Paliya Bible
नीरगमन 12
फसह नो तीवार
अळतेण यहोवा मीस्र देस मे मुसा ने अने हारुन ने केदो, “आहयो मयनो तमारी जुगु आखा मयना मे गेथो पेल्नो मनायहे; तमु आहया मयना ने साल नो पेल्नो मानजो। ईस्रायली माणहु नी मंडळी ने आसम केवो; आहयात मयना ना दहवा दाड़े तमु आह़फा-आह़फाम ना बाहुम ना घोराणा नी अनसारे घोर पसळ एक-एक गाडरु ली राखो। अने कदीम कोय ना घोर मे एक गाडरु ने खावा करीन माणहु कम हय, ता तीहयो आह़फा ना आखा सी ह़ाते रेवा वाळा माणहु भेळ माणहु नी गीनती नी अनसारे एक गाडरु लीन राखे; अने तमु एक-एक जणा नी अनसारे गाडरु नो हीसाब करजे। तमारु गाडरु वारलु अने एक साल नो गाडरो रेवा जोवे, भले तीने गाडरा मे गेथु लेवो नीता बोकड़ा मे गेथु लेवो।1 तमु तीने आहया मयना ना चोवदवा दाड़े तक जीवत्लु राखजो। अने तीहया दाड़े ह़ांत्ली टेमे ईस्रायली माणहु नी आखी मंडळी ना माणहु तीहयु गाडरु ने बादा चड़ावे। ता तीहया तीनु लोय मे गेथु थोड़ुक लीन जे घोर मे तीहया गाडरु ने खाहे तीना झापला नी बेम धेड़े अने बारकस ना सींडे तीने लगाड़े। अने तीहया तीनु मांह ने तीहयीत राते आक्ठु मे भुंजीन खमीर वगर ना रोट्ला अने कड़वला भाजी-पाला ह़ाते खाय।2 तीने मुंडु, पोगु अने आतड़ा भेळ आक्ठु मे भुंजीन खाजो, काचलु नीता पाणी मे रांदीन कंय बी नी खाजो। अने तीनी मे गेथु कंय बी ह़वारे तक नी रेवा देजो, अने कदीम थोड़ुक ह़वारे तक री बी जाय, ता तीने आक्ठु मे धपाड़ देजो। अने तीने खावा नी आहयी रीती से: केड़ बांदे, पोग मे खाहड़ा पेरे, अने हात मे लाकड़ी लीन उतवाळ्या खाजो; तीहयो ते यहोवा नो तीवार रेहे।3 काहाके तीहयी राते मे मीस्र देस नी वच मे हय्न जही, अने मीस्र देस ना जानवरु अने माणहु ना पेल-खोळ्या सोरा ने मारही; मे मीस्र देस ना आखा देवताम ने डंड आपही; मे यहोवा से।4 अने जे घोर मे तमु रेवो, तीमनी पोर चोपड़लु लोय तमारी जुगु एक सेलाणी ठेरहे; मतलब जत्यार मे तीहयु लोय ने देखही ता तमने सोड़ीन अगो छरकी जही। अने जत्यार मे मीस्र देस ना माणहु ने मारही, ता तीहयी गरा तमारी पोर नी आवे अने तमु खत्तम नी हयो।5 अने तीहयो दाड़ो तमने फोम कराव्वा वाळो ठेरहे, तमु तीने यहोवा जुगु तीवार करीन मनावजो; तमु आने पीड़ी सी पीड़ी तक हमेसा मानजो।”
खमीर वगर ना रोट्ला
अळी यहोवा केदो, “तमु ह़ात दाड़ा तक खमीर वगर ना रोट्ला खाजो। तमु पेल्नात दाड़े आह़फा-आह़फाम ना घोरु मे गेथु खमीर सेटु कर देजो; काहाके जे माणेह पेल्ना दाड़े गेथो ह़ातवा दाड़े तक, खमीर वाळी चीज खाय, तीने ईस्रायली माणहु मे गेथु नीकाळ देहे। तमु पेल्ना दाड़े अने ह़ातवा दाड़े चोखली मंडळी बोलावजो। आहया बेम दाड़े कंय बी काम नी करवु जोवे; पण माणेह ने जेतरु खाणु जोवे तीहयु एतरुत रांद सकहु। तमु खमीर वगर ना रोट्ला ना तीवार नी पाळणी पाळजो। काहाके तीहया दाड़े6 मानो मे तमने टोळा-टोळा करीन मीस्र देस मे गेथो नीकाळलो से। करीन तमु पीड़ी सी पीड़ी तक हमेसा रीती ना रुप मे आहया दाड़ा नी पाळणी पाळजो।7 तमु पेल्ना मयना ना चोवदवा दाड़ा ना ह़ांता गेथा ईक्कीसवा दाड़े ना ह़ांता तक खमीर वगर नो रोट्लो खाया करजो। ह़ात दाड़ा तक तमारा घोर मे कंय बी खमीर वाळी चीज नी रेवा जोवे; काहाके खमीर ने खावा वाळा आखा माणहु भले तीहया बीजा देस ना हय, के देस ना हय, तीने ईस्रायली माणहु नी मंडळी मे गेथा नीकाळ देहे। तमु कोय बी खमीर वाळी चीज नी खाजो; तमु आखा आह़फाम ना घोरु मे खमीर वगर ना रोट्ला खाया करजो।”
