़ावजु।” 22ने तीना लुही काजे जो टगारा मां रह्‌वे, तीना जुफा झाड़कान एक गुछ्‌छाक बुळीन, तीनात टगारा माय्‌न लुही बारनान डेहळीन छेंडे, ने दुय धड़े लागाड़जु; ने संदारे तक तुंद्‌रे माय्‌न कुय बी घर सी बाहर नी नीकळे। 23काहाकी यहोवा देसेन ईचमां मां हय्‌न, मीस्‌री माणसे काजे मारतु जासे; अळी जां-जां चु बारनान छेंडे, ने दुय धड़े चो लुही काजे देखाड़से, चां-चां चु तीना बारना काजे छुड़ देसे, ने मारने वाळा दुत काजे मारने करीन तुंद्‌रे घर मां जाणे नी देय।2 24अळतेन तुहुंं हीनी रीते ने तुंद्‌रे वाटे ने तुंद्‌री अवल्‌यात वाटे जलमकी रीती जाणीन मान्‌या करजु। 25जत्‌यार तुहुंं तीना देस मां जावु, जु यहोवा आपसान वायदान साहरे तुहुंंक आपसे, तेबी जो काम कर्‌या करजु। 26जत्‌यार तुंद्‌रा पुर्‌या तुहुंंक पुछे, ईना कामेन काय मतलब छे? 27तत्‌यार तुहुंं तीनुक जो जपाप आपजु, यहोवा जे मीस्‌री माणसे काजे मरनेन टेमे मीस्‌र मां रह्‌णे वाळा हामु ईस्‌रायली माणसेन घर काजे छुड़ीन अगु जाती रह्‌लु, ने बचाड़लु करीन तीना फसहन जी असी बादा चड़ावे।

तत्‌यार माणसे ढंगा वळीन वांद्‌या। 28ईस्‌रायली माणसे जाय्‌न जो हुकुम यहोवा मुसा काजे, ने हारुन काजे आपलु, तेरेत अनसारे कर्‌या।

आकरी दसवी गरा: पेहला खुळ्‌या पुर्‌यान मरनु

29तत्‌यार असो हयो की आधी राते यहोवा मीस्‌र देस मां राजगादी पर बसणे वाळा फीरोन राजा सी लागाड़ीन कुंडवाड़ा माय्‌न आखा माणसे तक, आखान पेहला पुर्‌या काजे, मतलब जानवर्‌या तक आखान पेहला पुर्‌या काजे मार नाख्‌या।3 30ने फीरोन रातेत उठ पड़्‌यु, ने तीना आखा पावर्‌या, ने आखा मीस्‌र देसेन माणसे उठ्‌या; ने मीस्‌र मां बेसका रड़ने बाजी गुया। काहाकी एक बी असो घर नी हतलो, तेरेमां कुय मर्‌यु नी हय। 31तत्‌यार फीरोन राजु रातेत मुसा ने हारुन काजे बुलाय्‌न कह्‌यु, “तुहुंं ईस्‌रायेली माणसे भेळ मारा माणसेन ईचमां सी नीकळी जावु; ने जसा तुहुंं कह्‌ला तेरेत साहरे तुंद्‌रा यहोवान सेवा करु। 32तुहुंं कवला तेरे साहरे तुंद्‌रा गाडरा-बुकड़ा ने गाय-बेल काजे साते ली जावु; ने तुहुंं मेसेक बरकत आपीन जावु।”

33मीस्‌री माणसे कवतेला की हामु आखा मर गुया, ने चे ईस्‌रायेली माणसे पर दबाव नाखीन कह्‌या, “देस मां सी छाटास नीकळी जावु।” 34तत्‌यार चे तीना कुसणला पीठा काजे खमीर भेसक्‌या वीगुर ठाहरा भेळ चादरा मां बांदीन आपणा-आपणा खांदा पर नाख लेदा। 35ईस्‌रायेली माणसे काजे जसु मुसु कह्‌यु, तेरे साहरे मीस्‌री माणसे धड़े सी सोनो-चांदीन वजन ने पुथल्‌या मांग लेदा; 36ने यहोवा मीस्‌री माणसे ने आपसा माणसे काजे असा दयाळा बणाय नाख्‌यु की, चे जो-जो मांग्‌या चो आखो तीनुक आप्‌या। हीनी रीते ईस्‌रायेली माणसे मीस्‌री माणसे काजे लुट लेदा।4

