Paliya Bible
लेव्यवेवस्था 25
ह़ातवो साल: अराम ना दाड़ा नो साल
(वेवस्थावीवरन 15:1-11)
अळी भगवान सीने बड़ा पोर मुसा ने केदो, ईस्रायली माणहु ने कीदे के जे देस में तमने आपु, तां तमु जहु ता तीहया देस नी जागा बी भगवान ना लेदे अराम करहे। छोव साल तक ते आपणा-आपणा खेतरु मे वेर्या करजो, अने छोव साल तक अंगुर नी वाड़ी ने काट-छाट करीन फोळ एक्ठा करजो; पण ह़ातवा साल मालीक नो अराम नो साल रेहे अने जागा ने बी अराम जड़हे; ते साल तमु नी वेरजो अने नी अंगुर नी वाड़ी ने काट-छाट करजो। जे कंय वाडला खेतर मे ह़ेंजलु उगे तीने नी वाडजो, अने नी अंगुर नी वाड़ी ने काट-छाट करजो अने नी तीना फोळ तोड़जो; काहाके तीहयो जागा ना लेदे घणो मोटो अराम नो साल रेहे। पण जागो अराम ना साल मे बी तमारी जुगु अने तमारा नोकर-नोकराणी जुगु अने तमारी ह़ाते रेण्या दाड़क्या जुगु अने बीजा देस ना माणहु ने फोळ खवाड़हे। अने तमारा जानवरु जुगु अने देस मे जेतरा बी जीव-जन्तु हय तीमनु बी खाणु जागा ना पाक सी हयहे।
अळी नवलु बणाव्वा नो साल
ह़ात अराम ना साल ने ह़ात गुणा करजो ता अराम ना साल नी टेम उनपचाह साल हयहे। ता तमु ह़ातवा मयना ना ह़ातवा दाड़े, पछतावा ना दाड़े, तमु जीक नु फेपार्यु देस ना आखा जागे वगाड़जो। तमु पचासवा साल ने चोखलो मानजो, अने देस ना आखा रेवासी ना लेदे छुटकारा नु परच्यार करजो; तीहयो साल तमारीन्तां जुबली1 नो साल केवायहे; तीनी मे तमु आपणी-आपणी खुद नी जागा मे अने आपणा-आपणा घोराणा मे पासा जत रेहु। तमारीन्तां तीहयु पचासवु साल जुबली नु साल केवायहे; तीहया साल मे तमु नी बीज वेरजो, अने आह़फी उगली फसल ने बी नी वाडजो, अने नी बीना छाट्ला वेला ना अंगुर तोड़जो। काहाके तीहयो जे जुबली नो साल हयहे; तीहयो तमारी लेदे चोखलो हयहे; तमु खेतर नी मेर मे गेथात लीन खाजो। आहया जुबली ना साल मे तमु आपणी-आपणी खुद नी जागा मे जत रेहु। अने कदी तमु आपणा भाय-बेन्या ने कंय वेचो नीता आपणा भाय-बेन्या पांह गेथु कंय वेचातु लेवो, ता तमु एक-बीजा ने ठगजो नी। जुबली ना साल मे जेतरा साल वीत ज्या तीमनी गीनती ना हीसाब सी कीमत ठेराय्न एक बीजा सी वेचाता लेजो, अने बचला सालु नी मेर ना हीसाब सी तीहयी तमने वेचहे। जेतरा साल अळी रेय तेतरीत कीमत बड़ावजो, अने जेतरा साल कम रेय तेतरीत कीमत घटाड़जो, काहाके साल नी मेर जेतरी हहे तेतरी तीहयी तने वेचहे। तमु आपणा-आपणा भाय-बंद्या नु नुकसान नी करजो आपणा भगवान नी बीक मान्जो; में तमारो भगवान यहोवा से।
ह़ातवा साल नी वेला
आनी लेदे तमु मारी रीती ने मान्जो, अने मारा नेमु पोर सोची-समजीन चालजो; काहाके आसम करवा सी तमु तीहया देस मे बीह्या-वगर वही रेहु। जागा मेर पकाड़्या करहे, अने तमु पेट भरीन खाया करहु, अने तीहया देस मे बीह्या-वगर वही रेहु। अने कदी तमु केहु के ह़ातवा साल मे आमु नी ते वेर्या अने नी आपणा खेतर नी मेर एक्ठी करया? ता आमु खाहु ह़ु? ता जाणो के में तमने छटवा साल मे एवी बरकत आपही, के जागा नी मेर तीन साल तक काम आवहे। तमु आंठवा साल मे वेरहु, अने पुराणी मेर मे गेथा खाता रेहु, अने नव्वा साल नी मेर जत्यार तक नी पाके तत्यार तक पुराणी मेर खाता रेहु।
