नीरगमन 17

चापर्‌या मां सी पाणी

(गिन्‌ती 20:1-13)

1अळतेन ईस्‌रायेली माणसेन आखी मंडळी सीन नावेन बयड़ा मां सी नीकळीन, ने यहोवान हुकुमेन अनसारे नीकळीन रपीदीम नावेन जागा मां पड़ावु नाख्‌या, ने चां तीनुक पीणेन पाणी नी जड़्‌यो। 2हेरेसी चे मुसा सी वाते-वातेम जखड़ी पड़ीन कह्‌णे बाजी ज्‌या, “हामुक पीणेन पाणी लाय्‌न दे।”

मुसु तीनुक कह्‌यु, “तुहुंं मारे साते काहा वात मां जखड़ी र्‌या? ने यहोवान काहा पारख कर रया?”

3बाकुन चां माणसे काजे पाणी पीणे वाटे पीस लागी, तत्‌यार चे असा कय्‌न मुसा भीणी कुर-कुर करने बाजी गुया, “तु हामुक ने हामरा पुर्‌याक ने जानवर्‌या काजे पीसला मार नाखणे करीन मीस्‌र देस मां काहा ली आवलु छे?”1

4तत्‌यार मुसु यहोवा धड़े वीन्‌ती दुवा करने बाजी गुयु, ने कह्‌यु “हीनु माणसे साते मे काय करो? जे आखा मेसेक दगड़ाटणे हींड रया।”

5यहोवा मुसा काजे कह्‌यु, “ईस्‌रायेलीन डाहला माणसे मां सी थुड़ाक तारे साते ली ले, ने तीनी लाकड़ी सी तु नीळ नदी काजे देद्‌लु, तीनी लाकड़ी काजे हात मां लीन माणसे अगळ-अगळ चाल। 6देख, मे तारे अगळ जाय्‌न होरेब नावेन बयड़ान एक चापर्‌या पर उबु रय्‌स; ने तु तीना चापर्‌या पर देजी, चां तेरेम सी पाणी नीकळसे, ने चे माणसे पी सकसे।” तत्‌यार मुसु ईस्‌रायेलीन डाहला माणसे काजे देखते तसुत कर्‌यु।

7ने मुसु तीनी जागान नाव मस्‌सा ने मरीबा पाड़्‌यु, काहाकी ईस्‌रायली माणसे चां मुसा साते कुर-कुर करतेला, ने यहोवान पारख ज कय्‌न कर्‌या, “काय यहोवा हामरे ईचमां छे की नी हय?”

अमालेकी माणसे साते लड़ायणु

8तत्‌यार अमालेकी माणसे आवीन रपीदीम मां ईस्‌रायेली माणसे साते लड़ाय करने बाजी गुया। 9तत्‌यार मुसु यहोसु काजे कह्‌यु, हामरे वाटे ईस्‌रायेली माणसे मां सी अदमी काजे हेरीन छाटी ले, ने बाहर जाय्‌न अमालेकी साते लड़ाय कर, ने मे वाहणे भगवानेन लाकड़ी हातेम लीन बयड़ान चटी पर उबु रवजी। 10मुसान ईना हुकुमेन अनसारे यहोसु अमालेकी साते लड़ायणे बाजी गुयु, ने मुसु, हारुन ने हुर बयड़ान चटी पर चड़ गुया। 11जां तक मुसु आपसा हात काजे अधर कर रह्‌लु, चां तक ते ईस्‌रायेली माणसे ताकतवाळा हवता गुया, बाकुन जत्‌यार मुसु हात नेचु करतेलु, जां तक अमालेकी माणसे ताकतवाळा हवता गुया। 12बाकुन जत्‌यार मुसान हात हारी पड़्‌या, तत्‌यार हारुन ने हुर एक दगड़ु लीन मुसान्‌चां नेचु मेक देदा, ने मुसु तीना दगड़ा पर बस ज्‌यु, ने हारुन ने हुर तेरा हात काजे समाळता रया, एक जेवड़्‌या हात भीणी ने एक डाखर्‌या हात भीणी, ने तेरु हात दाहड़ु डुबे चां तक उचु रह्‌यु। 13ने यहोसु आपसी तलवारेन ताकत सी अमालेकी काजे हाराड़ देदु।

14तत्‌यार यहोवा मुसा काजे कह्‌यु, “हेर राखणे करीन ईनी वात काजे किताप मां लिख ले, ने यहोसु काजे सामळाय दे की, मे वादळाम नेचु सी अमालेकीन हेरेन सहलाणी बी आखी रीती सी सार दीस।”2 15तत्‌यार मुसु एक वेदी बणायु ने तीनी वेदीन नाव “यहोवा नीस्‌सी3” पाड़्‌यु; 16ने कह्‌यु, “यहोवा सगुन खाद्‌लु, की यहोवा अमालेकी साते जलेमकु लड़ाय करतु रवसे।”