Bhadrawahi Bible
भजन संहिता 107
पंच़ोंव हिस्सो
भज. 107—150
मुक्ति देनेरे लेई परमेशरेरू शुक्र
यहोवारू शुक्र केरा। किजोकि तै भलोए;
ते तैसेरो प्यार हमेशारोए!
यहोवा ज़ैन छुटेवरेन तैना एन्च़रे ज़ोन,
ज़ैना तैनी कीमत देइतां दुश्मनेरे कब्ज़े मरां छुटेवरन।
ते तैन मुल्ख-मुल्खेरां,
पूरब-पश्चिम, उत्तर ते दक्षिण पासेरां अकोट्ठे कियोरेन।
किछ लोक सुनसान ठैरी मां रेगिस्ताने पुड़ भटकते फिरे,
कोई नगर न मैल्हू ज़ैड़ी तैना रहते भोन;
ढ्लुखी सेइं ते ट्लिशी सेइं
तैन केरि जान कमज़ोर भोइ जेई।
तैखन तैनेईं एपनी मुसीबती मां यहोवा कां बिनती की,
ते तैनी तैन केरि सैरी मुसीबतन करां छुटकारो दित्तो;
तैनी तैना सही बत्तां च़लाए,
ताके तैना बस्सनेरे लेई कोन्ची नगरे तगर पुज़न।
लोक यहोवारे प्यारेरे वजाई सेइं,
ते तैन चमत्कारां केरे वजाई सेइं ज़ैना तै मैन्हु केरे लेई केरते, तैसेरे लेई शुक्र केरन!
किजोकि तै ट्लिशोरी जानी पानी पियाते,
ते ढ्लुखोरे रोड़ी-रोड़ी चीज़ेइं सेइं रज़ानते।
ज़ैना आंधरे ते मौतरी छावी मां बिशोरेन,
ते दुखे मां फसोरे ते बेड़न सेइं बन्धोरे थिये।
किजोकि तैना परमेशरेरे वचनेरे खलाफ च़ले,
तैनेईं परमप्रधान परमेशरेरी सलाह घटिया समझ़ी।
तैखन तैनेईं तैना तकलीफी सेइं दबाए;
तैना ठोकर खेइतां बिछ़ड़े, ते तैन कोई मद्दत न मैल्ही।
तैखन तैनेईं मुसीबती मां यहोवा पुकारो,
ते तैनी तैन केरे दुखन करां छुटकारो दित्तो।
तैनी तैना आंधरे मरां ते मौतरे छावी मरां कढे;
ते तैन केरि बेड़ी भी ट्लोड़ी दित्ती।
लोक यहोवारे प्यारेरे वजाई सेइं,
ते तैन चमत्कारां केरे वजाई सेइं ज़ै तै मैन्हु केरे लेई केरते,
तैसेरू शुक्र केरन।
किजोकि तैनी पितलरे फाटक ट्लोड़ी दित्ते,
ते लोंहेरे अड्डे टुक्ड़े-टुक्ड़े केरि दित्ते।
बेवकूफ अपने बुरी चाल,
ते बुरां कम्मां केरे वजाई सेइं बड़े दुखी भोतन।
तैन हर खानेरे चीज़ी सेइं नफरत भोने लगी
ते तैना मौतरे फाटके कां नेड़े पुज़्ज़ी जे।
तैखन तैना अपने मुसीबती मां यहोवा कां बिनती केरतन,
ते तै तैन केरि सैरी मुसीबतन करां छुटकारो देते।
तै अपनु वचन भेज़तां तैन बझ़ाते,
ते ज़ैस गत्ते मां तैना फसोरेन तैन कढते।
लोक यहोवारे प्यारेरे वजाई
ते तैन चमत्कारां केरे वजाई सेइं ज़ैना तै मैन्हु केरे लेई केरते, तैसेरू शुक्र केरन!
ते तैना शुक्रेरी बलि च़ाढ़न,
ते जयजयकार केरते, तैसेरे कम्मां केरू बियान केरन।
ज़ैना लोक समुन्दरे मां ज़िहाज़न पुड़ च़लतन,
ते महासागरे पुड़ भोइतां बुपार केरतन;
तैना यहोवारे कम्मन,
ते तैन चमत्कारन हेरतन, ज़ैना तै डुग्घे समुन्दरे मां केरते।
किजोकि तै हुक्म देते, तैखन तूफानी हवा च़ेलतां छ़ेल्ली आनतीए।
तैना अम्बरे तगर पुज़्ज़ी जे, ते डुग्घारे तगर ओसतन; ते
ते दुखेरे मारे तैन केरे जानी मां जान न राए;
तैना चक्कर खाते, ते नशे मां मसत भोवरे ड्लकेईं खातन
तैन केरि सारी अक्ल मारी गातीए।
तैखन तैना एपनी मुसीबती मां यहोवा पुकारतन,
ते तै तैन्न मुसीबती करां छुटकारो देते।
तै छ़ेलहन रोकते ते छ़ेल्ही रुकी गैतिन।
तैखन तैना तैन केरे बिशने सेइं खुशी भोतन,
ते तै तैन केरे मन चाए कैदखाने मां पुज़ेई देते।
लोक यहोवारे प्यारेरे वजाई सेइं,
ते तैन चमत्कारां केरे वजाई सेइं ज़ैना तै मैन्हु केरे लेई केरते,
तैसेरू शुक्र केरन।
ते सभाई मां तैसेरी तारीफ़ केरन,
ते बुज़ुर्गां केरे दरमियान तैसेरी तारीफ़ केरन।
तै दरियान जंगल बनाते,
ते पैनेरे नागन शुकोरी ज़मीनी मां बेदली देते।
तै फलदार ज़मीनी बंझर ज़मीन बनाते,
इन तैट्ठेरे रानेबालां केरे बुरैइारे नज़रारे वजाई सेइं भोते।
तै जंगले पैनेरी झीलां बनाते,
ते रेगिस्ताने पैनेरे नाग बनाते।
तैड़ी तै ढ्लुखोरेन बसेई देते,
कि तैना बस्सनेरे लेई नगर तियार केरन।
ते ज़मीनदारी केरन, ते दाछ़री बागां लान,
ते किसमां-किसमां केरे फल उगान।
यहोवा तैन एरी बरकत देते कि तैना बड़े बेधी गातन,
ते तैन केरे जानबरन भी तै घटने न दे।
फिरी आफतरे ते दुखेरे वजाई सेइं,
तैना घटते देबोइ गातन।
त तै दुश्मन हकीमन बेज़ती सेइं लेदतां बत्तां सने टेपलोइतां जंगले मांमेइं भटकाते।
पन तै गरीबन दुखे करां छुटेइतां उच्चे पुड़ रखते,
ते तैन्न भैड्डां केरे केन्नी केरे ज़ेरे परिवार देते।
सच़्च़े लोक हेरतां खुशी भोइ गातन;
ते सब बुरे लोक अपनु आशी बंद केरतन।
ज़ै कोई अक्लमन्द भोए, तै इन गल्लन पुड़ ध्यान केरेलो;
ते यहोवारे प्यारेरे कम्मन पुड़ ध्यान केरेलो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.