जागा ने छोड़ाव्वा नो नेम
जागा सदा नी लेदे नी वेचजो, काहाके जागा मारी से; अने तमु मारी जागा पोर बीजा देस वाळा अने पोरणान तेम री र्या। बाखीन तमु आखा देस मे आपणा वाटा नी जागा ने कीमत आपीन छोड़ाय लेवा देजो। कदी तारा कोय भाय-बंद्या गरीब हय्न आपणी खुद नी जागा मे गेथी थोड़ीक वेच नाखे, ता तीना घोराणा मे गेथा कोय बी आवीन आपणा भाय-बंद्या नी जागा छोड़ाय लेहे। कदी काना माणेह ना लेदे कोय छोड़ाव्वा वाळो नी हय, अने तीनी पांह एतरु धन हय के तीहयो खुद आपणो वाटो छोड़ाय सके, ता तीहयो तीने वेचवान टेम गेथो साल नी गीनती करीन बचला सालु नी मेर नी कीमत तीने, जे तीने वेचाती लेदो हय, तीने पासो आप देय; ता तीहयी आह़फा नी जागा हय जहे। पण कदी तीनी पांह एतरु धन नी हय के तीने पासी आपणी कर सके, ता तीनी वेचली जागा जुबली ना साल तक वेचाती लेवा वाळा पांह रेहे; अने जुबली ना साल मे छुट जाय ता तीहया माणेह नो पासो हक हय जहे। अळी कदी कोय माणेह ह़ेर नी दीवाल ना मोय नु घोर वेचे, ता तीहयु वेचवान बाद साल-भर हयवान पेले छोड़ाय सकहे, मतलब पुरु साल-भर तीहया माणेह ने छोड़ाव्वा नो हक रेहे। पण कदी तीने साल-भर हयवान पेले नी छोड़ावे, ता तीहयु घोर जे ह़ेर नी दीवाल ना मोय जे माणेह लेय तीनु बणलु रेय, अने पीड़ी-पीड़ीडीट तीनीत अवल्यात नु बणलु रेहे; अने जुबली ना साल मे बी नी छुटे। पण ह़ेर भीतड़ा वगर वाळा गामु ना घोर ते देस ना खेतरुन ह़रका गीणाय, तीमनु छोड़ाव्वा नु बी हय सके, अने तीहया जुबली ना साल मे छुट जहे। ते बी जे ह़ेर मे लेवी जाती ना खुद ना घोर हय तीमने लेवी जाती जत्यार चाहे तत्यार कीमत आपीन छोड़ाय सकहे। अने कदी कोय लेवी आपणो वाटो नी छोड़ावे, ता तीहयु वेचलु घोर जे तीमना वाटा ना ह़ेर मे हय जुबली ना साल ने छुट जहे; काहाके ईस्रायलीम नी वचमे लेवी नो वाटो तीमना ह़ेर मे तीहया घोरेत से। पण तीमना ह़ेर ना च्यारो-मेर नी चारवा नी जागा नी वेचाय; काहाके तीहयी जागा पोर तीमनो सदा नो हक से।
गरीबु ने उदार आपवा
कदी तारा कोय भाय-बेन्या गरीब हय जाय, अने तीमनी हालत तारी सामने तरस खावा लायक हय जाय, ता तु तीमने ह़माळ लेजे; तीहया बीजा देस वाळा नीता पोरणान तेम तारी ह़ाते रेहे। तीनी पांह वीयाज नीता फायदो नी लेजे; भगवान नी बीक मानजे; जीनी सी तारा भाय-बेन्या तारी ह़ाते पुरी जीवाय री सके। तीमने वीयाज सी रुप्या नी आपजो, अने खावा नी चीज बी फायदा नी लालच सी नी आपजो। में तमारो भगवान यहोवा से; में तमने कनान देस आपवा करीन अने तमारो भगवान ठेरवा नी हेर सी तमने मीस्र देस गेथा नीकाळ लावलो से।
पावर्या ने छोड़ाव्वा नो नेम
