Bhilali Bible
नीरगमन 21
पावर्या साते वारु वेहवार करनु
(वेवस्थावीवरन 15:12-18)
अळतेन जु नेम तुसेक तीनुक समजाड़नेन छे, चु जु छे; जत्यार तुहुंं कुय बी ईब्रानी जातीन पावर्यु मुल लेवु, तत्यार छव साल तक सेवा करसे, ने सातवे साल कीमत आप्या वीगुर छुटीन जाय सके। कदी काहनुक एखलु आवलु हंय ते, एखलुत जाती रह्वे, ने कदी तेरे साते तेरी लाडी आवली हंय, ते तेरे साते आपसी लाडी बी जाती रवे। कदी आपसु मालीक तीनाक लाडी आप्यु हंय, ने तेरे सी तेरा पुर्या-पारी पयदा हवे, ती तेरी लाडी ने पुर्या मालीकेन चां रवे, ने चु एखलुत जाती रवे। बाकुन कदी चु चाकर्यु हिम्मत सी कह्वे की, मे मारा मालीक काजे, ने लाडी ने पुर्या साते परम करो; हेरेसी मे छुटीन नी जाम। तत्यार आपसु मालीक तीनाक भगवानेन चां ली जाय, अळतेन तीनाक झपला धड़े नीते डेहळेन चां जाय जाय्न, तेरा कान्टा मां सुई सी कुरे; तत्यार चु जलमकु तेरी सेवा करतु रह्वे।
कदी काहनुक आपसी पुरे काजे पावरनीन रुप मां वेच देय, तत्यार ची पावरनीन तसी छुटीन बाहर नी जाय। कदी आपसु मालीक तीनीक आपसी लाडी बणावे, ने अळतेन तेरे सी खुसी नी रह्वे, ती चु तीनी लाडीन कीमत आपीन छुड़ी देय, तीनीक धुकु दीन अळी तीनीक बाहर गांव वाळान हात मां वेचणेन तीनुक हक नी रह्वे। कदी चु तीनी साते आपसा पुर्या साते ईयाव कर देदु हय, ती तीनी साते पुरेन तसु वेहवार करे। भले चु दीसरी लाडी ली आवे, तेबी चु तींद्रो खाणो पुथल्या ने मेळ तेरे साते कम नी करे। ने कदी चु हीनी तीन वात मां कमी करे, ती ची बायर कीमत आप्या वीगुर जाती रह्वे।
हत्यारा माणसेन कामेन बारामां नेम
जु काहनुक माणसे काजे असु देय की चु मर जाय, ती पाक्को तीनाक बी मोतेन डंड आपणु चाहजे।1 कदी चु तीनाक मारने नी कर्यु हय, ने भगवानेन मरजी सीत तेरा हात मां आय ज्यु हंय, ती असा मारने वाळान ढासणे वाटे मे एक जागु ठेहरावीस जां चु ढासी जाय।2 बाकुन कदी कुय जाणी बुजीन तीनाक धुका सी मारे, ती तीनाक मारने मारी वेदीन्चां सी अलग ली जाजु।
“जु काहनुक आपसा आस्या-बासेक मारे ने ठुके तीनुक मार नाखणु चाहजे।”
जु कुय काहनाक माणसेक धरीन चुरी कर लेय, भले तीनाक ली जाय्न वेच देय, नीते तींद्रेन्चा जड़े, ती तीनुक बी मार नाखणु चाहजे।3
“ने जु काहनुक आपसा आस्या-बास्या काजे सराप देय, तीनाक बी मार नाखणु चाहजे।”4
“कदी माणसे लड़ाय करे, ने एक दीसरा काजे दगड़ा नीते धुमा सी असा देय की, चु मरे नी बाकुन खाट्ला मां पड़ जाय।” बाकुन जत्यार चु उठीन लाकड़ीन टेके बाहर चालने फीरने बाजी जाय, ती चु देणे वाळु बीन गुनाळ्ळु ठेहरसे; ने देणे वाळु, तीनी तेरी हालत मां चु पड़ रयु, तींद्रु घाटु भर देय, ने तीनाक वारु भलो बी कर देय।
कदी काहनुक आपसा पावर्या नीते पावरनी काजे लाकड़ी सी असु देय की, तींद्रा ठुकणे सी मर जाय, ती तीनाक जरुर डंड आपणु चाहजे। बाकुन कदी चु गुलाम एक नीते, दुय दाहड़ा तक जीवतेला रह्वे, ती तींद्रा मालीक काजे डंड नी आपणु चाहजे, काहाकी चु पावर्यु तेरु धन छे।
