Bhadrawahi Bible
भजन संहिता 106
परमेशरे पुड़ इस्राएलेरो विश्वास न केरनो
यहोवारी तारीफ़ केरा, यहोवारी शुक्रगुज़ारी केरा, किजोकि तै भलोए;
ते तैसेरो प्यार हमेशारोए।
कौन यहोवारे महान कम्मां केरे बारे मां बियान केरि सकते,
या कौन तैसेरी पूरी तारीफ़ केरि सकते?
केत्रो धने तै ज़ै न्याय पुड़ च़लते,
या हर वक्त भलां कम्मां केरते।
हे यहोवा ज़ैखन तू अपने लोकन पुड़ दया केरस, मीं भी याद रेखां
ज़ैखन तू तैन बच़ास मीं भी याद रेखां।
ताके अवं तेरे च़ुनोरे लोकां केरी खुशहाली हेरी सेखी,
ते तेरे लोकां केरि खुशी मां शामल भोईं;
ते विरासती सेइं साथी तारीफ़ केरि सेखी।
असेईं त अपने दादे-पड़दादां केरो ज़ेरो पाप कियोरोए;
असेईं बुराई की ते बुरां कम्मां कियां!
ज़ैखन इश्शे दादे पड़दादे मिस्रे मां थिये, तैखन तैन तेरे चमत्कारन पुड़ मन न लव,
ते तेरी तै महरबानी याद न रख्खी;
तैनेईं समुन्दरेरे बन्ने, मतलब लाल समुन्दरेरे बन्ने बगावत की।
फिरी भी तैनी तैना अपने नंव्वेरे खातर बच़ाए,
ज़ैस सेइं तै अपनि कुदरत बांदी केरे।
तैखन तैनी लाल समुन्दर झ़िड़को ते तै शुक्की जेव,
तैनी तैना समुन्दरेरे डुग्घारे मांमेइं पार कढे ज़ेन्च़रे रेगिस्ताने मांमेइं निस्से।
तैनी तैना दुश्मनेरे1 हथ्थे मरां कढे,
ते दुश्मनेरे हथ्थे मरां छुटाव।
तैन केरे दुश्मन पैनी मां डुबतां मेरि जे;
तैन मरां अक भी न बच़ो।
तैखन तैसेरे लोकेईं तैसेरे वाधन पुड़ विश्वास कियो,
ते तैसेरी तारीफ़ केरने लगे।
पन तैनेईं लूशी तैसेरां कम्मां बिसरी छ़डां;
ते तैसेरी सलाह न बलगी।
सुनसान ठैरी मां तैनेईं बड़ी खुवैइश की
ते रेगिस्ताने मां परमेशरेरी अज़मैइश की।
तैखन तैन मगोरो बर त दित्तो,
पन तैन मां खतरनाक बिमारी भेज़ी।
तैना डेरन मां मूसेरे
ते यहोवारे लेई पवित्र सेवक हारूनेरी मुखालफत केरने लगे।
तैखन ज़मीन फेटतां दाताने निगली जेई,
ते अबीरामेरो जथो निगलो।
ते तैन केरे जथे मां अग लेग्गी जेई;
ते दुष्ट लोक लप्पी सेइं भस्म भोइ जे।
तैनेईं होरेब पहाड़े2 पुड़ बछ़ड़ेरी मूरती बनाई,
ते तैस बनेवरी मूरतरी पूज़ा की।
तैनेईं परमेशरेरी महिमा, घास खानेबाले दांतेरे मूरती मां बदली।
तैनेईं अपनो मुक्ति देनेबालो परमेशर बिसरो,
ज़ैने मिस्रे मां बड्डां-बड्डां कम्मां कियोरां थियां।
तैने हामेरे मुल्खे मां चमत्कार,
ते लाल समुन्दरेरे बन्ने पुड़ भयानक कम्मां कियोरां थियां।
तांए तैनी ज़ोवं, कि एन केरो अवं सत्यानाश केरी देथो।
अगर मेरो च़ुनोरो दास मूसो खतरेरे ठैरी तैन केरे लेई खड़ो न भोथो
ताके मेरी सरक ठंडी केरे कोन्च एरहो न भोए कि अवं तैन नाश केरि छ़ेडी।
तैनेईं तै मन पसंद मुल्ख बेकार समझ़ो,
तैनेईं तैसेरे वाधन पुड़ विश्वास न कियो।
तैना अपने डेरन मां कुड़कुड़ाए,
ते यहोवारी आवाज़ शुन्नेरे लेई तियार न भोए।
