Paliya Bible
मरकुस 12
साजा मे आपली वाड़ी नो दाखलो
(मत्ती 21:33-46; लुका 20:9-19)
ईसु यरुसलेम वाळा ने दाखला ना लारे केतो ज्यो, “एक माणेह अंगुर नी वाड़ी लगाड़्यो; अने वाड़ी ना च्यारो-मेर वाड़ बांद्यो अने अंगुर नो रोह काडवा करीन एक हळावो बणायो, अने अंगुर नी वाड़ी मे एक माळो बणायो अने काना कीरसान ने आह़फा नी वाड़ी साजा मे आपीन, नाम्बे वाळा देस मे जत र्यो। पण अंगुर ना फालवा ना दाड़ा आया, तीहया खेतर नो मालीक आह़फा ना एक पावोर ने कीरसान ने तां अंगुर नी वाड़ी ना फोळ नो वाटो मांगवा मोकल्यो। पण तीहया तीने धरीन ठोक्या, अने तीने ठारलोत पासो मोकली देदा। अळी तीहया बीजा पावर्या ने मोकल्या अने तीहया ते पावोर ना मुंडा मे देदा, अने तीनु नामबद्दी कर्या। मालीक बीजा पावर्या ने मोकल्यो, अने तीने तीहया मार नाख्या, ता तीहयो अळी ढेरकात पावर्या ने मोकल्यो तीमनी मे गेथा तीहया काना ने ठोक्या; अने काना ने मार नाख्या। हाव तीमनीन्तां मोकलवा करीन एकीत जणो र्यो; तीहयो तीनो मोंगाळ्ळो सोरो हतो। तीहया तीनु आव-भाव करहे करीन तीहयो आह़फा ना सोरा ने तीमनीन्तां सेल्ली कावा मोकल्यो। पण तीहया कीरसाण्या आह़फा केदा, ‘आहयो ते आहया खेतर नो हकदार्यो से; चालो आने बी मार नाखता, तत्यार आहयी अंगुर नी वाड़ी आपणी हय जहे।’ अने तीहया तीने धरीन मार नाख्या अने अंगुर नी वाड़ी मे गेथो बारो नाख देदा।”
ईसु पुछ्यो आञे ह़ारीक अंगुर नी वाड़ी नो मालीक ह़ु करहे? तीहयो आवीन तीहया कीरसाण्या ने मार नाखहे अने अंगुर नी वाड़ी बीजा ने साजा मे आप देहे। तमु हजु लग खरला भगवान ना बोलु मे आहयो बोल भण्या नी ह़ु? जे दगड़ा ने राज-मीस्तर्या रीकामो ह़मजीन बारो काड देदा, तीहयो दगड़ो ते घोर ना खुणा नो दगड़ो बण ज्यो। आहयु ते मालीक भगवान नी वगे गेथु हयलु से, आहयु ते अमारी नींगा मे घणु जुदु से।
तीहया डायला पुंजारा, युहदी-धरम ह़ीकाड़न्या अने पुडार्या ह़मजी ज्या, के आहयो ते अमारी वीरोद मे दाखलो देखाड़लो से, एतरे तीहया ईसु ने धरवा हींडता हता, पण तीहया मेळा मे वाळा माणहु सी बीहता हता, एतरे ईसु ने रेवा दीन जत र्या।
करजो आपवा ना बारा मे सवाल?
(मत्ती 22:15-22; लुका 20:20-26)
अळतेण आहया यरुसलेम वाळा डायला पुंजारा, युहदी-धरम ह़ीकाड़न्या अने पुडार्या ईसु ने वात मे फसाड़वा करीन, थोड़ाक फरीसी दलवाळा ने अने हेरोद राजा नी पाल्टी ना माणहु ने ईसुन्तां मोकल्या। अने तीहया आवीन ईसु ने केदा, “ए मास्तर, आमु जाणीया के तु खरलो से, अने कोय नी परवाय नी करे; काहाके तु माणहु ना मोडा भणी भाळीन वात नी करे, पण भगवान नी वाट सच्चाय सी देखाड़े। ता रोमी राज ना राजा ने फाळो आपवा ताले से के नी हय? आमु फाळो आपीया के नी आपीया?”
