Paliya Bible
लेव्यवेवस्था 24
चोखला दीवा ने ह़जाड़णु
(नीरगमन 27:20,21)
अळी भगवान मुसा ने केदो, ईस्रायली माणहु ने कीदे के मारीन्तां वीजाळु करवा ना लेदे कुटीन नीकाळ्ळु जेतुन नु वारलु तेल ली आवे जीनी सी एक दीवो धपतो रेय। हारुन तीने मेक-मीलाप वाळा तम्बु मे, गवा नी चीट्ठी ना बाक्सा ना वचे वाळा पड़दान बाहर, भगवान ना अगळ ह़ांतो गेथो ह़वारे तक ह़जाड़ीन राखे; आहयो तमारी पीड़ी-पीड़ी नी लेदे सदा नो नेम रेहे। तीहयो दीवा ने चोखला दीवो मेलवा ना जागा पोर भगवान अगळ ह़जाड़ीन राखहे।
भेट ना रोट्ला
तु मयदो लीन बारे रोट्ला चुड़ावजे, आखा रोट्ला बे कीला मयदा ना बणावे। ता तमु तीनी बे हालर बणाय्न, एक-एक हालर मे छोव-छोव रोट्ला चोखली टेबल पोर भगवान अगळ मेकजो। अने एक-एक हालर पोर चोखला लोबान मेकजो तीहयु रोट्ला भेळ फोम कराव्वा नो भाग बणीन भगवान ना लेदे वारु रेय। हारुन अराम ना दाड़ा डीट तीने भगवान अगळ हालर सी मेक्या करे, आहयी सदा ना वायदा नी रीती ईस्रायली माणहु भणी गेथी हया करे। अने आहया रोट्ला हारुन अने तीना सोरा ना रेहे, अने तीहया तीने काना चोखला जागा मे खाय, काहाके तीहया भगवान ने चड़ावला मे गेथा सदा नी रीती ना लारे हारुन ना लेदे चोखली चीज ठेरला से।
भगवान नो वाक काडवा नो डंड
एक कावा कानी ईस्रायली बयर नो सोरो, जीनो बाह मीस्र देस नो रेण्यो हतो, तीहयो ईस्रायली माणहुन्तां ज्यो; अने तीहयी ईस्रायली बयर नो सोरो अने एक ईस्रायली माणेह पड़ावा मे झुमायवा बाज ज्या। अने तीहयी ईस्रायली बयर नो सोरो भगवान ना नाम ने बुरु-भलु कीन गलत-सलत केदो। आहयु ह़मळीन माणहु तीने मुसा ना अगळ ली ज्या। तीनी आय्ह नु नाम सलोमीत हतु, तीहयी दान जाती नी दीबरी नी सोरी हती। तीहया तीने जेल मे बंद कर देदा, आनीन करते के यहोवा नु मन तीमनी पोर उजन्तु हय सके। ता भगवान मुसा ने केदो, तमु सराप देवा वाळा माणेह ने पड़ावा मे गेथो बारो ली जावो; अने जेतरा बी तीने बुरु-भलु केतले ह़मळ्या हय तीहया आखा आपणा-आपणा हात तीना मुंडा पोर मेके, अने आखी मंडळी ना माणहु तीने दगड़ाटवा जोवे। अने तु ईस्रायली माणहु ने कीदे के भगवान ने सराप देण्यो कोय बी काहा नी हय तीने तीना पाप नो भार झेलवा पड़हे। भगवान ना नाम ने बुरु-भलु केण्या ने मार देहे; आखी मंडळी ना माणहु तीने दगड़ाटीन मारे; तीहयो भले देस वाळो हय के बीजा देस वाळो हय, जे कोय भगवान ने बुरु-भलु केय तीने मार नाखो। जे माणेह काना माणेह ने मार नाखे, तीने मोत नो डंड आपे, जे कोय काना पाळ्ळा जानवर ने मार नाखे तीहयो तीने भर देय, जानवर ना बदला मे जानवर आप देय। “अळी कदी कानो काना बीजा माणेह ने चोट लगाड़े, ता तीनी ह़ाते बी तेमेत करे। अने डील ने तोड़-फोड़ ना बदले डील ने तोड़े-फोड़े, डोळा ना बदले डोळा, दात ना बदले दात, जेवी चोट कोयने लगाड़े तेवीत चोट तीने बी लगाड़ो। जानवर ने मारवा वाळो तीने भर देय, पण माणेह ने मारवा वाळा ने मार नाखवा जोवे। तमारो नेम एकीत रेवा जोवे, जीसम जागे देस जुगु रेय तेमेत बीजा देस वाळा जुगु बी रेवा जोवे; में तमारो भगवान यहोवा से।” मुसो ईस्रायली माणहु ने आहयु ह़मजाड़्यो; ता तीहया ते सराप देण्या ने पड़ावा गेथो बारो ली जाय्न तीने दगड़ाट्या। अने ईस्रायली माणहु तेमेत कर्या जीसम भगवान मुसा ने हुकम आपलो हतो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.