ईस्‌रायेली माणसे मीस्‌र देस काजे छुड़े

37तत्‌यार ईस्‌रायेली माणसे रामसेस सहर सी सुक्‌कोत सहर भीणी चाल पड़्‌या, ने बायरा ने पुर्‌या काजे छुड़ीन चालीन जाणे वाळा अदमी-अदमीत छव लाख हतला। 38तींद्‌रे साते जे ईस्‌रायेली माणसे नी हतला, चे बी गुया, ने गाडरा-बुकड़ा गावड़ी-बेल, ने अळी दीसरा बेसका जानवर्‌या बी साते हतला। 39ने जे कुसणला पीठा चे मीस्‌र देस मां सी लावला, तेरेसी चे तीना बीना खमीरेन रुटा बणाया; काहाकी तीनुक मीस्‌र देस मां सी असा नीकाळ देद्‌ला की, वाट्‌ये खाणे करीन रांदणेन मुखु बी नी जड़्‌यु, हेरे वजे सी चु कुसेणलु पीठु बीना खमीरेन हतलु।

40ईस्‌रायली माणसेक मीस्‌र देस मां रवते-रवते च्‌यार सोव तीस साल हंय गुयला।5 41ने चे च्‌यार सोव तीस साल पुरा हवणेन, तीनेत दाहड़े यहोवा आखा माणसे मीस्‌र देस मां सी आपसान घराणा भेळे नीकळी गुया। 42यहोवा ईस्‌रायली माणसे काजे मीस्‌र देस मां सी नीकाळ लायु, हेरे वजे सी तीनी राते तींद्‌रे वाटे मान्‌ने लायक छे; जी यहोवान चीत रात छे, तीनु ईस्‌रायली माणसेन पीड़ी सी पीड़ी तक मान्‌नु जरुड़ी छे।

फसह तीहवारेन नेम

43अळतेन यहोवा भगवान मुसा ने हारुन काजे कह्‌यु, तीहवारेन ज्‌यु नेम जी छे: काहनु बी बाहर गांव वाळु माणुस हीनी बादा मां सी नी खाय; 44बाकुन जु काहनुक पयस्‌या आपीन मुल लेदलु पावर्‌यु छे, ने तुहुंं तेरो पेहेरवटन अगली फतरी काटाड़लु छे, चु तीनाक खाय सकसे। 45दीसरा देस वाळा ने दाहड़क्‌या तींद्‌रेम सी नी खादा। 46तीना गाडरान खाणु एकुत घर मां खाणु चाहजे; मतलब तुहुंं तेरा सीकार मां सी थुड़ोक बी बाहर घुण ली जावु; ने तुहुंं बादा चड़ावला जानवरेन एक बी हाटको घुण भांगु।6 47आखा ईस्‌रायली माणसे हीना तीहवार काजे मनावसे। 48ने कदी काहनुक दीसरे देस वाळु तुंद्‌रे साते रय्‌न, यहोवा वाटे तीवार काजे मनावणे हींडे, ती चु आपसान्‌चां आखा माणसेन खतनो करावे, ती तेरे साते आवीन तीनुक मानु; ने अळतेन तीना देस वाळा माणसेन तसा ठेरसे। बाकुन काहनु बी बीन-फतरी काटाड़लु माणुस तींद्‌रे मां सी नी खाणु चाहजे। 49तींद्‌रा नेम कायदा देस वाळा ने तुंद्‌रे ईचमां रह्‌णे वाळा दीसरे देस वाळा दुय वाटे एकुत रहणु चाहजे।7 50जु हुकुम जु यहोवा मुसा ने हारुन काजे आप्‌यु, तेरेत साहरे आखा ईस्‌रायेली माणसे कर्‌या। 51ने तीनेत दाहड़े यहोवा ईस्‌रायेली माणसे काजे मीस्‌र देस मां सी ताकत भेळ नीकाळी ली गुयु।