Paliya Bible
लेव्यवेवस्था 19
चोखलापण अने वेहवार नो नेम
अळी भगवान मुसा ने केदो, ईस्रायल नी आखी मंडळी ने कीदे के तमु चोखला बणला रेवो; काहाके में तमारो भगवान चोखलो से। तमु आह़फा ना आह्य-बाहा नी बीक मानजो, अने मारा अराम ना दाड़ा ने पाळजो: में तमारो भगवान यहोवा से। तमु मुरती भणी नी फीरजो, अने देवी-देवता नी पुजा करवा करीन मुरती घड़ीन नी बणावजो; में तमारो भगवान यहोवा से। जत्यार तमु यहोवा ना लेदे मेल-मीलाप नी बादा चड़ावो, ता तीने आसम मारजो जीनी सी में तमारी सी खुस हय जाम। तीनु माह बादा करे ते दाड़े अने बीजा दाड़े खाय सके, पण तीसरा दाड़े तक जे री जाय तीने आक्ठा मे धपाड़ देवा जोवे। कदी तीनी मे गेथु कंय बी तीसरा दाड़े खाय, ता तीहयु गलत से, अने तीनी सी में खुस नी हयु। अने तीने खावा वाळो यहोवा नी चोखली चीज ने वीटळ्ळी ठेरावे, आनी लेदे तीने अधरम नो भार झेलवा पड़हे; अने एवा माणेह ने आह़फा माणहु मे गेथो खत्तम कर देहे। जत्यार तमु आह़फाम ना देस ना खेतरु वाडो ता आह़फाम ना खेतरु ने खुणे-खुणे तक पुरा नी वाडजो, अने वाडला खेतरु नी पड़ली उम्बी ने नी चुटजो। अने आह़फा नी अंगुर नी वाड़ी ना आखा अंगुर नी तोड़जो, अने अंगुर नी वाड़ी ना पड़ला अंगुर नी चुटजो; तीमने गरीब अने बीजा माणहु ना लेदे छोड़ देजो; में तमारो भगवान यहोवा से। तमु चोरी नी करजो, अने एक बीजा ने धोको नी देजो अने नी झुट मेकजो। तमु मारा नाम नी झुटी ह़ाम खाय्न आह़फा ना भगवान ना नाम ने दाग नी लगाड़जो; में यहोवा से। एक बीजा ह़ाते लुच्चाय नी करजो, अने एक बीजा ने नी लुटजो। अने दाड़क्या नी दाड़की तारी पांह आखी रात ह़वारे तक नी रेवा जोवे। बेरा ने सराप नी देजो अने आंदळा ना अगळ ठोकर नी मेकजो; अने आह़फा ना भगवान नी बीक राखजो; में यहोवा से। तमु नीयाव करो ता कोय ह़ाते गलत नी करजो; अने गरीब भणी बी नी वात करजो अने मोट्ला माणहु ना मोडा भाळीन बी वीच्यार नी करजो; एक बीजा नो नीयाव संय करजो। तमु लुच्चा बणीन आह़फा ना माणहु मे नी फीर्या करजो, अने एक बीजा ने मारवा नी योजना नी बणावजो; में यहोवा से। आह़फा ना मन मे एक बीजा पोर रीह नी राखजो; आह़फाम ना ह़ाते वाळा ने जरुड़ वडजो, नीता आसम नी हय जाय के तीना पाप नो भार तमने उचलवा पड़े। बदलो नी लेजो अने तमारा भाय-बेटा सी दुस्मनी नी करजो पण एक बीजा ने आह़फाम ने तेम मोंग करजो; में यहोवा से। तमु मारा नेम ने सदा मानजो। आह़फाम ना जानवर ने बीजी जाती ना जानवर सी गाबण नी करावजो; आह़फाम ना खेतर मे बे भाती ना बीज एक्टा नी वेरजो; अने सुती अने हीर ने भेसकीन बणावला लुगड़ा नी पेरजो। अळी कानी बयर नोकराणी हय अने तीनी ह़गाय काना अदमी ह़ाते हय जेली हय, पण तीने दाम आपीन नीता फीरी मे छोड़ावली नी हय, अने तीनी ह़ाते कानो सवसार करे, ता तीमने बेम ने डंड ते आपो, पण ते बयर ने छुट्ली नी हयवा ना कारण मोत नो डंड नी आप सकत्ला। पण तीहयो माणेह मेल-मीलाप वाळा तम्बु ना झापला पोर यहोवान्तां एक गाडरु गुना नी बादा ना लेदे ली आवे। अने पुंजारो तीना करला पाप ना कारण गुना नी बादा ना गाडरा ना लारे तीनी लेदे यहोवा ना अगळ पछतावो करे; ता तीना करला पाप माफ कर देहे। अळतेण जत्यार तमु कनान देस मे पुगीन काना भाती ना फोळ ना झाड़ लगाड़ो, ता तीना फोळ तमारी लेदे तीन साल तक खतना वगर ना ह़रका रेहे; आनी लेदे तीनी मे गेथु कंय बी नी खाजो। अने चोवथा साल मे तीमना आखा फोळ यहोवा नी बड़ाय नी भेट ना रुप मे चोखली ठेरे। ता तमु पांचवा साल मे तीना फोळ खाजो, आनी लेदे के तीनी सी तमने घणा फोळ जड़े; में तमारो भगवान यहोवा से। तमु लोय लागलु माह नी खाजो। अने जादु-टोणा नी करजो, अने वारली अने खोट्ली मुहरुत ने नी मानजो। आह़फाम ना मुंडा मे चोट्ली राखीन नी बोड़ावजो, अने डाडी ने बी नी बोड़ावजो। काना माणेह नी मोत ना कारण सी आह़फा ना डील पोर घाव नी करजो, अने नी कंय बी नी गुंदाड़जो; में यहोवा से। तमु आपणा सोर्याम ने रंडी बणाय्न वीटळ नी करजो, आसम नी हयवा जोवे के देस छीनाळा ना कारण जादा पाप सी भराय जाय। मारा अराम ना दाड़ा ने मान्या करजो, अने मारा चोखला जागा नी सदा ईज्जत करजो; में यहोवा से। दाणा देखवा वाळा अने भुत नीकाळवा वाळा भणी नी फीरजो, अने आसवा ने ह़ोदीन तीमना कारण सी वीटळी नी जजो; में तमारो भगवान यहोवा से। डायलाम नी अगळ उबा हयजो अने तीमनी ईज्जत करजो, अने खुद ना भगवान नी बीक मानजो; में यहोवा से। कदीम कोय बीजा देस वाळो तमारी ह़ाते तमारा देस मे रेय, ता तीने वेला नी पाड़जो। जे बीजा देस वाळो तमारी ह़ाते रेय तीहयो तमारी लेदे देस वाळान तेम रेहे, अने तीनी सी आह़फान तेम मोंग करजो; काहाके तमु बी मीस्र देस मे बीजा देस वाळा हता; में तमारो भगवान यहोवा से। तमु नीयाव करे ता, तोल माप करवा मे कम या जादा करीन कोयने धोको नी देजो। संय ताकड़ी, नीयाव ना बाट संय माप अने संय लीटर तमारी पांह रेय; में तमारो भगवान यहोवा से जे तमने मीस्र देस गेथो नीकाळीन ली आवलो। आनी लेदे तमु मारी आखी रीती ने अने नेमु ने मान्ता जाय्न पाळता रेवो; में यहोवा से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.