नीरगमन 16

मन्‌ना नावेन खाणो ने लावरा

1अळतेन आखा ईस्‌रायली माणसे एलीम सी नीकळीन, ने मीस्‌र मां सी नीकळनेन दुसरा महनान पंद्‌रवे दाहड़े, सीन नावेन जंगल मां, जे एलीम ने सीने बयड़ान ईचमां छे, आय लाग्‌या। 2बयड़ा मां ईस्‌रायेली माणसेन आखी मंडळी मुसा ने हारुनेन वीरुद मां कुर-कुर करने बाजी गुया। 3ईस्‌रायेली माणसे तीनुक कह्‌णे बाजी गुया, “जत्‌यार हामु मीस्‌र देस मां सीकारेन हांडान चां धड़े बसीन मन मां लागे असो खाणो खाया करतेला, तत्‌यार कदी हामु यहोवान हात सी मरी बी जाता ती वारु रह्‌तो, बाकुन तुहुंं हामुक ईना बयड़ा मां हेरेन करीन नीकाळीन ली आवला छे की, जे आखा माणसेन टुळा काजे भुकला मार नाख्‌यु।”1

4तत्‌यार यहोवा भगवान मुसा काजे कह्‌यु, देख मे तुंद्‌रे वाटे वादळा मां सी खाणो ने पाणी पाड़ीस; ने जे माणसे दाहड़ीन बाहर जाय्‌न दाहड़ीन खाणो भेळो करसे। हेरे सी मे तींद्‌री पारख करीस की चे मारा नेम पर चाले की नी। 5ने असो हवसे की, छटवे दाहड़े चो खाणो दीसरे दाहड़े सी वदुस हंय जासे, हेरेसी जो काय तीने दाहड़े चु एक्‌ठु करे, तीनाक चे तीयार करीन राखे।

6तत्‌यार मुसु ने हारुन आखा ईस्‌रायेली माणसे काजे कह्‌या, “सांता तुहुंं जाण लेसु की, जे तुहुंंक मीस्‌र देस मां सी नीकाळीन ली आवलु छे, चु यहोवा छे, 7ने संदारे एगात तुहुंंक यहोवान सेक-सींगार देखाव पड़से, काहाकी तुहुंं जे यहोवा भीणी कुर-कुर कर रया, तीनुक चु सामळी रयु। ने हामु कुण छे की, तुहुंं हामरे भीणी कुर-कुर कर रया।” 8अळतेन मुसु कह्‌यु, “जो तत्‌यार हवसे जत्‌यार यहोवा तुहुंक सांतु तुहुंक खाणे करीन सीकार ने संदारे आफरीन रुटा आपसे; काहाकी जे तुहुंंक तींद्‌रे भीणी कुर-कुर करु तीनाक चु सामळे। हामु कुण छे? तुंद्‌रु कुर-कुर करनु हामरे वीरुद मां नी बाकुन यहोवान वीरुद मां छे।”

9अळी मुसु हारुन काजे कह्‌यु, “ईस्‌रायेली माणसेन आखी मंडळी काजे हुकुम आप की, यहोवा अगळ ने तींद्‌रे साते आवो, काहाकी चु तीनुक कुर-कुर करतेलु सामळ्‌यु।” 10जत्‌यार हारुन ईस्‌रायेली माणसेन मंडळी साते तसुत वात करने बाजी रह्‌लु, ने चे तीना उजाड़ी बयड़ा भीणी भाळ्‌या, ती तीनुक यहोवान एक सेक-सींगार वादळा मां देखाव पड़्‌यो। 11तत्‌यार यहोवा मुसा काजे कह्‌यु, 12“ईस्‌रायेली माणसेन कुर-कुर करनु मे सामळ्‌यु, तीनुक कय दे की सांती वेळाय तुहुंं सीकार खासु ने संदारे तुहुंं रुटा खाय्‌न आफरी जासु; ने तुहुंं जो जाण लेसु की मे तुंद्‌रु भगवान यहोवा छे।”

13अळतेन असो हयो की सांती वेळाय लावरा आवीन आखा तम्‌बु काजे ढाक लेदा; ने संदारे पड़ावान आड़े-धड़े उस्‌टो पड़्‌यो। 14जत्‌यार उस्‌टो सुकी गुयो ती, चां भुयमां धवळ्‌ली पुपड़ी पड़ रवली देख्‌या। 15जो देखीन ईस्‌रायेली माणसे, जो नी जाणतेला की जी काय चीज छे, चे आपसा-आपसात कह्‌णे बाजी जां की, “ज काय चीज छे, ती मुसु तीनुक कह्‌यु,

“जी हयीत खाणेन चीज छे, तीनुक यहोवा तुहुंंक खाणे करीन आपलु2। 16जु हुकुम यहोवा आपलु छे चु जु छे: तुहुंं तींद्‌रे मां सी आपसी जरुवतेन अनसारे एक्‌ठा कर्‌या करजु, मतलब आपणा-आपणा माणसेन गीणतीन अनसारे, एक माणसे पछळ एक ओमेर3 एक्‌ठा करजु; तीनु तम्‌बु मां जतरा हंय चु तींद्‌रेत वाटे भेळा कर्‌या करे।”