कदी माणसे आपसा-आपसात लड़ाय करीन ठुकाये, ने काहनी भारपाये बायर काजे असो लाग जाय की, तेरा पेट माय्न पुर्यो पड़ जाय, बाकुन अळी काय नुकसाण नी हवे, ती देणे वाळा धड़े अतरोत डंड लेणु चाहजे जतरो तीनी बायरीन घरवाळु पंचु अगळ ठेरावे। बाकुन कदी तीनान वदुस नुकसाण हवे, ती जीवाय्न बदले जीवाय आपणु पड़से, ने डुळान बदले डुळा, ने दातेन बदले दात, ने हातेन बदले हात, ने पायेन बदले पाय,5 ने काहनु डागेन बदले डाग, ने घावेन बदले घाव, ने मारेन बदले मारेन डंड रवणु चाहजे।
“जत्यार काहनुक आपसा पावर नीते पावरनीन डुळाम असु देय की फुट जाय, ती चु तेरा डुळान बदले तीनाक पावराय सी छुटीन जाणी देय। जत्यार कुय आपसा पावर काजे नीते पावरनी काजे दीन तेरु दात भांग देय, ती चु तीना दातेन बदले पावराय सी छुटकारु आपीन जाणे देय।”
मालीकेन जीम्मेदारी
“कदी बेल काहना माणसे काजे नीते बायर काजे, असो सींगड़ो लागाड़े की चु मर जाय, ती तीना बेल काजे बी मार नाखणु चाहजे; बाकुन बेलेन मालीक बीन गुनाळु ठेहरे। बाकुन कदी तीना बेलेन पेहेल सी मारनेन आदत पड़ली हंय, ने तीना मालीक काजे बी कय देणु की, खुटा पर बी बांदीन नी राख्यु हंय, ने चु काहना अदमी काजे नीते बायर काजे मार नाखे, ती ते तीना बेल काजे बी दगड़ाटीन मार देणु चाहजे, ने तीना मालीक काजे बी मार देणु चाहजे। कदी तेरे पर छुटणे वाटे डंड मेके, ती जीव छुड़ावणे करीन जे काय तेरे वाटे ठेहरावे तीनाक ततरोत आपणु पड़से। भले बेल काहनाक पुर्या काजे, नीते पुरे काजे मार्यु हंय, तेबी तीना नेमेन अनसारे तीना मालीक साते वेहवार करे। कदी बेल काहना पावर काजे नीते पावरनी काजे सींगड़ो लागाड़्यु हंय, ती बेलेन मालीक तीना पावर्यान मालीक काजे चांदीन तीस सीक्का आपे, ने तीना बेल काजे दगड़ाटीन मार नाखे।”
“ने कदी काहनु माणसे खाडु उगाड़लु रहणे देय, नीते खुदीन तीनाक नी ढाके, ने तेरेमां काहनाकेन बेल नीते गदड़ो पड़ जाय, ती तेरु जु खाडु हंय, चु नुकसान भर देय; तीना जनवारेन मालीक काजे तेरी कीमत आप देय, ने चु जनवार तीना खाडा वाळान ठेहरे।” कदी काहनाकेन बेल कहनाक दीसरान बेल काजे असु मारे की, चु मर जाय ती, चे दुय माणसे तीना जीवतेला बेल काजे वेचीन तीना पयस्या काजे आदा-आदा वाट लेवु; ने चे जनवार काजे बी तसात वाट लेय। कदी जो मालुम पड़े की तीना बेलेन पेहेल सी मारनेन आदत पड़ली छे, बाकुन तेरु मालीक तीनाक बांदीन नी राख्यु, ती तीना बेलेन बदले बेल भर देय, बाकुन चु जानवार आपसुत ठेहरे।
Source notes (5)
- Cross-reference लेवयवेवस्था 24:17
- Cross-reference गिन्ती 35:10-34; वेवस्थावीवरन 19:1-13; यहोसु 20:1-9
- Cross-reference वेवस्थावीवरन 24:7
- Cross-reference लेवयवेवस्था 20:9; मत्ती 15:4; मरकुस 7:10
- Cross-reference लेवयवेवस्था 24:19,20; वेवस्थावीवरन 19:21; मत्ती 5:38
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.