Paliya Bible
लेव्यवेवस्था 22
चड़ावा नु चोखलुपणु
अळी यहोवा मुसा ने केदो, “हारुन अने तीना सोरा ने कीदे के ईस्रायली माणहु नी चोखी करली चीजु गेथा जीने तीहया मारी लेदे चोखी करला से अलग रेय, अने मारा चोखला नाम ने वीटाळजो नी; में यहोवा भगवान से। अने तीमने कीदे के तमारी पीड़ी सी पीड़ी मे कानी बी अवल्यात वीटळ्ळी हय तीहयी चोखी करली चीज ने तां जाय, जीने ईस्रायली यहोवा भगवान ना लेदे चोखली करे, तीहया माणेह ने मारी अगळ गेथु खत्तम कर देहे, मे यहोवा भगवान से। हारुन ना घोराणा नो कोय काहा नी हय जे कुड़ावो हय, नीता सराव रोग वाळो हय, तीहयो माणेह जत्यार तक चोखलो नी हय जाय, तांह लग चोखी करली चीज मे गेथु कंय बी नी खावा जोवे। जे मोत ना कारण मोयाळ्ळो हयो हय नीता पाणी जवा सी वीटळ्ळो हय, एवा माणेह ने जे कोय छीमे, नीता काना वीटळ्ळा घीहाय्न चालन्या जीव-जन्तु ने नीता काना माणेह ने छीमे जीनी वीटळ सी माणहु वीटळ सकत्ला, ता तीहयो माणेह आमनी मे कानी बी चीज ने छीमे तीहयो ह़ांतो तक वीटळ्ळो रेहे, अने जत्यार तक पाणी सी उंगळी नी लेय तां तक चोखली चीज मे कंय बी नी खावा जोवे। दाहड़ु बुड जहे ता तीहयो चोखलो हय जहे; ता तीहयो चोखली चीज मे गेथु खाय सकहे, काहाके तीनु खाणु तीहयुत से। जे जानवर आह़फुत मर जेलु हय नीता कानु बी जानवर मारलु हय तीने खाय्न खुद ने नी वीटाळ्वा जोवे; में यहोवा से। आनी लेदे पुंजारा माणहु मारी ह़ोपली चीज नो नेम पाळे, आसम नी हयवा जोवे के तीहया तीने वीटळ्ळी करीन पाप नो भार उचले, अने तीना कारण सी मरी बी जाय; में तीमनो चोखा करवा वाळो यहोवा से। बीजो माणेह कानी चोखली चीज ने नी खावा जोवे, भले तीहयो पुंजारान्तां अंजाणलो आय र्यो हय नीता दाड़क्यो हय, ते बी तीहयो कानी चोखली चीज ने नी खाय। कदी पुंजारो काना माणेह ने रुप्या आपीन वेचातो लेदलो हय, ता तीहयो माणेह तीनी मे गेथु खाय सके; अने जे पुंजारा ना घोर पयदा हयला हय तीहया बी तीनु खाणु मे गेथु खाय सके। कदी पुंजारा नी सोरी ना वेवा काना बीजा कुळ ना माणेह ह़ाते हय जाय, ता तीहयी भेट करली चोखली चीज नी खाय सके। पण पुंजारा नी सोरी रंडायली नीता छोड़ली हय, अने तीना सोरा नी हय, छड़ला सोरान तेम बाह ना घोर मे री, री हय, ता तीहयी तीना बाह नु खाणु मे गेथु खाय सके; पण बीजा कुळ नु कोय तीनी मे गेथु नी खाय सके। अने कदी कानो माणेह कानी चोखली चीज ने भुल सी खाय लेय, ता तीहयो तीनो पांचवो वाटो बड़ाय्न तीने पुंजारा ने आप देय। ईस्रायली माणहु चोखली करली चीज ने जीने तीहया यहोवा लेदे चड़ावला से तीने वीटाळवा नी जोवे। तीहया चोखली चीज मे गेथु तीमने खवाड़ीन पाप ना गुना नो भार नी उचलाड़े; में तीमनो चोखला करवा वाळो यहोवा से। अळी यहोवा भगवान मुसा ने केदो, हारुन अने तीना सोरा ने अने ईस्रायली माणहु ने कीदे के ईस्रायली हय नीता ईस्रायल मे बीजा देस ना रेवा वाळा कोय काहा नी हय मान-बादा नीता मरजी सी चड़ावली बादा चड़ाव्वा ना लेदे यहोवा भगवान ने होम नी बादा नु जानवर मारीन चड़ावे। तीने अवरवा लायक ठेराव्वा नी लेदे तमु वण-गुनाळ्ळो बोळद्यो नीता गाडरो नीता बोकड़ो चड़ाव्वा जोवे। जे जानवर मे कंय बी खोट हय तीने नी चड़ावजो, काहाके भगवान तीने नी अवरे। कदी कानो माणेह यहोवा ने मेल-मीलाप नी बादा नीता मरजी सी बादा चड़ावे, ता पाळन्या जानवर, नीता गाडरा नीता, बोकड़ा मे गेथा अवरवा नी लायक खामी वगर नु जानवर रेवा जोवे। आंदळु, पोगे भागलु, नीता लुल्लु हय, नीता फोड़ा वाळु हय, नीता खुजळी हय एवा जानवर ने यहोवा भगवान नी चड़ावजो, तीमने यहोवा भगवान ना लेदे वेदी पोर नी चड़ावजो। जे कंय बोळद्या नो नीता गाडरा नो नीता बोकड़ा नो अंग नानो-मोटो हय या जादा-कम हय एवा जानवर ने खुसी सी चड़ाय सकत्ला पण मान-बादा पुरी करवा ना लेदे तीहयु अवरवा लायक नी हय। आवा जानवर ने यहोवा भगवान ने नी चड़ावजो जीने कुटाड़ला हय, नीता टुटला हय, नीता वडायला हय, अने आह़फा ना देस मे बी नी चड़ावजो। काना बीजा देस वाळा पांह जानवर लीन तमु आपणा भगवान ने नी चड़ावजो काहाके एवा जानवर ने गुनाळ्ळा माने, आनी लेदे तीने नी आवरे।” अळी यहोवा भगवान मुसा ने केदो, जत्यार वाछड़ु नीता गाडरु नीता बोकड़ी नु बच्चु पयदा हयलु हय, ता तीहयु ह़ात दाड़ा लग आपणी आय्ह ह़ाते रेहे; अळतेण आंठवा दाड़ा बाद तीहयु यहोवा भगवान ने चड़ाव्वा अने आवरवा लायक ठेरहे। तमु गाय नीता गाडरी नीता बोकड़ी ने अने तीमना बच्चा ने एकीत दाड़े नी मारजो अने जत्यार तमु यहोवा भगवान ना लेदे बड़ाय नी बादा जानवर मारीन चड़ावो, ता तीने आहयी रीते करवा जोवे के तीने अवरवा लायक ठेरे। तीने तीहयात दाड़े खाय जवा जोवे, तीनी मे गेथु कंय बी ह़वारे तक नी रेवा जोवे; में यहोवा भगवान से। आनी लेदे तमु मारा हुकम ने मानजो अने तीमनो पाळण करजो; में यहोवा भगवान से। अने मारा चोखला नाम ने वीटाळजो नी, काहाके में ईस्रायली माणहु ना वच मे पक्को चोखलो मनायही; काहाके में तमारो चोखा करन्यो यहोवा से, तमारो भगवान हयवा ना नाते में तमने मीस्र देस गेथो छोड़ाय लायो, में यहोवा से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.