कदी तारा कोय भाय-बेन्या तारी सामने गरीब हय्न आह़फा ने तने पावर्यान तेम वेच देय, ता तीने पावर्यान तेम सेवा नी करावजे। तीहयो तारी ह़ाते दाड़क्यो नीता पोरणान तेम रेहे, अने जुबली ना साल तक तारी ह़ाते रीन सेवा करतो रेहे; तत्यार तीहयो सोरा-सोरी समेत तारीन्तां गेथो नीकळ जहे, अने आह़फा ना कुळ मे अने आड़ा-बुड़ा नी जागा मे पासो जत रेहे। काहाके तीहया तारात चाकर्या से, जीमने में मीस्र देस गेथा नीकाळ लावलो से; आनी लेदे तीमने पावर्या ना रुप मे नी वेचे। तीनी पोर काठो हक नी करजे; आपणा भगवान नी बीक मान्तो रेजे। तारा जे पावर-पावर्याण रेय तीहया तमारी च्यारो-मेर ना देसु मेना हयवा जोवे, पावर अने पावर्याण तीमनी मे गेथा वेचाता लेजे। जे माणहु तमारी वचमे बीजा देस वाळा हय्न रेय, तीमना घोराणा मे गेथा अने तमारी आड़े-धेड़े हय, अने जे तमारा देस मे पयदा हया हय, तीमनी मे गेथा तमु पावर-पावर्याण वेचाता ली लेवो; अने तीहया तमारो वाटो ठेरहे। तमु आह़फाम ना सोरा ने बी जे तमारी बाद हयहे तीमना हक मे कर सकहु, अने तीहया तीमनो वाटो ठेरे; तीमनी मे गेथा तमु सदा आह़फाम नी लेदे पावर लीया करजो, पण तमारा भाय-बंद्या जे ईस्रायली हय तीमनी पोर तमारो हक काठो नी जमाड़जो। कदी तारी सामने कोय बीजा देस वाळो नीता पोरणो मात-भर हय जाय, अने तीनी सामने तारो भाय गरीब हय्न आह़फा ने तारी सामने तीहया बीजा देस वाळा ने नीता पोरणा ने नीता घोराणा मे वेच देय, ता तीने वेचाय जवा ना बाद तीने पासो छोड़ाय सके; तीना भायु मे गेथा कोय तीने छोड़ाय सके। नीता तीनो काको, नीता आखड़्यो-बाखड़्यो भाय, नीता तीनो जाती-भाय तीनी कुल नो कोय बी तीने छोड़ाय सके; कदी तीहयो मात-भोर हय जाय, ता तीहयो आह़फोत खुद ने छोड़ाय सके। तीहयो आह़फा ने वेचातो लेवा वाळा ह़ाते आह़फा ने वेचावा वाळा साल सी लगाड़ीन जुबली ना साल तक हीसाप करे, तीने वेचावा नी कीमत सालु ना हीसाब सी करो, मतलब तीहयी कीमत दाड़की ना दाड़ान तेम तीनी ह़ाते हयहे। कदी जुबली ना घणा साल बच र्या हय, ता जेतरा रुप्या सी तीने वेचातो लेदला हय तीमनी गेथो तीहयो आह़फा ने छोड़ाव्वा नी कीमत तेतरा सालु ना हीसाप सी आप देय। कदी जुबली ना साल ना थोड़ाक साल री र्या हय, ते बी तीहयो आह़फा ना मालीक ह़ाते हीसाप करीन आह़फा ने छोड़ाव्वा नी कीमत तेतरा सालु ना हीसाब सी आप देय। तीहयो आह़फा ना मालीक ह़ाते तीहया दाड़क्यान तेम रेय, जीनी साल भर नी दाड़की ठेरावे; अने तीनो मालीक तीनी पोर तारी सामने काठो वेहवार नी करवा जोवे। अने कदी तीहयो आहयी रीती सी नी छोड़ावे, ता तीहयो जुबली ना साल मे आह़फा ना सोरा-सोरी समेत छुट जहे। काहाके ईस्रायली मारात चाकर्या से; तीहया मीस्र देस गेथा मारात नीकाळला चाकर्या से; में तमारो भगवान यहोवा से।
Source notes (1)
- Footnote जुबली पचासवा साल ने जुबली नो साल केत्ला अने जुबली ना दाड़े तीवार वाळता हता।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.