Skip to content
BibleKenya

Paliya Bible

लेव्‌यवेवस्‌था 18

गलत कामु ना बारा मे नेम

अळी भगवान मुसा ने केदो, तु ईस्‌रायली माणहु ने केजे के में तमारो भगवान यहोवा से। तमु मीस्‌र देस ने तेम नी करजो जां तमु रेता हता; अने कनान देस ने तेम बी नी करजो जां मे ली जाय र्‌यो, अने तीहया देसु नी रीती पोर बी नी चालजो। मारात हुकम ने मानजो, अने मारीत रीती ने मानीन तीनी पोर चालजो। में तमारो भगवान यहोवा से। आनी लेदे तमु मारा हुकम अने रीती ने मान्‌ता रेजो; जे माणेह तीमने माने तीना कारण तीहयो जीवत्‌लो रेहे। में यहोवा से। “तमारी मे कोय बी माणेह भाय-बेटी बयर ह़ाते सवसार नी करे। में यहोवा से। खुद नी आय्‌ह नु डील, तमारा बाह नु डील से, तीने नी उगाड़जो तीहयी तमारी आय्‌ह से, आनी लेदे तमु तीनु डील नी उगाड़जो। खुद नी मावसी आय्‌ह नु बी तमु डील नी उगाड़जो; तीहयु तमारा बाह नु डील से। आह़फा नी बेनेह भले सग्‌गी हय, नीता ह़ेवतर्‌याण हय, तीहयी घोर पयदा हयली हय, के बाहर नी पयदा हयली हय, तीनु डील नी उगाड़जो। तमु आह़फा ना सोरा नी सोरी नु नीता सोरी नी सोरी नु डील नी उगाड़जो, तीमनु डील ते तमारु डील से। तमारी ह़ेवतर्‌याण बेनेह जे तमारा बाह नी लारे पयदा हयी हय, तीहयी तमारी बेनेह से, आनी लेदे तीनु डील नी उगाड़जो। आह़फा नी फोय नु डील नी उगाड़जो; तीहयी तमारा बाह नी बेनेह से। तमारी जीजी नु डील नी उगाड़जो; तीहयी तमारी आय्‌ह नी बेनेह से। आह़फा ना काका नु नामबद्‌दी नी करजो, तीनी लाडी ह़ाते सवसार नी करजो; तीहयी तमारी काकी से। आह़फा नी ववेह नु डील नी उगाड़जो; तीहयी तमारा बेटा नी लाडी से, करीन तीनु डील नी उगाड़जो। आह़फा नी भाबी नु डील नी उगाड़जे; तीहयी ते तमारा भाय नुत डील से। कानी बयर अने तीनी सोरी बेम नु डील नी उगाड़जो, अने तीना सोरा नी सोरी नु नीता सोरी नी सोरी ने आह़फा नी बयर करीन तीनु डील नी उगाड़जे, तीहयाणे ते ह़गायती आवे; आसम करवा घणो मोटो पाप से। अने आह़फा नी लाडी नी बेनेह ने बी आह़फा नी लाडी करीन बोहंडड़ नी बणावजे अने पेल्‌नी बयर ने जीवते तीनु डील ने नी उगाड़जे। जत्‌यार तक कानी बयर ना मयना आय रेय अने वीटळ्‌ळी रेय तत्‌यार तक तीनी ह़ाते डील उगाड़वा नी जजो। आह़फा ना भायुम नी बयर ह़ाते सवसार नी करजो अने नी वीटळ जजो। आह़फा नी अवल्‌यात मे गेथा कोयने बी मोलेक देवता ना लेदे बादा करीन नी चड़ावजो, अने भगवान ना नाम ने वीटळ्‌ळु नी ठेरावजो; में यहोवा से। बयर ह़ाते सवसार करे तेम अदमी ह़ाते सवसार नी करजो; तीहयु ते घणु गलत काम से। काना बी जानवर ह़ाते सवसार नी करजो अने नी वीटळजो, अने कोय बी बयर ने जानवर ह़ाते गलत काम नी करवा जोवे आहयी ते गलत वात से। आसवा-आसवा कोय बी काम करीन वीटळजो नी, काहाके जे-जे राज्‌य ना माणहु ने में तमारी सामने गेथा नीकाळवा वाळो से तीहया आसवा-आसवा काम करीन वीटळी जेला से। अने तीमनु देस बी वीटळी जेलु से, आना कारण सी में तीमनी पोर तीमना अधरम नो डंड आपु, अने तीहयु देस आह़फा ना रेवासी ने नीकाळ देय। आहया कारण सी तमु मारी रीती अने नेमु ने मान्‌ता रेजो, अने भले देस वाळो हय नीता तमारी वचमे रेवा वाळो बीजा देस वाळो हय, तमारी मे गेथा कोय बी आसवु ह़ीगी आवे एवु काम नी करजो। काहाके आसवा आखा ह़ीगी आवे एवा कामु ने तीहया देस ना माणहु जे तमारी गेथा पेले तीनी मे रेता हता तीहया करता आवला से, आनी लेदे तीहयु देस वीटळी जेलु से। हाव आसम नी हये के जे रीते जे जाती तमारी गेथी पेले रेती हती तीमने तीहयु नीकाळ देदलु, तीहयीत रीते जत्‌यार तमु वीटाळो, ता तीहयु तमने बी नीकाळ देहे। जेतरा कोय आसवा गलत काम करे तीहया आखा माणहु ने आह़फा ना माणहु मे गेथा खत्‌तम कर देवा जोवे। आहया हुकम जे में तमने मानवा करीन आपलो से तीने तमु मान्‌जो अने जे गलत रीती तमारी गेथी पेल्‌नी चाल री तीमनी मे गेथी कानी पोर बी नी चालजो, तीमना कारण सी वीटळी नी जजो। में तमारो भगवान यहोवा से।”

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.