Paliya Bible
लेव्यवेवस्था 23
तीवारु नो नेम
अळी यहोवा भगवान मुसा ने केदो, ईस्रायली माणहु ने आहयु कीदे के यहोवा ना तीवार जीमने तमने चोखली सबा एक्ठी करवा ना लेदे टाकली टेम पोर परच्यार करवा पड़हे, मारा आहया तीवार से। छोव दाड़ा काम-काज करजो पण ह़ातवो दाड़ो अराम नो अने चोखली सबा नो दाड़ो से; ते दाड़े कंय बी काम-काज नी करवा जोवे; तीहयो तमारा आखा घोरु मे यहोवा भगवान ना लेदे अराम नो दाड़ो ठेरे।
तीवार अने वगर खमीर रोट्ला नो तीवार
यहोवा भगवान नी ठेरावली टेम मे तीवार ने वाळवा करीन चोखली सबा भेळी करवा करीन परच्यार करवा पड़हे; तीहया आहया से। पेल्ना मयना ना चोवदवा दाड़े ह़ांतली टेम यहोवा भगवान नो तीवार हया करे। अने तीहयात मयना ना पंदरवा दाड़े यहोवा भगवान ना लेदे खमीर वगर ना रोट्ला नो तीवार हया करे; तीनी मे तमु ह़ात दाड़ा तक खमीर वगर ना रोट्ला खाया करजो। तीमनी मे गेथा पेल्ना दाड़े तमारी चोखली सबा हये; अने तीहया दाड़े कानु बी मेहनत नु काम नी करजो। पण ह़ातोव दाड़ा तमु यहोवा भगवान ने चड़ावो चड़ाया करजो; अने ह़ातवा दाड़े चोखली सबा हये; ते दाड़े मेहनत नु कानु बी काम नी करजो। अळी यहोवा भगवान मुसा ने केदो, ईस्रायली माणहु ने कीदे के जत्यार तमु तीहया देस मे जावो जे यहोवा भगवान तमने आपे अने तीनी मे गेथा तमु फसल वाडो ता फसल ना फोळ नो पेल्नो पुळो पुंजारान्तां लाया करजो; अने पुंजारो तीहया पुळा ने यहोवा भगवान ना लेदे खास भेट करीन चड़ावे, काहाके तीहयो तमने अवरी लेय, पुंजारो तीने अराम ना बीजा दाड़े चड़ावे। जे दाड़े तमु अन नी बादा चड़ावो, तीहयात दाड़े होम नी बादा ना रुप मे एक साल नु वण-गुनाळ्ळु गाडरु ने मारीन यहोवा नी लेदे चड़ावजो। अने तीनी ह़ाते अन नी बादा मे जेतुन नु तेल अने बे कीलो मयदो भेसकीन भगवान नी लेदे वारु गंदायवा नी लेदे हवन ना रुप मे चड़ावे; अने तीनी ह़ाते रेचव्वा नी बादा नी लेदे बे लीटर अंगुर नो माणलो रोह चड़ावे। अने जत्यार तक तमु आहया चड़ावा ने आपणा भगवान ने तां नी ली जावो, तीहया दाड़े तक नवला खेतर मे गेथु नी ते रोट्लो खाजो, नी ते भुंजलु अन अने नी लील्ली उम्बी खाजो; आहयी तमारा आखा घोराणा मे तमारी पीड़ी-पीड़ी मे सदा नो नेम ठेरे।
वाडणी नो तीवार
तमु अराम ना दाड़ा ना बीजा दाड़े गेथा मतलब जे दाड़े तमु हीलाव्वा वाळी भेट ना पुळा लावहु, तीहया दाड़े गेथा पुरा ह़ात अराम ना दाड़ा गीण लेजो; ह़ातवा अराम ना दाड़ा ना बीजा दाड़े तक पचाह दाड़ा गीणजो, पचासवा दाड़े यहोवा ना लेदे नवली अन नी बादा चड़ावजो। तमु आह़फाम ना घोरु मे गेथा बे कीलो मयदा ना बे रोट्ला हीलाव्वा नी बादा ना लेदे ली आवजो; तीमने खमीर नी ह़ाते रांदे, अने यहोवा नी लेदे पेल्नी मेर ठेरे। अने तीहया रोट्ला ह़ाते एक-एक साल ना ह़ात वण-गुनाळ्ळा गाडरा ना बच्चा, अने बे गाडरा चड़ावजो; तीहया आपणी-आपणी ह़ाते अन नी बादा अने रेचव्वा नु भेळ यहोवा ना लेदे होम नी बादान तेम चड़ावजो, मतलब तीहयु यहोवा ना लेदे सुक लायक वारु गंदायवा वाळु हवन ठेरे। अळी पाप नी बादा ना लेदे एक बोकड़ो, अने मेल-मीलाप नी बादा ना लेदे एक-एक साल ना बे गाडरा ना बच्चा चड़ावजो। ता पुंजारो तीमने पेल्नी मेर ना रोट्ला भेळ यहोवा ना सामने हीलाव्वा नी भेट ना लेदे हीलावो, अने आहया रोट्ला ह़ाते तीहया बे गाडरा ना बच्चा ने बी हीलावो; तीहया यहोवा ना लेदे चोखला अने पुंजारो नो वाटो ठेरे। अने तमु तीहयात दाड़े आसम परच्यार करजो के आज अमारी चोखली सबा हयहे; अने मेहनत नु कोय काम नी करजो; आहयी तमारा आखा घोराणा मे तमारी पीड़ी-पीड़ी मे सदा नी रीती ठेरे। जत्यार तमु तमारा देस ना खेतरु नी मेर वाडो, ता तमारा खेतर ना खुणा ने पुरा नी वाडजो, अने खेतर मे पड़ली उम्बी ने बी नी चुटजो; तीने गरीब अने बीजा देस वाळा जुगु छोड़ देजो, में तमारो भगवान यहोवा से।
