Bhilali Bible
नीरगमन 22
नुकसान भरनेन नेम-कायदु
कदी काहनु माणसे बेल, नीते गाडरो, नीते बुकड़ु चुरायन तीनाक मारे नीते वेच देय, ती तीना बेलेन बदले पांच बेल, ने एक बुकड़ान बदले च्यार बुकड़ा भर देय। कदी चुट्टु चुरी करतेलु धराय जाय, ने तीनाक असा ठुके की चु मर जाय, ने तेरा खुनेन गुनु नी लागे; कदी दाहड़ु उंगी जाय, ती तीना खुनेन गुनु लागे; ने चु नुकसाण काजे भर देय, ने कदी तींद्रे धड़े काय नी हय, ती तीनाक चुरीन वजे सी वेच देणु चाहजे। कदी चुरी करलु बेल, नीते गदड़ो, नीते गाडरो, नीते बुकड़ु तेरा हात मां जीवतेलु जड़े, ती चु तेरे बदले दुय गुणा भर देय।
“कदी काहनुक आपसा जनवार काजे काहना दीसरान खेत नीते अंगुरेन वाड़ी चार देय, नीते आपसा जनवार काजे असु छुड़ देय, की तीना दीसरान खेत मां खाय जाय, ती चु आपसा खेतेन ने अंगुरेन वाड़ीन वारलु सी वारलु कमाय मां सी चु नुकसाण काजे भर देय।”
कदी काहनुक आक्ठी धपाड़े, ने चु काटाळ्ळा मां लाग जाय, ने फुलेन ढेर नीते फसल नीते उभली मेरेन खेत धप जाय, ती जो आक्ठो धपाड़्यु हंय, चु नक्खी नुकसाण काजे भर देणु चाहजे।
कदी काहनुक माणुस दीसरा घर पयस्या टका नीते काय दीसरी चीज मेकणे करीन आपे, ने चु तीना घर सी चुरी हंय जाय, ती कदी चुट्टु धराय जाय ती, चु दुय गुणा पछु आपसे। कदी चुट्टु नी धराये ती, घरेन मालीक काजे भगवानेन चां लावणु चाहजे की, पक्कु हंय जाय की चु आपसान भाय बहणस्यान चीज चुरी करलु छे की नी।
भले बेल, भले गदड़ो, भले गाडरा नीते बुकड़ा भले पुथल्या, भले असी काहनी भातीन खुवायली चीजेन बारामां गुनु काहानी लागाड़े, तीनाक दुय जणा मारी छे, मारी छे करीन, दुय जणान नीयाव भगवान धड़े छे, ने तीनाक भगवान गुनाळु ठेहरावे चु दीसराक दुय गुणा भर देय।
“कदी काहनुक दीसरा काजे गदड़ु नीते बेल नीते गाडरा-बुकड़ा नीते काहना अळी दीसरा जनवार राखणे करीन सुपे, ने कुय ने देखे वीगुर मर जाय, नीते काय घाव लागे, नीते गेरीन ली जाती रवे। ती चु दुय जणा काजे यहोवान सगुन खावाड़नु चाहजे की, ‘मे हीना माल पर हात नी लागाड़्यु;’ तत्यार मालेन मालीक तीनाक छाची मान्यु, ने दीसरा काजे काय बी भरनु नी पड़े।” कदी चु छाचलीन तींद्रेन्चा सी चुरी कर्यु हय, ती तीना मालीक काजे आप देय। ने कदी तीनाक जंगली जनवारेन साहरे मारी नाखे, ती तीना मरला जनवारेन सहलाणी देखाड़ने करीन लावे, ने तीनाक चो भरनु नी पड़े।
“अळी कदी काहनुक माणुस आपसा साते वाळा धड़े एक जनवार उदार मांगीन लावे, ने तेरु मालीक नी रवे ती घाव लाग जाय, नीते मर जाय ती चु तेरु नक्खी नुकसान भर देय। ने कदी तेरु मालीक साते हय, ती दीसरा काजे नुकसान नी भरनु पड़े; ने कदी चु कीराया सी हंय, ती नुकसान तीना कीराया मां आय गुयु।”