पेल्नो फसह नो तीवार
ता मुसो ईस्रायल ना आखा डायला ने बोलावीन केदो, “तमु आह़फा-आह़फाम ना घोराणा नी अनसारे गाडरु टाळो, अने फसह तीवार नु गाडरु बादा चड़ावजो। अने तीनु लोय जे टगारा मे रेहे तीने जुफा नो एक गुच्छो डुबाड़ीन तीहयात टगारा मे ना लोय वेर झापला ना डेहळ ना सींडे अने बेम ह़ोड़ लगाड़जो; अने ह़वारे तक तमारी माय्न कोय बी घोर मे गेथा बारा नी नीकळे। काहाके यहोवा देस नी वच मे हय्न मीस्री माणहु ने मारतो जहे; एतरे जां-जां तीहयो झापला ना सींडे, अने बेम धेड़े तीहयु लोय ने देखहे, तां-तां तीहयो तीहया झापला ने छोड़ देहे, अने मारवा वाळा दुत ने मारवा करीन तमारा घोर मे जवा नी देय।8 अळतेण तमु आहयी रीती ने तमारी जुगु अने तमारी अवल्यात जुगु जलमकी रीती जाणीन मान्या करजो। जत्यार तमु तीहया देस मे जावो, जे यहोवा आह़फा ना वायदा नी अनसारे तमने आपहे, ता बी आहयी रीती कीया करजो। जत्यार तमारा सोरा तमने पुछे, ‘आहयी रीती नु ह़ु मतलब से?’9 ता तमु तीमने आहयो जपाप आपजो, ‘यहोवा जे मीस्री माणहु ने मारवा नी टेमे मीस्र मे रेवा वाळा आमु ईस्रायली माणहु ना घोरु ने छोड़ीन अगो जत रेलो अने बचाड़लो, करीनेत तीना फसह नी आहयी बादा चड़ावया।’” ता ईस्रायली माणहु मुंडु हेटु करीन वांद्या।
ता ईस्रायली माणहु जाय्न, जे हुकम यहोवा मुसा अने हारुन ने आपलो, तीनीत अनसारे कर्या।
आखरी दहवी गरा: पेल-खोळ्या सोरा नु मरनु
ता आसम हयु के आदी राते यहोवा मीस्र देस मे राजगादी पोर बहवा वाळा फीरोन ना मोट्ला सोरा सी लगाड़ीन कुंडवाड़ा मे वाळा केदी ना सोरा तक, आखा ना पेल-खोळ्या सोरा ने, मतलब जानवरु ना तक आखा ना बच्चा ने मार नाख्यो।10 अने फीरोन रातेत उठ पड़्यो, अने तीना आखा अदीकार्या अने आखा मीस्र देस ना माणहु उठ्या; अने मीस्र मे घणा आड़वा अने रड़वा बाज ज्या। काहाके एक बी एवु घोर नी हतु जीनी मे कोय मर्यु नी हय। ता फीरोन रातेत मुसा ने अने हारुन ने बोलावीन केदो, “तमु ईस्रायली माणहु भेळ मारा माणहु नी वचमे गेथा नीकळ जावो; अने जेम तमु केदला तीनी अनसारे तमारा यहोवा नी भक्ती करो। तमु केदला तीनी अनसारे तमारा गाडरा-बोकड़ा अने गाय-बोळद्या ने ह़ाते ली जावो; अने तमु मने बरकत आप जावो।” मीस्री माणहु जे केता हता के आमु आखा मर मीट्या, अने तीहया ईस्रायली माणहु पोर दबाव नाखीन केदा, “देस मे गेथा साटात नीकळ जावो, नीता आमु मर जहु।” ता तीहया तीमना कोहणला लोट ने खमीर भेसक्या वगरेत ठाहरा भेळ चादरा मे बांदीन आह़फा-आह़फाम ना खांदा पोर नाख लेदा। ईस्रायली माणहु जेम मुसो केदलो तीनी अनसारे मीस्री माणहु पांह ह़ोनु-चांदी नु वजन अने लुगड़ा मांग लेदा;11 अने यहोवा मीस्री माणहु ने आह़फा ना माणहु पोर एवा दयाळा बणाय नाख्यो के तीहया जे-जे मांग्या तीहयु आखु तीमने आप्या। आहयी रीते ईस्रायली माणहु मीस्री माणहु ने लुट लेदा।12
ईस्रायली माणहु नु मीस्र देस सोड़णु
