Paliya Bible
लेव्यवेवस्था 20
हुकम ने नी मानवा नो डंड
अळी भगवान मुसा ने केदो, ईस्रायली माणहु ने कीदे के ईस्रायली माणहु मे गेथा नीता ईस्रायली माणहु मे रेवा वाळो बीजा देस नो माणेह कोय बी काहा नी हय, जे आह़फा ना सोरा ने मोलेक देवता ने बादा चड़ावहे, तीने पक्का मार देहे; अने माणहु तीने दगड़ाटीन मार देहे। कदी तमारी मे गेथो कानो आह़फा ना सोरा ने मोलेक देवता ने आप देय अने चोखला जागा ने वीटाळ देय, अने मारा चोखला नाम ने बदनाम करे एवा माणेह ना वीरोद मे में हय जही अने तीने तीना माणहु मे गेथो मार नाखही। अने कदी कानो आह़फा ना सोरा ने मोलेक देवता ने चड़ावे, अने माणहु तीना बारा मे जाणीन बी तीने नी मारे, ता में खुद तीहया माणेह ना अने तीना घोराणा ना वीरोद मे हय्न तीने अने जेतरा माणहु तीनी पछळ हय्न मोलेक देवता ह़ाते छीनाळु करे तीमने आखा ने मार नाखही। अळतेण जे माणेह दाणा देखवा वाळा नीता भुत नीकाळवा वाळाम नी भणी फीरे, अने तीमनी पसळ चालीन छुनाळु करे; ता में तीमना वीरोद मे हय्न तीमने मार नाखही। आनी लेदे तमु खुद ने चोखला करो; अने चोखला बणला रेवो; काहाके में तमारो भगवान यहोवा से। अने तमु मारी रीती मानो, अने तीनो पाळण बी करजो; काहाके में तमारो चोखला करवा वाळो यहोवा भगवान से। जे कोय आह़फा ना आय्ह-बाहा ने सराप देहे तीने पक्को मार देहे; तीहयो आह़फा ना बाह ने अने आय्ह ने सराप देदलो से खुद नी मोत नो खुद जीम्मेदार से। कदी कानो बीजा नी बयर ह़ाते छीनाळु करे, ता तीने अने ते बयर बेम ने पक्का मार देय। कदी कानो बाह नी लाडी ह़ाते ह़ुवे ता तीहयो आह़फा ना बाह नु डील उगाड़वा वाळो ठेरहे; आनी लेदे तीमने बेम ने मार देय, अने तीमनी मोत नो जीम्मेदार खुद से। कदी कानो माणेह आह़फा नी ववेह ह़ाते ह़ुवे ता तीमने बेम ने मार देय; काहाके तीहया उलटु काम करवा वाळा ठेरहे, तीमना मोत ना जीम्मेदार खुद रेहे। कदी कानो माणेह बयर ह़ाते ह़ुवे तेम अदमी ह़ाते ह़ुवे, ता बेम गलत काम करन्या ठेरहे; आनी लेदे बेम ने मार देहे, तीमनी मोत ना जीम्मेदार खुद रेहे। कदी कानो आह़फा नी लाडी ने अने ह़ाहु ने बेम ने राखे ता आहयो घणो मोटो पाप से; आनी लेदे तीहयो माणेह अने तीहया बयरा तीनोव ने आक्ठा मे धपाड़ देय, जीनी सी तमारी वचमे घणा मोटा पाप नी हये। कदी कानो माणेह जानवर ह़ाते घीनोनु काम करे; ता तीने अने जानवर ने बेम ने मार देय। कदी कानी बयर जानवर ह़ाते घीनोनु काम करे ता तीने अने जानवर ने मार देय, तीमनी मोत ना जीम्मेदार खुद रेहे। कदी कोय आह़फा नी बेनेह नीता ह़ेवतर्याण बेनेह नु नांगरलु डील देखे, अने तीनी बेनेह बी तीनु नांगरलु डील देखे, ता आहयी लाज आवे एवी वात से, आमने बेम ने आह़फाम ना माणहु अगळ मार नाखवा जोवे; काहाके जे आह़फा नी बेनेह नु डील उगाड़न्यो ठेरहे; तीने खुद ने गलत काम नो भार झेलवा पड़हे। कदी कानो अदमी नावती-धोवती बयर ह़ाते ह़ुवे, ता तीमने बेम ने आह़फा ना माणहु मे गेथा अलग कर देवा जोवे; काहाके तीहया वीटळवा ना नेम ने तोड़ देदला से। आह़फा नी जीजी नीता फोय ह़ाते सवसार नी करजे काहाके आसम करहे ता आह़फा ना ह़गाय वाळा नी नामबद्दी करे; आनी लेदे तीमने बेम ने आनो भार झेलवा पड़हे। कदी कोय आह़फा नी काकी ह़ाते ह़ुवे ता तीहयो आह़फा ना काका नु डील उगाड़वा वाळो ठेरहे; आनी लेदे तीहया बेम आह़फाम ना पाप नो भार झेलता जाय्न वांज्यात मर जहे। कदी कोय आह़फा नी भाबी ने राखे ता तीहयो आह़फा ना भाय नु डील उगाड़वा वाळो ठेरहे; आनी लेदे तीहया बेम जणा वांज्यात रेहे। तमु मारी आखी रीती अने नेम ने पाळजो; अने तीमने ह़मज भेळ मानजो जीनी सी तीहया देस मे जां में तमने लाय र्यो, तमने नीकाळ नी सके। तमु तां रेवा वाळा माणहु नी रीती-रीवाज ने नी मानजो; में तीमने बारा नीकाळ र्यो काहाके तमु जागा मे जाय सको तीमना आखा बुरा काम सी मने तीमनी सी नफरत हय जी। पण में तमने केम के तमारो तीमनी जागा पोर हक रेहे, अने में आहया देस ने जीनी मे दुद अने मोद ना झोर वये तमारा हक मे कर देही; में तमारो यहोवा भगवान से जे तमने बीजा देस ना माणहु सी अलग करलो से। आनी लेदे तमु वीटळ्ळा अने चोखला जानवरु मे, अने वीटळ्ळा अने चोखला चड़ा मे फरक राखजो; अने जानवर नीता चड़ा नीता कानी भाती ना भोयमे घीहाय्न चालन्या जीव कानो बी काहा नी हय जीने वीटळ्ळा ठेरावलो से, तीने तमु खुद चोखला नी करजो। तमु मारी लेदे चोखला बणीन रेजो; काहाके में यहोवा भगवान चोखलो से, अने में तमने अने देस ना माणहु ने आनी लेदे अलग करलो से के तमु सदा मारा बणला रेवो। “कदी कानो अदमी नीता बयर दाणा देखवा वाळा नीता भुत ने माने ता तीमने पक्का मार नाखे; तीमने दगड़ाटवा जोवे, अने तीमनी मोत ना जीम्मेदार खुद रेहे।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.