नेतीन ने धरमेन नेम
“कदी काहनुक माणुस काहनी पुरे काजे, तेरा ईयावेन वात नी हयी हय, ने तीनीक वात मां फसाड़ीन तेरे साते गलत काम करे, तत्यार चु तेरी कीमत आपीन तेरे साते ईयाव कर लेय।” बाकुन कदी तेरु बास तीनीक आपणे करीन कदी नी माने, ती गलत काम करने वाळी पुरेन देजान रीतीन अनसारे पयस्या भर देय।
“तु जादु टुना करने वाळा बायरा काजे जीवतेला मां रह्णी देजी।”1
कदी काहनुक माणुस काहनाक जनवार साते सोवसार करे, ती तीनाक जरुर मार नाखणु चाहजे।2
जु काहनुक यहोवा भगवान काजे छुड़ीन काहना दीसरा देवतान बादा चहड़ावे तीनाक खत्तम कर देणु चाहजे।3
“तुहुंं दीसरा देस वाळा माणसे काजे मां वेला पाड़जु, ने नी तीनाक दमजु, काहाकी मीस्र देस मां तुहुंं बी दीसरा देस वाळा हतला। काहनी रांडायली बायर काजे, नीते पुरायला पुर्या काजे दुख घुण देवु। कदी असा काजे तुहुंं काहनी भातीन दुख आपसु, ने चु मेसेक आयड़े, ती मे पाक्कु तींद्रो आयड़नु सामळीस। ती मारी रीस वदसे, ने मे तलवार सी तुहुंंक मारीस, ने तुंद्री लाडी रांडायली, ने तुंद्रा पुर्या पुरायला हंय जासे।”
कदी तु मारा माणसे मां सी काहना सुदा माणसे काजे जे तारे साते रवता हंय, पयस्या उदार आपे ती तींद्रे धड़े मट्ला माणसेन तसा ईयाज घुण लेवु।4 कदी तु काहनेक दाहड़े आपसा भाय साते वाळान पुथल्यो गीरवी करीन ली बी लेय, ती दाहड़ु डुबणे सी पेहेल तीनाक पछो दी देणु चाहजे। काहाकी चु तेरो एकुत आथरन्यो छे, तीना डीलेन चु एखलुत पुथल्यो छे; ने अळतेन चु तीनाक आथरीन सुवे? ने जत्यार चु मेसेक आयड़े ती मे तेरी सामळी लीस, काहाकी मे दयाळ्ळु छे।
भगवान काजे गलत बुल घुण कवे, ने आपणा माणसेन डाहा-डाहा काजे सराप घुण देवु।5
तारा खेतेन मेर ने फुलेन रस मां सी पेहली फसल यहोवा भगवान काजे भेट चड़ावने मां वार घुण लागाड़े, ने तारा आखाम सी पेहला पुर्या काजे मेसेक आपजी। तसुत तारा गावड़्या ने गाडरा, बुकड़ान पेहला मेसेक आपजी, सात दाहड़ा तक पुर्या आपसी माय साते रवे, ने आठवे दाहड़े तु तीनाक मेसेक आप देजी।
तु मार वाटे चुखलु माणुस बणजी, करीन जी जनवार बाहर तुहुंंक जंगली जनवारेन साहरे मरलु जड़े तेरु सीकार घुण खावु, तीनाक कुतरा अगळ नाख देजु।6
Source notes (6)
- Cross-reference लेवयवेवस्था 20:27; वेवस्थावीवरन 18:10,11
- Cross-reference लेवयवेवस्था 18:23; 20:15,16; वेवस्थावीवरन 27:21
- Cross-reference वेवस्थावीवरन 17:2-7
- Cross-reference लेवयवेवस्था 25:35-38; वेवस्थावीवरन 15:7-11; 23:19,20
- Cross-reference नेवताळान काम 23:5
- Cross-reference लेवयवेवस्था 17:15
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.