नवला साल नो तीवार
अळी यहोवा भगवान मुसा ने केदो, “ईस्रायली माणहु ने कीदे के ह़ातवा मयना ना पेल्ना दाड़ा ने तमु खास अराम नो दाड़ो मानजो; अने जत्यार फेपार्यु वागे ता एक चोखली सबा ना लेदे भेळा हय जजो। तीहया दाड़े तमु मेहनत नु कंय बी काम-काज नी करजो, अने यहोवा भगवान ने अन नी बादा चड़ावजो।”
पछतावा नो दाड़ो
अळी यहोवा भगवान मुसा ने केदो, “ह़ातवा मयना ना दसवा दाड़ा ने पछतावा नो दाड़ो मानजो; तीहयो तमारी चोखली सबा नो दाड़ो रेहे, अने ते दाड़े तमु उपाह राखजो अने यहोवा भगवान ने अन नी बादा चड़ावजो। तीहया दाड़े तमु कानु बी काम-काज नी करजो; काहाके तीहयो पछतावो करवा नो दाड़ो टाक मेक्यो तीनी मे तमारा भगवान यहोवा ना सामने तमारी लेदे पछतावो करहे। आनी लेदे तीहया दाड़े जे माणेह उपाह रीन आह़फा ने दुख नी देय तीने आपणा माणहु मे गेथो खत्तम कर देहे। अने जे माणेह तीहया दाड़े काम-काज करहे तीहया माणेह ने में तीना माणहु ना वचमे गेथो खत्तम कर नाखही। तमु कानु बी काम-काज नी करजो; आहयी तमारी पीड़ी-पीड़ी मे तमारा घोराणा मे सदा नी रीती ठेरहे। तीहयो दाड़ो तमारी लेदे अराम दाड़ो हये, तीनी मे तमु आपणा-आपणा जीव ने दुख देजो; अने तीहया मयना ना नव्वा दाड़े ह़ांतु गेथा लगाड़ीन बीजा दाड़े ह़ांतु तक अराम नो दाड़ो मान्जो।”
छापरी नो तीवार
अळी यहोवा मुसा ने केदो, ईस्रायली माणहु ने कीदे के आहयात ह़ातवा मयना ना पंदरवा दाड़े सी लगाड़ीन ह़ात दाड़ा तक यहोवा ना लेदे छापर्या नो तीवार रीया करे। पेल्ना दाड़े चोखली सबा हये; तीनी मे मेहनत नु कोय काम नी करजो। ह़ात दाड़ा तक यहोवा ना लेदे हवन चड़ाया करजो, अळतेण आंठवा दाड़े तमारी चोखली सबा हये, अने यहोवा ना लेदे हवन चड़ावजो; तीहयो दाड़ो मोट्ली सबा नो दाड़ो से, तीनी मे कोय बी काम-काज नी करजो। यहोवा नो टकायलो तीवार आहयात से, आनी मे तमु यहोवा ने बादा चड़ावजो मतलब होम नी बादा, अन नी भेट, मेळ नी बादा अने रेचव्वा नी बादा आखु ने आपणी-आपणी टकायली टेमे चड़ाया करो अने चोखली सबा नो परचार करजो। आहया आखु सी जादा यहोवा ना अराम ना दाड़ा ने मान्जो अने आपणी आखी भेटु ने अने आखी बादा ने अने आखी मान-बादा ने, अने मरजी नी बादा ने जे यहोवा ने ह़ोपीन चड़ाया करजो। अळी ह़ातवा मयना ना पंदरवा दाड़े, जत्यार तमु खेतरु नी मेर ने एकठी कर लेवो, ता ह़ात दाड़ा तक यहोवा नो तीवार वाळजो; पेल्नो दाड़ो खास अराम नो दाड़ो अने आंठवा दाड़े अराम करजो। अने पेल्ना दाड़े तमु वारु-वारु झाड़का ना फोळ, अने खजुर ना डाळ्या, अने छवायला झाड़का नी डाळ्या अने खुदरा मेना मजनु झाड़ नी डाळ्या लीन आपणा भगवान यहोवा ना सामने ह़ात दाड़ा तक खुसी मनावजो। हर साल ह़ात दाड़ा तक यहोवा ना लेदे आहया तीवार वाळ्या करजो; आहयी तमारी पीड़ी-पीड़ी मे तमारा घोराणा मे सदा नी रीती ठेरहे के ह़ातवा मयना मे आहया तीवार ने वाळ्या करे। ह़ात दाड़ा तक तमु छापर्या मे रीया करजो, मतलब जेतरा बी पयदा सी ईस्रायल ना हय तीहया आखा छापर्या मे रेजो, आनी लेदे के तमारी पीड़ी-पीड़ी ना माणहु जाणे के जत्यार यहोवा आमने ईस्रायली माणहु ने मीस्र देस गेथा नीकाळीन लावतो हतो ता तीहयो तीमने छापर्या मे राखलो हतो; में तमारो भगवान यहोवा से। अने मुसो बी ईस्रायली माणहु ने यहोवा ना खास तीवार ना दाड़ा ना बारा मे देखाड़्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.