तीमना ढोंगड़ा जाणीन ईसु तीमने केदो, “मने काहा पारखवा बाज र्या? एक कळदार सीक्को मारीन्तां लावो, ता मे तीहयो सीक्को देखीन देखाड़ही।”
अने तीहया एक सीक्को लावीन ईसु ने आप्या। अने ईसु तीमने सीक्को देखाड़ीन केदो, “सीक्का पोर कोयनो सीको अने नाम छापलु से?” तीहया केदा, “रोमी राजा नु।”
ईसु तीमने केदो, “जे रोमी राजा नु से, तीहयो हक रोमी राजा ने आपीन पुरो करो; जे भगवान नु से, तीहयो हक भगवान ने आपीन पुरो करो।” अने तीहया तीनी वात ह़मळीन घणा जबर वहराय ज्या।
मरला मे गेथा जीवता हयवा अने वेवा
(मत्ती 22:23-33; लुका 20:27-40)
अळतेण सदुकी दलवाळा, तीहया आहयु माने के माणहु मरला मे गेथा पासा जीवता नी हये, तीहया ईसुन्तां आवीन पुछ्या, तीहया केदा “ए मास्तर, मुसो आपणी जुगु लीखलो से, के कदी कोयनो भाय लाडी बणावीन वण-अवल्यात नो मर जाय, अने ता तीनो भाय तीनी रंडायली लाडी ह़ाते वेवा करीन आह़फा भाय जुगु अवल्यात पयदा करवा जोवे। एक कावा ईसम हयु; ह़ात भाय हता। आखान मोट्लो भाय वेवा करीन वण-अवल्यात नो मर ज्यो। ता तीहयी रंडायली लाडी ह़ाते बीजो भाय वेवा कर्यो; अने तीहयो बी वण-अवल्यात नो मर ज्यो; अने तीसरो भाय बी तीहयी रंडायली बयर ह़ाते वेवा करीन वण-अवल्यात नो मर ज्यो, ईसम करीन ह़ातोव भाय ईसमेत तीनी ह़ाते वेवा कर्या, अने वण-अवल्यात ना मर ज्या। अने सेल्ली कावा, तीहयी रंडायली बयर बी मर जी। एतरे आखा पासा जीवता हयहे ता तीहयी कोयनी लाडी केवायहे? तीहयी ते ह़ातोव भाय नी लाडी बणली हती।”
ईसु तीमने केदो, “तमु चोखली सास्तर ने नी ह़मजो अने भगवान नी सक्ती ने नी ओळखो। एतरे तमु भुले पड़ र्या। मरला माणहु जत्यार मरला मे गेथा जीवता हयहे ता, तीमनी मे वेवा नी हये, जीसम ह़रग मे वाळा ह़रगदुत ना बी तीमनीन तेम वेवा नी हये। मरला मे गेथा पासा जीवता हयवा ना बारा मे तमु मुसा नी कीताप मे नी भण्या ह़ु? तां ह़ारीक भगवान बी पासा जीवता हयवा नी वात ने धपत्ला कटाळ्ळा झाटवा मे मुसा नी अगळ देखाड़्यो।” अने भगवान मुसा ने आहयु केदो, “मे अब्राहम नो भगवान, अने ईसाक नो भगवान अने याकुब नो भगवान से। भगवान नी नींगा मे मुसा ना आड़ा-बुड़ा अब्राहम, ईसाक अने याकुब हमणे बी जीवत्ला से। एतरे भगवान मोट्ला माणहु नो नी हय, पण जीवत्ला माणहु नो से; तमु आहयी वात नी जाणता एतरे तमु आखा गलत से।”
आखा गेथो मोटो हुकम
(मत्ती 22:34-40; लुका 10:25-28)
युहदी-धरम ह़ीकाड़न्यो एक माणेह, सदुकी दलवाळा ईसु ह़ाते वात मे जखड़ी पड़ रेला ह़मळतो हतो ईसु तीने वारु जपाप आप्यो आहयु देखीन तीहयो ईसु ना ह़ाते आवीन तीने पुछ्यो, “भगवान ना आखा हुकम मे गेथो कानो हुकम मोट्लो से?”