17ने ईस्‌रायेली माणसे तसात कर्‌या, ने काहनाक वदुस, ने काहनाक कमतीस एक्‌ठा कर लेदा। 18जत्‌यार चे तीनुक ओमेर ठाहरा सी माप्‌या, ने तींद्‌रे धड़े वदुस हतला, तींद्‌रे धड़े वदुस नी नीकळ्‌या, ने तींद्‌रे धड़े कमतीस हतलो, तीनुक बी कम नी पड़्‌यो। काहाकी एक-एक माणसे आपसान जरुवतेन अनसारे एक्‌ठा कर लेदला4। 19अळतेन मुसु तीनुक कह्‌यु, “काहनु बी माणुस हेरे मां सी संदारे तक घुण बचाड़ु।” 20तेबी चे मुसान वात नी मान्‌या, हेरेसी जत्‌यार काहना-काहनाक माणसे तींद्‌रे माय्‌न संदारे तक बचाड़ीन राख्‌या, ती तींद्‌रे मां कीड़ा पड़ गुया, ने चे गंदायणे बाजी ज्‌या, ती मुसु तींद्‌रे पर रीसवाय गुयु। 21चे संदारे दाहड़ीन आपणी-आपणी जरुवतेन अनसारे खाणे करीन एक्‌ठा करतेला, ने जत्‌यार बेसकु तप लागतेलु, ती चे गळी जात्‌ला।

22अळतेन असो हयो की छटवे दाहड़े चे जा ज्‌यादा, मतलब एक-एक माणुस पछळ दुय-दुय ओमेर भेळा कर लेदा, ने मंडळीन मुख्‌या आवीन मुसा काजे कय देदा। 23तत्‌यार मुसु तीनुक कह्‌यु, “जी ची वात छे जी यहोवा कह्‌लु, काहाकी वाहणे चुखलु आरामेन दाहड़ु, मतलब यहोवा वाटे चुखलु आरामेन दाहड़ु छे।5 तेरेमां तुहुंंक जतरो रांदणे लागे रांदु, ने ज सीजाड़नु लागे च सीजाड़ु, ने तेरे मां सी जतरो बचे ततरो संदारे वाटे मेक लेवु।” 24जत्‌यार चे तीनाक मुसान हुकुमेन अनसारे संदारे लग मेक देदा, तत्‌यार नीते च पीड़्‌यो ने नी तेरेमां कीड़ा पड़्‌या। 25तत्‌यार मुसु कह्‌यु, “आज हीनात काजे खावु, काहाकी आज यहोवान आरामेन दाहड़ु छे; करीन आज तुहुंं काजे चु तीना खळा मां नी जड़े। 26छव दाहड़ा मां तुहुंं एक्‌ठा कर्‌या करसु; बाकुन सातवु दाहड़ु आरामेन दाहड़ु छे, तीने दाहड़े तुहुंंक नी जड़े।”

27तेबी माणसे मां सी कुय-कुय सातवे दाहड़े बी भेळा करने करीन बाहार गुया, बाकुन तीनुक काय बी नी जड़्‌यो। 28ती यहोवा मुसा काजे कह्‌यु, “तुहुंं मारा हुकुम काजे ने नेम-कायदा काजे कां लग नी मानु? 29देखो, यहोवा तुहुंंक जु आरामेन दाहड़ु आपलु छे, करीन चु छटवे दाहड़े तुहुंंक दुय दाहड़ान खाणो आपे; तेरेमां तुहुंं आपसा-आपसान्‌चां बठी रवजु, सातवे दाहड़े कुय बी आपसान जागे सी बाहार घुण जावु।” 30करीन माणसे सातवे दाहड़े तक आराम कर्‌या।

31ईस्‌रायली माणसेन घराणा तीनी खाणेन चीजेन नाव मन्‌ना पाड़्‌या; ने चे धणान बीजड़ान तसा धवळ्‌ळा हतला, ने तेरु सवाद मुहवाळेन बन्‌ला चांग्‌त्‌यान तसलो हतलो।6 32अळतेन मुसु कह्‌यु, “यहोवा जु हुकुम आप्‌यु च ज छे की, हेरे मां सी एक ओमेर भरीन मन्‌ना आपणा घराणान पीड़ी सी पीड़ी तक मेक लेवु, तेरेसी चे जाणे की यहोवा हामुक मीस्‌र देस मां सी नीकाळीन जंगल मां कसला रुटा खावाड़तेलु हसे।” 33तत्‌यार मुसु हारुन काजे कह्‌यु, “एक धुळान ठाहरु लीन तेरेमां एक ओमेर भरीन मन्‌ना मेक, ने तीनाक यहोवा भगवान अगळ मेक दे की, चु तुंद्‌री पीड़ी वाटे मेकलु रवे।”7 34जसु हुकुम यहोवा मुसा काजे आपलु, तीनेत अनसारे हारुन तीनाक वायदान पेटी अगळ मेक देदु की चे चात मेकला रवे। 35जत्‌यार तक ईस्‌रायली माणसे चे देस नी पुग गुया, चां तक चाळीस साल तक मन्‌ना खाता र्‌या, कनान देसेन काकड़ पर पुगते तक ईस्‌रायली माणसे मन्‌नात खाता रया।8 36एक ओमेर9 ते एपान दसवु वाटु छे।