Bhilali Bible
नीरगमन 19
सीनाय बयड़ा पर ईस्रायेली माणसे
ईस्रायेली माणसे काजे मीस्र देस मां सी नीकळ्ळा जे दाहड़ा तीन महना वीत गुया, तीनेत दाहड़े चे सीनाय बयड़ा मां आया। ने जत्यार चे रपीदीम सी नीकळीन सीनाय बयड़ा मां आया, चां चे बयड़ा मां पड़ावु नाख्या; ने चां बयड़ा अगळ ईस्रायेली माणसे तम्बु बणाया। तत्यार मुसु बयड़ा पर भगवानेन्चां चहड़ गुयु, ने यहोवा भगवान बयड़ा पर सी आयड़ीन कह्यु, “याकुबेन घराणा काजे असु कव, ने ईस्रायेली माणसे काजे मारु जु बुल सामळाव: तुहुंं देखला की मे मीस्री माणसे साते कांय-कांय करलु, तुहुंं काजे मानु घुड़ान पाखड़ा पर चड़ावीन मारेन्चा ली आवलु छे। हेरेसी हंय कदी तुहुंं मारी वात सामळु, ने मारा नेम-कायदा काजे पाळसु ती आखा माणसे मां सी तुहुंंत मारु खास धन बणसु; आखी धरती ते मारीत छे।1 तुहुंं मारी नींगा मां पुजारान राज ने चुखला माणसे ठेहरसु। जी वात तुहुंंक ईस्रायेली माणसे काजे कहणेन छे, ची जीत छे।”2 तत्यार मुसु आवीन माणसेन पुडार्या काजे बुलायु, ने ची आखी वात, तीनुक कहणेन हुकुम यहोवा तीनुक आपलु, तीनुक समजाड़ देदु। ने आखा माणसे भेळा हय्न कहणे बाजी गुया, “जो कांय यहोवा कह्यु चो हामु आखा करसु।” माणसेन जी वात मुसु यहोवा काजे सामळायु।
तत्यार यहोवा मुसा काजे कह्यु, “सामळ मे वादळान आंदारला मां हय्न तारेन्चा आवो, हेरेसी की मे जत्यार तार साते वात करो, तत्यार चे माणसे सामळे, ने जलम मारे पर भुरसु करे।” ने मुसु माणसेन वात यहोवा काजे देखाड़्यु। ने यहोवा मुसा काजे कह्यु, “माणसे धड़े जां ने तीनुक आज ने वाहणे चुखा करजु, ने चे आपणा-आपणा पुथल्या धुय लेय, ने चे तीसरे दाहड़े तक तीयार हंय जाय; काहाकी तीसरे दाहड़े यहोवा आखा माणसेन देखते सीनाय बयड़ा पर सी उतरी आवे। ने तु माणसे वाटे आड़े-धड़े वाड़ु बांद देजु, ने तीनुक कह्जु; तुहुंं चेतीन रहु की बयड़ा पर मां चहड़ु ने तीनी काकड़ काजे बी मां छीमजु, ने जे काहनाक माणसे बयड़ा काजे छीमसे तीनुक पाक्का मार नाखसे। तीना बयड़ा काजे कुय बी नी छीमे, ने जे छीमसे तीनुक दगड़ाटसे, नीते तीनुक बीलखा छरकावसे; भले माणसे हंय की जानवर्या, चे बी जीवता नी बचे। जत्यार मट्ला बुल वाळा फेपर्यान आवाज बेसकी वार तक सामळाय, चां तक माणसे बयड़ा पर चड़े।”3
तत्यार मुसु बयड़ा पर सी उतरीन माणसेन्चा आवीन तीनुक चुखा कर्यु, ने चे माणसे आपणा-आपणा पुथल्या धुय लेदा। ने चु माणसे काजे कह्यु, “तीसरे दाहड़े तक तीयार हंय जावु, ने बायर धड़े घुण जावु।”
जत्यार तीसरु दाहड़ु आयु, ती संदारे हवतेत वादळो गाजणे, ने वीजळी चमकणे बाजी गुई, ने बयड़ा पर काळ्ळी वादळी छावाय गुई, ने अळी फेपार्यान बेसकी वारु आवाज सामळायी, ने जतरा माणसे तम्बु मां हतला आखा कापणे बाजी गुया।4 तत्यार मुसु माणसे काजे भगवान साते भेटणे करीन तम्बु मां सी नीकाळीन ली जाती रयु; ने तीना बयड़ान नेचा उबा रया। ने यहोवा जो आक्ठा मां हय्न सीनाय बयड़ा पर उतरलु छे, करीन आखु बयड़ु कुळ्ळा सी भराय गुयु, ने चु कुळ्ळु मटला चुला साय उडतेलो, ने आखु बयड़ु बेसकु कापणे बाजी गुयु।5 जत्यार फेप्यान अवाज जादा, ने बेसको भारी हवती गुई, ती मुसु कह्यु, ने भगवान बुल सामळावीन तीनुक जपाप आप्यु। ने यहोवा सीनाय बयड़ान चोटी पर उतर्यु; ने मुसा काजे बयड़ान चटी पर बुलायु, ने मुसु उपर चड़ गुयु। तत्यार यहोवा मुसा काजे कह्यु, “नेचु उतरीन माणसे काजे चेतावणी आप, कदी असो नी हंय जाय की चे वाड़ी तुड़ीन यहोवा काजे देखणे करीन आवे, ने तींद्रे मां सी बेसका जणा मरीन खत्तम हंय जाय। यहोवान्चां आवणे वाळा पुजारा आपसा काजे चुखा करे, नीते असो नी हवे की यहोवा तीनुक डंड आपे।”
मुसु यहोवा काजे कह्यु, “चे माणसे सीनाय बयड़ा पर नी चहड़ सकता; तु ते खुद हामुक जो कय्न चेतावणी आपलु की बयड़ान आड़े-धड़े वाड़ी बादीन तीनुक चुखु राखु।”
यहोवा तीनुक कह्यु, “उतर ते जां, ने हारुन भेळ तु उपर आव; बाकुन पुजारा ने दीसरा माणसे मारेन्चा वाड़ी तुड़ीन नी चहड़ी आवे नीते मे तीनुक डंड आपीस।” ने जी आखी वात मुसु माणसेन्चा ने बयड़ा पर सी उतरीन तीनुक सामळायु।
Source notes (5)
- Cross-reference वेवस्थावीवरन 4:20; 7:6; 14:2; 26:18; तीतुस 2:14
- Cross-reference 1 पतरस 2:9; उजेंता बुले 1:6; 5:10
- Cross-reference ईब्रानीयो 12:18-20
- Cross-reference उजेंता बुले 4:5
- Cross-reference वेवस्थावीवरन 4:11,12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.