Paliya Bible
लेव्यवेवस्था 17
लोय नु चोखलुपणु
अळी भगवान मुसा ने केदो, हारुन अने तीना सोरा अने आखा ईस्रायली माणहु ने की दे के भगवान नो आहयो हुकम से: ईस्रायली ना घोराणा मे गेथु कोय बी माणेह जे बोळद्यो नीता गाडरा ना बच्चा, नीता बोकड़ी ने, चाहे छाहळा मे नीता छाहळान बारा मारीन मेल-मीलाप वाळा तम्बु ना झापला पोर, भगवान ना घोर ना अगळ भगवान ने चड़ाव्वा करीन नी ली जाय, ता तीहया माणेह ने लोय वयाड़वा नो गुनो लागहे; अने तीहयो माणेह जे लोय वयाड़ण्यो ठेरहे, तीने आह़फा ना माणहु ना वचमे गेथो खत्तम कर देय। आहयी रीती नो आहयो कारण से के ईस्रायली माणहु आपणु-आपणु बादा नु जानवर ने जीने तीहया मयदान मे बादा चड़ावे, तीहया तीने मेल-मीलाप वाळा तम्बु ना झापला पोर पुंजारान्तां, भगवान ना लेदे ली जाय्न तीनी लेदे मेल-मीलाप नी बादा करीन चड़ाया करे; अने पुंजारो लोय ने मेल-मीलाप वाळा तम्बु ना झापला पोर भगवान नी वेदी पोर छीटे, अने चरबी ने भगवान नी वारली गंद ना लेदे धपाड़े। तीहया जे देवता ने पुजण्या बणीन छीनाळु करे, तीहया आह़फाम नु बादा नु जानवर ने अळी नी चड़ाव्वा जोवे। तमारी पीड़ी ना लेदे आहयी सदा नी रीती रेहे। तु तीमने की दे के ईस्रायली ना घोराणा ना माणहु मे गेथा नीता तीमनी वचमे रेवा वाळा बीजा देस मे गेथो कानो माणेह काहा नी हय जे होम नी बादा अने मेल-मीलाप नी बादा चड़ावे, अने तीमने मेल-मीलाप वाळा तम्बु ना झापला पोर भगवान ना लेदे चड़ाव्वा नी लावे; तीहया माणेह ने आह़फा ना माणहु मे गेथो खत्तम कर देय। अळी ईस्रायली ना घोराणा ना माणहु मे गेथा नीता तीमना वचमे रेवा वाळा बीजा देस ना माणहु मे गेथो कानो कोय बी काहा नी हय जे कानी भाती नु बी लोय खाय, मे तीहया लोय खाण्या ना वीरोद मे हय्न तीने तीना माणहु ना वचमे गेथो खत्तम कर देही। काहाके डील नो जीव लोय मे रेय; अने तीने मे तमने वेदी पोर चड़ाव्वा करीन आपलो से के तमारा जीव ना लेदे पछतावो कर सके; काहाके जीव ना कारण लोय सीत पछतावो हये। आहया कारण सी मे ईस्रायली माणहु ने केम के तमारी मे गेथा कोय बी माणेह लोय ने नी खाजो, अने जे बीजा देस ना तमारी वच मे रेता हय तीहया बी लोय नी खाय। ईस्रायली माणहु मे गेथा नीता तीमनी वचमे रेवा वाळा बीजा देस ना माणहु मे गेथा कानो बी माणेह काहा नी हय जे पारद्यो जाय्न खावा लायक जानवर नीता चड़ा धरे, ता तीनु लोय ने नाखीन कादा सी ढाक देय। काहाके डील नो जीव तीनु लोय से जे तीना जीव ह़ाते एक से; आनी लेदे मे ईस्रायली माणहु ने केम के कानी भाती ना जीव ना लोय ने तमु नी खाजो, काहाके आखा जानवरु नो जीव तीना लोय मे रेय; जे कोय तीने खाय तीने खत्तम कर देहे। अने भले तीहयो देस वाळो हय नीता बीजा देस वाळो हय, जे कोय काना बीजा जानवर नी लारे मारलु नीता मरलु जानवर नु माह खाय तीहयो आह़फा ना लुगड़ा ने धोय्न पाणी सी उंगळी लेय, अने ह़ांतो तक वीटळ्ळो रेय; ता तीहयो चोखो हयहे। पण कदी तीहयो तीमने नी धोवे अने नी उंगळे, ता तीने तीनी गलती नो भार खुद ने झेलवा पड़हे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.