Bhilali Bible
नीरगमन 20
दस हुकुम
(वेवस्थावीवरन 5:1-21)
तत्यार भगवान जे आखा बुले कह्यु; मे तारु भगवान यहोवा छे, जे तुहुंंक गुलामीन घर मतलब मीस्र देस मां सी नीकाळ लावलु छे।
तु मेसेक छुड़ीन काहना दीसराक भगवान करीन घुण माने।
तु आपसे वाटे काहनी बी मुरती घुण बणावे, ने नी काहनाकेन फुटुक घुण बणावे, जे वादळा मां, नीते धरती पर, नीते धरतीन पाणी मां छे। तु तीनुक घुण वांदु, ने नी तींद्रु उपास पाळजु; काहाकी मे तारु भगवान यहोवा रीस राखणे वाळु भगवान छे, ने जे मार साते दुस्मनी राखे, तींद्रा पापेन डंड मां तीसरी ने चोवथी पीड़ी तक तींद्री अवल्यात काजे डंड आप्या करु।1 ने जे मार साते परम करे, ने मारा हुकुम काजे माने, तींद्री हजारु पीड़ी पर गीण-दया कर्या करीस।2
“तु आपणा भगवानेन नाव फालतु घुण लेय; काहाकी जे यहोवान नाव फालतु3 लेय तीनुक चु नी-गुनाळु नी ठेहरावे।”4
“तु आरामेन दाहड़ा काजे चुखलु मान्ने करीन हेर राखजी।5 छव दाहड़ा तक तु मेहनत करीन तारो आखो काम-काज करजु। बाकुन सातवु दाहड़ु तारा भगवान यहोवा वाटे आरामेन दाहड़ु छे। तीने दाहड़े ते तु काहनी बी भातीन काम-काज घुण करु, ने नी तारा पुर्या-पारी, ने नी तारा पावर्या-पावरनी ने नी तारा जानवर्या, ने नी कुय दीसरा देस वाळा जे तारा बारनाम सी माहें आवणु चाहजे।6 काहाकी छव दाहड़ा मां यहोवा वादळा, ने धरती, ने दर्या, ने जो काय तींद्रे मां छे चो आखो बणायु, ने सातवे दाहड़े आराम कर्यु, करीन यहोवा आरामेन दाहड़ा काजे बरकत आप्यु ने तीनुक चुखला ठेहरायु।”
तु आपणा आस्या-बास्यान ईज्जत करजी, तेरे सी जो देस तारु भगवान यहोवा तुसेक आपे, “तेरसी तु तीना देस मां बेसका दाहड़ा लग रह्णु चाहजे।”7
तु खुन घुण करे।8
तु छीनाळो घुण करे।9
तु चुरी घुण करे।10
तु काहनान वीरुद मां झुटी गवा घुण देय।11
“तु काहनाकेन घरेन लालुच घुण करे, ने नी काहनाक पावर्या-पावराय, ने नीते बेल, गदड़ान, ने नी काहनीक चीजेन लालच करजी।”12
माणसेन बीहणु
(वेवस्थावीवरन 5:22-33)
आखा माणसे वादळान गाजुण, ने ईजळी ने फेप्यान आवाज सामळता, ने कुळ्ळु उडतेला बयड़ा काजे देखता रया, ने देखीन थर-थर कापता जाय्न, छेटा उबा हंय गुया। ने चे मुसा काजे कह्या, “तुत हामरे साते वात कर, ती ते हामु सामळी सकजे; बाकुन भगवान काजे हामरे साते वात नी करने देय, असो नी हवे की हामु मर जाजे।”13
मुसु माणसे काजे कह्यु, “बीहु मां, काहाकी भगवान हेरेसी आवलु छे की, तुंद्री पारख करे, ने तींद्रु डर तुंद्रा मन मां रह्वे की तु पाप घुण करु।” ने चे माणसे छेटात उभा रया, बाकुन मुसु चां बेसका आंदारला धड़े गुयु चां भगवान हतलु।
वेदीन बारामां नेम
तत्यार यहोवा मुसा काजे कह्यु, “तु ईस्रायेली माणसे काजे मारा जे बुल सामळाव; तुहुंं आपसात देखला की, मे तुंद्रे साते सरगेम सी वात करलु छे। तुहुंं मारे साते कुय काजे बी घुण भेसकु, मतलब आपणे वाटे चांदी नीते सोना सी देवता काजे घुण बणावु। तु मार वाटे एक धुळान वेदी बणावजु, ने तारा गाडरा-बुकड़ा ने गावड़ी-बेल वाटे होमबादा ने मेलबादा काजे तेरे पर चहड़ावजी; जां-जां मे मारा नाव सी हेर कराड़ो चां-चां मे आवीन तुहुंंक बरकत आपीस। ने कदी तुहुं मारे वाटे दगड़ान वेदी बणावु, ती असा दगड़ा लावजु तेरे पर काहनु बी हत्यार नी चालाड़्यु हय, काहाकी जां तुहुं तेरे पर खुदेन हत्यार लागाड़्या हय ती चु दगड़ु छीतड़े पड़ जासे।14 ने मारी वेदी पर फचक्या सी कदी घुण चहड़ु, कदी असो नी हंय जाय की, तारो डील तेरे पर नांगेरलु देखाव पड़े।”
Source notes (14)
- Cross-reference नीरगमन 34:17; लेवयवेवस्था 19:4; वेवस्थावीवरन 4:15-18; 27:15
- Cross-reference वेवस्थावीवरन 7:9
- Footnote फालतु लुच्चाय वात पर मन मां लागाड़ु
- Cross-reference लेवयवेवस्था 19:12
- Cross-reference नीरगमन 16:23-30; 31:12-14
- Cross-reference नीरगमन 23:12; 31:15; 34:21; 35:2; लेवयवेवस्था 23:3
- Cross-reference वेवस्थावीवरन 27:16; मत्ती 15:4; 19:19; मरकुस 7:10; 10:19; लुका 18:20; ईफीसीयो 6:2,3
- Cross-reference उबजाणनी किताप 9:6; लेवयवेवस्था 24:17; मत्ती 5:21; रोमीयो 13:9; याकुब 2:11
- Cross-reference लेवयवेवस्था 20:10; मत्ती 5:27
- Cross-reference लेवयवेवस्था 19:11; मत्ती 19:18; मरकुस 10:19; लुका 18:20; रोमीयो 13:9
- Cross-reference नीरगमन 23:1; मत्ती 19:18; मरकुस 10:19; लुका 18:20
- Cross-reference रोमीयो 7:7; 13:9
- Cross-reference ईब्रानीयो 12:18,19
- Cross-reference लेवयवेवस्था 25:5-7; यहोसु 8:31
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.