ईसु तीने केदो, “आखा हुकम मे मोट्लो हुकम आहयो से, ‘ए ईस्रायल जाती ना माणहु, ह़मळो आपणो मालीक भगवान एकीत मालीक भगवान से।’ तमु आपणा मालीक भगवान ने आपणा आखा मन सी, आखा जीव सी, आखी अक्कल सी, आखी सक्ती सी मोंग कर। अने बीजो हुकम आहयो से, के तमु, तमारी आड़े-धेड़े वाळा ने आह़फान तेम मोंग करो। बीजा हुकम आहयो बे हुकम सी मोटा नी हय।”
तीहयो युहदी-धरम ह़ीकाड़न्यो ईसु ने केदो, “ए मास्तर, आहयो हुकम ह़ाचलीन नो नीव से! तु ह़ाचलीन केदो, के एकीत भगवान से अने तीने सोड़ीन कोय भगवान नी हय। अने तीहया भगवान ने आह़फा नी आखी अक्कल सी, मन, अने आखा जोर सी, अने आखा जीवे मोंग करवा, अने आपणी ह़ाते वाळा ने आह़फान तेम मोंग करवा; आहया हुकम आखा होम नी बादा चड़ाव्वा गेथो अने भेट चड़ाव्वा गेथो जादा वारु से।” 2
ईसु देख्यो के तीहयो ह़मज सी जपाप आप्यो, एतरे ईसु केदो, “तु भगवान ना राज गेथो नाम्बे नी हय।” अने अळतेण ईसु ने पारखीन पुसवा नी हीमम्त कोयनी नी हयी।
मसी दावुद नो सोरो?
(मत्ती 22:41-46; लुका 20:41-44)
अळतेण ईसु मंदीर मे ह़ीकाड़तो जाय्न आहयु केदो, “युहदी-धरम ह़ीकाड़न्या काहा केय, के मसी दावुद नी अवल्यात से?” दावुद आह़फो चोखला आत्मा सी भराय्न केदलो हतो,
भगवान मालीक, मारा मालीक मसी ने केदो,
“तु मारी जमणी धेड़े बह, जत्यार लग मे तारा वेरी ने, तारा पोग तळे नी कर देम।”
दावुद ते आह़फोत मसी ने मालीक केय, “ता मसी दावुद नी अवल्यात कीसम हय सके?” अने ईसु नी आहयी वात माणहु नो मोट्लो मेळो खुस हय्न ह़मळ र्यो हतो।
युहदी-धरम ह़ीकाड़न्या सी चेतीन रेवा
(मत्ती 23:1-36; लुका 20:45-47)
तीहयो ह़ीकाड़तो जाय्न आहयु केदो, “युहदी-धरम ह़ीकाड़न्या सी चेतीन रेवो, तीहया ते पोग मे गेथा नामब्ला लुगड़ा पेरीन फीरवा, अने हाट मे ‘वारु से के’ पुसीन तीमनी आव-भाव करवा जोवे। अने तीमना भक्तीन घोर मे खास जागा पोर बहवा अने पोरणा मे खास जागा पोर बहवा वारु गमे। तीहया रंडायला बयरा ने धोको दीन ठग लेय, अने बीजा ने देखाड़वा करीन जादा वार वीन्ती करता रेय। आहया माणहु ने डंड जादा जड़हे।”
गरीब रंडायली नु दान
(लुका 21:1-4)
अळतेण ईसु मंदीर नी दान-पेटी ना ह़ाम्बो बहीन देख र्यो हतो के माणहु दान-पेटी मे कीसम पय्हा घाल र्या, अने घणा ढेरका मालदार, ढेरका पय्हा दान-पेटी मे घाल्या। अने तां आवीन एक रंडायली बयर बे टका दान करी तीमनी कीमत घणी कम हती। तत्यार ईसु आह़फा ना चेला ने बोलावीन केदो, “मे तमने ह़ाचलीन केम मंदीर नी दान-पेटी मे दान करवा वाळा मे आहयी गरीब रंडायली आखा गेथी जादा दान करली से। काहाके आखा तीमना ढेरेत माल-धन मे गेथु दान कर्या; पण आहयी रंडायली बयर गरीब हय्न बी आह़फी नु आखु कमायलु दान आप देदी।”
Source notes (2)
- Cross-reference नेवताळा ना काम 23:8
- Cross-reference लुका 10:25-28
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.