तैखन तैनी तैन केरे बारे मां कसम खाइ कि अवं तैन सुनसान ठैरी मां नाश केरेलो,
ते तैन केरि औलादी होरि कौमां केरे सामने बिछ़ोड़ेलो,
ते मुल्खे-मुल्खे मां तितर-बितर केरेलो।
तैना बालपोर3 देबतेरी पुज़ा केरने लगे, ते मुड़दन कां च़ढ़ोरे जानबरां केरू मास खाने लगे।
एन्च़रे तैनेईं अपने कम्मन सेइं तै सरकाव,
ते महामारी तैन मां फैली जेई।
पन पीनहासे खड़े भोइतां तैन केरि आदालत की,
ते तैखन महामारी रुकी जेई।
ते इन तैसेरे लेई पीढ़ी-पीढ़ी तगर हमेशारे लेई धर्म गनो जेव।
तैनेईं मरीबा नंव्वेरे पैनेरे नागे कां भी यहोवा सरक आनाई,
ते तैन केरे वजाई सेइं मूसेरो नुकसान भोव।
किजोकि तैनेईं परमेशरेरी आत्माई सेइं बगावत की,
तैखन मूसो बगैर सोचने ज़ोने लगो।
ज़ैना लोकां केरे बारे मां यहोवा हुक्म दित्तोरो थियो,
तैनी तैना नाश न किये।
बल्के तैना एरी कौमन सेइं मिली जे,
ते तैन केरे रीति रुवाज़ शिख्खे।
तैना तैन केरे मूरती केरि पूज़ा केरने लगे,
ते तैना तैन केरे लेई फंदो बेनि जेई।
बल्के तैनेईं अपने मट्ठां कुइयां कनानेरे मूरती केरे लेई बलिदान कियां;
ते अपने बेकसूर कुइये मट्ठां केरो खून बगाव
ज़ैना तैनेईं कनानेरे मूरतन पुड़ बलि कियां।
एल्हेरेलेइ मुल्ख खूने सेइं अपवित्र भोइ जेव।
ते तैना सब अपने कम्मां केरे ज़िरिये सेइं भिट्टे भोए,
ते अपने कम्मां केरे ज़िरिये सेइं तैना व्यभिचार केरनेबाले बेनि जे।
तैखन यहोवारो क्रोध अपने लोकन पुड़ भड़को,
ते तैस अपने विरासती सेइं सखत नफरत भोइ;
तैखन तैनी तैना गैर कौमां केरे हवाले केरि दित्ते,
ते तैन केरे दुश्मनेईं तैन पुड़ राज़ कियूं।
तैन केरे दुश्मनेईं तैन पुड़ ज़ुलम कियो,
ते तैना तैन केरे हथ्थे हैठ देबोइ जे।
बार-बार तैनी तैना छुटाए,
पन तैना तैसेरे खलाफ टिकोरे राए,
ते अपने बुरे कम्मां केरि वजाई सेइं च़िकोरे राए।
फिरी भी ज़ैखन-ज़ैखन तैन केरि प्राथनाई मां चिन्डां तैनी शुनी,
तैखन-तैखन तैने तैन केरि मुसीबती पुड़ नज़र की!
तैन केरे लेई अपनो करार याद केरतां
अपने बड़े प्यारेरे मुताबिक तरस खव,
ते ज़ैना तैना गुलाम बनेइतां नियोरे थिये तैन सेभन पुड़ दया कराई।
हे इश्शे यहोवा परमेशर, असन बच़ा,
ते असन गैर कौमन मरां अकोट्ठे केर,
कि अस तेरे पवित्र नंव्वेरू शुक्र केरम,
ते तेरी तारीफ़ केरते तेरे बारे मां बडीयाई केरम।
इस्राएलेरो परमेशर यहोवा
शुरुआती करां हमेशा तगर धने।
ते सारे लोक ज़ोन, “आमीन!”
यहोवारी तारीफ़ केरा।
Source notes (3)
- Footnote दुश्मनेरे इस भजने मां मिस्री केरि पिशान दुश्मना केरे रूपे मांए।
- Footnote होरेब पहाड़े सीनै पहाड़
- Footnote बालपोर मतलब “प्रभु” इन नवं पुराने नियमे मां गैर कौमां केरो देबतोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.