ता ईस्रायली माणहु रामसेस ह़ेर गेथा सुक्कोत ह़ेर भणी चाल पड़्या, तीहया बयरा अने सोरा ने सोड़ीन चालीन जवा वाळा अदमी-अदमी छो लाख हता।13 तीमनी ह़ाते जे ईस्रायली माणहु नी हता तीहया बी ज्या, अने गाडरा-बोकड़ा गाय-बोळद्या अने अळी बीजा ढेरेत जानवरु बी ह़ाते हता। अने जे कोहणलो लोट तीहया मीस्र देस मे गेथा लावला हता, तीनी वेर तीहया खमीर वगर ना रोट्ला बणाया; काहाके तीमने मीस्र देम मे गेथा आसम नीकाळ देदला हता के वाट्ये खावा करीन रांदवा नो मोखो बी नी जड़्यो, आहयात कारण सी तीहयो कोहणलो लोट खमीर वगर नो हतो। ईस्रायली माणहु मीस्र मे च्यार ह़ो तीस साल तक रेला हता।14 अने तीहया च्यार ह़ो तीस साल पुरा हयवान तीहयात दाड़े यहोवा ना आखा माणहु मीस्र देस मे गेथा आह़फाम ना घोराणा भेळ नीकळ ज्या। यहोवा ईस्रायली माणहु ने मीस्र देस मे गेथो नीकाळ लायो, आहया कारण सी तीहयी रात तीनी जुगु मानवा नी लायक से; आहयी यहोवा नी तीहयीत रात से जीनु ईस्रायली माणहु नु पीड़ी सी पीड़ी तक मानवु जरुड़ी से।
फसह तीवार ना बारा मे नेम
अळतेण यहोवा मुसा ने अने हारुन ने केदो, “तीवार नो आहयो नेम से: कानो बी बाहर देस वाळो माणेह आहयी बादा मे गेथु नी खाय; पण जे कोय नो पय्हा आपीन लेदलो पावर्यो से, अने तमु तीने खतनु करला से, तीहयो तीने खाय सकहे। पण बाहर देस वाळा अने दाड़क्या तीनी मे गेथु नी खाय। तीहयु गाडरु नु खाणु ने एकीत घोर मे खावा जोवे; मतलब तमु तीनु मांह मे गेथु थोड़ुक बी बाहर नी लीज्जो; अने तमु बादा चड़ावलु जानवर नु एक बी हाटकु नी भांगजो।15 आखा ईस्रायली माणहु आहया तीवार ने मनावहे। अने कदीम कोय बाहर देस वाळो तमारी ह़ाते रीन यहोवा जुगु तीवार ने मनाव्वा हींडे, ता तीहयो आह़फान्तां ना आखा माणहु नु खतनु करावे, ता तीहयो ह़ाते आवीन तीने माने; अने अळतेण तीहयो देस वाळा माणेह बराबर ठेरहे। पण कानु बी खतना वगर नु माणेह तीनी मे गेथु नी खावा जोवे। तीनो नेम देस वाळा अने तमारी वचमे रेवा वाळा बाहर देस वाळा बेम जुगु एकीत रेवा जोवे।”16 आहयो हुकम जे यहोवा मुसा ने अने हारुन ने आप्यो तीनी अनसारे आखा ईस्रायली माणहु कर्या। अने तीहयात दाड़े यहोवा आखा ईस्रायली माणहु ने मीस्र देस मे गेथा ताखत भेळ नीकाळ लीज्यो।
Source notes (16)
- Cross-reference लेव्यवेवस्था 22:19; 1 पतरस 1:19
- Cross-reference 1 कुरन्थी 5:7
- Cross-reference लेव्यवेवस्था 23:5; गीनती 9:1-5; 28:16
- Cross-reference गीनती 33:4
- Cross-reference ईब्रानीयो 11:28
- Footnote आज नात दाड़े
- Cross-reference लेव्यवेवस्था 23:6-8; गीनती 28:17-25; मत्ती 26:17
- Cross-reference यहेजकेल 9:6; ईब्रानीयो 11:28
- Cross-reference वेवस्थावीवरन 32:7; यहोसु 4:6
- Cross-reference भजन सहीता 78:51; 105:26; 135:8; 136:10
- Cross-reference नीरगमन 3:22
- Cross-reference नीरगमन 3:21-22
- Cross-reference गीनती 33:5; 1:46
- Cross-reference उबजणाय कीताप 15:13; नेवताळा ना काम 7:6; गलातीयो 3:17
- Cross-reference गीनती 9:12; युहन्ना 19:36
- Cross-reference गीनती 9:14; 15:15; 16:29; लेव्यवेवस्था 24:22
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.