Bhadrawahi Bible
भजन संहिता 105
परमेशर ते तैसेरे लोक
यहोवारू शुक्र केरा, तैस कां प्राथना केरा,
मुल्खे मुल्खेरे लोकन कां तैसेरे कम्मां केरो प्रचार केरा!
तैसेरे लेई गीतां ज़ोथ, तैसेरे लेई भजन ज़ोथ,
तैसेरे सब चमत्कारां केरू बियान केरा!
तैसेरे पवित्र नंव्वेरी बडीयाई केरा;
यहोवारी तलाश केरनेबालां केरो दिल खुशी भोए।
यहोवा त तैसेरी शक्ति तोप्पा,
तैसेरे दर्शनेरे तलाशी मां लगातार लग्गोरे राथ।
ज़ैना चमत्कार तैनी किये तैन याद केरा,
तैसेरे चमत्कार ते फैसले याद केरा!
हे तैसेरे सेवक अब्राहमेरू खानदान,
हे याकूबेरे घरानेरे लोकव, तुस त तैसेरे च़ुनोरे आथ!
तैए इश्शो परमेशर यहोवा आहे;
पूरे धेरती पुड़ तैसेरे फैसले भोतन।
तै हमेशा अपने करारे याद केरतो एवरोए,
इन तैन्ने वचने ज़ैन तैनी हज़ार पीढ़ी केरे लेई रखोरू थियूं;
तैए करार ज़ै तैनी अब्राहमे सेइं कियोरो थियो,
एस बारे मां तैनी इसहाके सेइं कसम खाइ।
तै तैनी याकूबेरे लेई विधि केरतां,
ते इस्राएलेरे लेई इन ज़ोइतां हमेशारे लेई करार केरतां मज़बूत कियो।
“अवं कनान मुल्खे तीं देइलो, तै बन्टने मां तेरो अपनो हिस्सो भोल्हो।”
तैस मौके परमेशरेरे लोकां केरि गिनती थोड़ी थी, बल्के बिलकुल थोड़ी थी,
ते तैस मुल्खे मां परदेशी थिये।
तैना एक्की कौमी मरां होरि कौमी मां,
ते एक्की रियासती मरां होरि रियासती मां हंठते फिरते राए।
पन तैनी कोन्ची मैन्हु तैन पुड़ ज़ुलम केरने न दित्तो;
ते तै राज़न तैन केरे लेई ई धमकी देतो थियो,
“मेरे च़ुनोरे दासन सेइं न हुरा,
मेरे नेबन कोई नुकसान न पुज़ाथ!”
फिरी यहोवा तैस कनान मुल्खे मां काल भेज़ो,
ते तैन अन्न मैल्हनू बन्द भोवं।
तैनी यूसुफ नंव्वेरो अक मैन्हु तैन करां पेइलो भेज़ोरो थियो,
ज़ै गुलाम बनानेरे लेई बेच़ोरो थियो।
लोकेईं तैसेरे पव्वन मां बेड़ी लेइतां तैस बड़ो दुख दित्तो,
तै लोंहेरी शंगलन सेइं बन्धो जेव।
ज़ांतगर तैन सब किछ पूरू न भोवं,
तैखन तगर यहोवारू वचन तैस अज़मातू रावं।
तैखन मिस्रेरे राज़े अपने मैन्हु भेज़तां तैट्ठां छुटाव,
ते मुल्खां-मुल्खां केरे लोकां केरे मालिके तै आज़ाद कियो;
फिरी मिस्रेरे राज़े तै अपने घरे मां प्रधान
ते एपनी सैरी जेईदातरो अधिकारी बनाव।
कि तै तैसेरे हाकिमन एपनी मेर्ज़रे मुताबिक कैबू केरे,
ते मिस्री बुज़ुर्ग लोकन ज्ञान शिखाले।
फिरी इस्राएल मिस्रे मां अव;
ते याकूब हामेरे मुल्खे मां परदेशी बेनतां राव।
तैखन तैनी अपने लोक गिनती मां बड़े बधाए,
ते तैसेरे दुश्मन करां जादे ताकतबर बनाव।
तैनी मिस्री केरो मन एन्च़रे बदलो,
कि तैना तैसेरे लोकन सेइं बैर रखने,
ते तैसेरे सेवकन सेइं दगो केरने लगे।
तैनी अपनो सेवक मूसो
ते अपनो च़ुनोरो हारून मिस्रे मां भेज़े।
तैने मिस्री लोकां केरे दरमियान तैसेरे तरफां किसमां-किसमां केरे निशान,
ते हामेरे मुल्खे मां चमत्कार हिराए।
परमेशरेरे हुक्मे सेइं मिस्र मुल्खे मां आंधरू भोइ जेवं,
पन तैनेईं तैसेरो हुक्म न मन्नो।
परमेशरे मिस्रेरू पानी खूने मां बेदली दित्तू,
ते तैन केरि मेछ़ली मैरी दित्ती।
मिस्र मुल्खे मां मैंडू एत्रां बेधी जेआं कि राज़ेरे मेहले मां भी भेरोई जेआं।
परमेशरे हुक्म दित्तो, तैखन डांघाल आए,
ते तैन केरे सारे मुल्खे मां जिवाँ एई।
झ़ेड़रे बदले तैनी मिस्र मुल्खे मां आण भेज़ी,
ते तैन केरे मुल्खे मां बड़ी अग बख्खी।
तैनी तैन केरे दाछ़रे डाल ते फैगेरे बुट
ते तैन केरे मुल्खेरे बुट भी ट्लोड़ी दित्ते।
तैसेरे हुक्मे सेइं मिस्र मुल्खे मां बेशुमार टिट्टां, ते कीड़े आए,
तैनेईं तैन केरे मुल्खेरू सब अन्न खेइ छ़डू;
ते तैन केरे उडारां केरि सारी फसल चट केरि दित्ती।
तैनी तैन केरे मुल्खेरां सब ज़ेठे मारे,
ते तैन केरे ताकतरो पेइलो फल भी नाश कियो।
तैखन तैनी इस्राएली लोकन सोन्नू चाँदी दुवेइतां तैट्ठां केढतां आने,
ते तैन मरां कोई भी कमज़ोर न थियो।
तैन केरे तैट्ठां गाने सेइं मिस्री बड़े खुशी भोए,
किजोकि तैन केरो डर तैन मां बेस्सी जेवरो थियो।
तैनी तैन केरे छाव बनानेरे लेई बिदलार फैलाई,
ते राती लौ बनानेरे लेई अग भेज़ी।
इस्राएली लोकां केरे मगने सेइं तैन केरे लेई बटेरां पुज़ेई,
ते तैन सुर्गेरी रोट्टी दित्ती।
तैने चट्टान ट्लोड़ी त पानी बगने लगू:
ते रेगिस्ताने मां पैनेरो दरिया बगने लगो।
किजोकि परमेशरे अपनो पवित्र वाधो
ते अपनो दास अब्राहम याद कियो।
तैनी अपने च़ुनोरे लोक मिस्रे मरां केढतां आने,
ते अपने च़ुनोरे लोक जयजयकार करावेइतां कढे।
ते इस्राएली लोकन कौमां-कौमां केरे मुल्ख भी दित्ते,
ते तैन केरे मुल्खेरी मेहनतरे फले पुड़ कब्ज़ो कियो।
कि तैना तैसेरे विधन मन्न,
ते तैसेरे कानूने पूरो केरन।
यहोवारी तारीफ़ केरा।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.