Bhilali Bible
नीरगमन 18
मुसु आपसा सेसरास सी भेट करे
जत्यार मुसान सेसरुस मीद्यान देसेन पुजारु यीतर्यु जो सामळ्यु की भगवान मुसा ने आपसा माणसे ईस्रायेली वाटे काय-काय करलु छे, मतलब जु की काहनी रीते यहोवा ईस्रायेली माणसे काजे मीस्र देस मां सी नीकाळ लायु। तत्यार मुसान सेसरुस यीतर्यु मुसान लाडी सीप्पोरा काजे, तीनुक मुसु पेहलुत आपसा बासेन घर मकली देदलु। ने आपसा दुयु पुर्या काजे बी लीन आयु, तींद्रे मां सी एक जणान नाव मुसु जु कयन गेरसोम पाड़्यु, “मे दीसरा देस मां रवण्यु छे।”1 ने दीसरान नाव चु जो कय्न एलीएजर2 पाड़्यु: “मारा बासेन भगवान मारी मदत करने वाळु बणीन मेसेक फीरोनेन तलवार सी बचाड़लु छे।” मुसान लाडी ने आपसा पुर्या काजे, तेरा सेसरास यीतर्या साते लीन मुसान्चां बयड़ा मां तीनी जागे आयु, जां भगवानेन चुखला बयड़ा धड़े तींद्रु पड़ावु हतलु। ने आवीन चु मुसान्चां जो कय मकल्यु, “मे तारु सेसरुस यीतर्यु छे, ने दुय पुर्या भेळ तारी लाडी तारेन्चां ली आवलु छे।” ती मुसु आपसा सेसरास काजे भेळु हवणे करीन तम्बु मां सी नीकळ्यु, ने तीनाक वांदीन तेरे गुळु देदु; ने चे एक-दीसरा काजे वारलु छे करीन, बुलाड़ता जाय्न तम्बु मां आया। चां मुसु आपसा सेसरास काजे चो असो देखाड़्यु, जो यहोवा फीरोन साते ने मीस्री माणसे साते करलु, मुसु तीनाक तीनी गरान बाराम बी देखाड़्यु, जी गरा आपणेन टेमे तींद्रे पर आवली, ने यहोवा तीनी गराम सी कसी मदत कर्यु चो बी देखाड़्यु। तत्यार यीतर्यु आखी तीनी भलायन वजे सी जो यहोवा ईस्रायली माणसे पुठे करलु, की तीनुक मीस्री माणसेन हक मां सी छुड़ावलु, खुस हयु, ने यीतर्यु कह्यु, “वारु छे यहोवा, जु तुहुंंक फीरोन ने मीस्रे देसेन हक मां सी छुड़ायु, जे तुहुंंक मीस्री माणसेन जागा मां सी छुड़ावलु छे। हंय मे जाण लेदलु छे की, यहोवा आखा देवताम मां सी मटु छे; ने तेरे बारामां बी जेरे सी मीस्री, ईस्रायली साते गलत वेहवार करला।” अळतेन मुसान सेसरुस यीतर्या भगवान वाटे होमबादा ने मेलबादा चड़ायु, ने हारुन ईस्रायलीन आखा पुडारी भेळु मुसान सेसरास यीत्रो पुठे भगवान अगळ खाणो खाणे करीन आयु।
नीयाव करन्यान टाळनु
(वेवस्थावीवरन 1:9-18)
दीसरे दाहड़े मुसु माणसेन नीयाव करने करीन बठ्यु, ने संदारे सी सांता लग माणसे मुसान आड़े-धड़े उबा रया। ज देखीन मुसु माणसे वाटे काय-काय करे, तेरु सेसरुस कह्यु, “ज काय काम छे, ज तु माणसे वाटे करे? काय वजे छे की, तु एखलुत बठी रयु, ने माणसे संदारे सी सांता लग तारे आड़े-धड़े उबा हंय रवे?”
मुसु आपसा सेसरास काजे कह्यु, “हेरो वजे ज छे की, माणसे मारे धड़े भगवान सी पुछणे आवे। जत्यार-जत्यार हींद्रा झगड़ान मुकदमु हवे, तत्यार-तत्यार चे मारेन्चां आवे, ने मे हींद्रे ईचमां नीयाव करो, ने भगवानेन रीती ने नेम हीनुक समजाड़ु।”
मुसान सेसरुस तीनाक कह्यु, “ज काम तु करे च वारु नी हय। हेरेसी तु काय, बाकुन जे माणसे बी जे तारे पुठे छे, हारी पड़से काहाकी ज काम तारे वाटे बेसको भारी छे; तु हीनाक एखलु नी कर सके। तेरेमां हंय मारी वात सामळी ले, मे तुसेक सला आपो, ने भगवान तार पुठे रवे! तु हीनु माणसे वाटे भगवान अगळ जाया कर, ने हींद्रा मुकदमा काजे भगवानेन चां पुगाड़ देजी। हीनुक रीती ने नेम देखाड़ीन, जीनी वाटे हामुक चालने, ने ज-ज काम हीनुक करनु चाहजे, च हीनुक देखाड़ दीया कर। अळतेन तु हीनु माणसे मां सी असा अदमी काजे नेवाड़ ले, जे तींद्रे लायक छे, जे भगवानेन बीहाणो मान्या ने खरायन फायदा सी बुराय करने वाळा हंय तीनुक नेवाड़ ले, ने असला माणसे काजे हजार-हजार, सोव-सोव, पचास-पचास ने दस-दस माणसे पर नीयाव करन्या नेवाड़ ले। ने चे आखी टेमे जे माणसेन नीयाव कर्या करे; ने आखा मटा-मटा मुकदमा काजे तारेन्चां लाया करे, ने नानला-नानला मुकदमा नीयाव आपसात कर लेय; ती तारु बुज हळकु हवे, काहाकी जे बुज काजे चे बी तारे पुठे हाकलसे। कदी तु असु करसी, ने भगवान तुसेक असु हुकुम आपे ती तु टेकलु रवसी, ने जे आखा माणसे आपसान जागे सांती सी पुगी सकसे।”
आपसा सेसरासेन जी वात मानीन मुसु तेरा आखा बुलेन अनसारे कर्यु। मुसु आखा ईस्रायली माणसे मां सी कामेन लायक माणसे काजे टाळीन तीनुक हजार-हजार, सोव-सोव, पचास-पचास ने दस-दस माणसे पर पुडारी बणायु। ने चे आखा माणसेन नीयाव करने बाजी गुया; ने जे मुकदमा काठु रवु ती तीनाक मुसान्चां लावतेला, ने आखा नानला मुकदमान नीयाव चे आपसात कर्या करतेला।
ती मुसु आपसा सेसरास काजे मकली देदु, ने चु हेरा देस भीणी वाटे चाल पड़्यु।
Source notes (2)
- Cross-reference नीरगमन 2:21,22; नेवताळान काम 7:29
- Footnote लीएजार भगवान मारु मदत करन्यु छे
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.