Paliya Bible
लेव्यवेवस्था 21
पुंजारा नु चोखलुपणु
अळी भगवान मुसा ने केदो, हारुन ना सोरा जे पुंजारा से तीमने कीदे के तमारा माणहु मे गेथा कोय बी मरे, ता तीना कारण सी तमु तमारी मे गेथा कोय बी खुद ने वीटळ्ळो नी करे; आह़फा नी सग्गी आय्ह नीता बाह, नीता सोरो, नीता सोरी, नीता भाय ना लेदे, अने खुद नी कुवारली बेनेह जीना वेवा नी हया हय, जीनो घोर वाळो नी हय; जीमनो ह़ाते नो रीस्तो हय; तीमनी लेदे खुद ने वीटळ कर सके। पण पुंजारो हयवान नाते तीहयो आह़फा ना माणहु मे मुख्यो से, करीन खुद ने आसम वीटळ नी करे के तीहयो वीटळी जाय। तीहयो नी मुंडु बोड़ाव्वा जोवे, अने डाडी नी कलम नी बोड़ाव्वा जोवे, अने नी डील मे घाव करवा जोवे। तीहयो आह़फा ना भगवान ना लेदे चोखलो बणीन रेवा जोवे, अने आह़फा ना भगवान नु नाम वीटळ्ळु नी करे; तीहयो यहोवा ने जे भगवान नु खाणु से, चड़ाया करे; करीन तीहयो चोखलो रेय। तीहयो रंडी नीता खोटली बयर ह़ाते वेवा नी करवा जोवे; अने नी छोड़ली बयर ह़ाते वेवा करे; काहाके पुंजारो आह़फा ना भगवान ना लेदे चोखलो रेय। आनी लेदे तमु पुंजारा ने चोखला जाणजो, काहाके तीहयो तमारा भगवान ने खाणु चड़ाया करे; आनी लेदे तीहयो तारी नींगा मे चोखलो ठेरे; काहाके में यहोवा भगवान तमने चोखला करु, अने चोखलो से। अने कदी पुंजारो नी सोरी रंडी बणीन खुद ने वीटाळ लेय ता तीहयी आह़फी ना बाह ने वीटाळ देय; तीने आक्ठु मे धपाड़ देवा जोवे। “जे आह़फा ना भायु मे मोट्लो पुंजारो हय, जीना मुंडा पोर अभीसेक नु तेल नाखलु हय, अने जीने चोखला लुगड़ा पेरवा टाळलो हय, तीहयो आह़फा ना मुंडा ना नीम्बाळा ने वेरवायवा नी देय अने मोत नो दुख देखाड़वा नी लेदे आह़फा ना लुगड़ा नी फाड़े। अने तीहयो नी काना धोड़ ह़ाते जवा जोवे, अने आह़फा ना आय्ह-बाहा ना कारण नी खुद ने वीटाळवा जोवे; अने तीहयो चोखला जागा मे गेथो बारो बी नी नीकळवा जोवे, अने भगवान ना चोखला जागा ने वीटळ्ळो नी ठेरावजे; काहाके तीहयो आह़फा ना भगवान नु अभीसेक नु तेलरुपी मुकुट पेरलो से; में यहोवा भगवान से। अने तीहयो कुवारली सोरी सीत वेवा करवा जोवे। तीहयो रंडायली, छोड़ली, खोटली नीता रंडी ह़ाते वेवा नी करे, तीहयो आह़फा नात माणहु मे कानी कुवारली सोरी ह़ाते वेवा करे। अने तीहयो आह़फा नी अवल्यात ने तीना माणहु मे नी वीटाळे; काहाके में तीमनो चोखा करवा वाळो भगवान से।” अळी भगवान मुसा ने केदो, “हारुन ने कीदे के तारी अवल्यात मे पीड़ी सी पीड़ी तक जे कोय नो गुनो हय ता तीहयो आह़फा ना भगवान ने खाणु चड़ाव्वा करीन ह़ाते नी आवे। कोय बी काहा नी हय जीनी मे गुनो हय तीहयो ह़ाते नी आवे, तीहयो भले आंदळो हय, भले लंगड़ो हय, भले नकटो हय, भले जादा अंग वाळो हय, नीता तीहयो हातु-पोगु सी लुल्लो हय, नीता तीहयो कुबड़ो, नीता ठींगणो हय, नीता तीना डोळा मे खोट हय, नीता ते माणेह ने खुजळी हय, नीता कुकळाआंड्यो हय; हारुन पुंजारा नी अवल्यात मे कोयने बी कंय बी खोट हय तीहयो भगवान चड़ावो चड़ाव्वा ह़ाते नी आव्वा जोवे, तीहयो खोट वाळो से कदी बी भगवान ने खाणु चड़ाव्वा नी आवे। तीहयो भगवान नु चोखलु खाणु अने चड़ावली चीज खाय सकत्लो, पण तीहयो खोटलो हयवा ना कारण सी वचे वाळा पड़दा मे नी आव्वा जोवे अने नी वेदी ह़ाते जवा जोवे, जीनी सी आसम नी हय के तीहयो मारा चोखला जागा ने वीटाळ देय; काहाके में तीमने चोखा करवा वाळो यहोवा से।” आनी लेदे मुसो हारुन ने अने तीना सोरा ने अने आखा ईस्रायली माणहु ने आहयी वात कीन ह़मळायो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.