Paliya Bible
नीरगमन 13
पेल-खोळ्या सोरा ने ह़ोपवु
अळतेण यहोवा मुसा ने केदो, “पेल-खोळ्या सोरा ने मने ह़ोप दे, आखा सोरा जे ईस्रायल मे पेल-खोळ्या से, भले माणहु ना हय, भले जानवरु ना हय, तीहया मारात से।”1
खमीर वगर ना रोट्ला नो तीवार
अळतेण मुसो माणहु ने केदो, “आहया दाड़ा ने फोम राखो, जे दाड़े तमु गुलामी ना घोर, मतलब मीस्र देस मे गेथा नीकळ आवला से; यहोवा तमने तां गेथा आह़फा ना हात नी ताखत सी नीकाळ लावलो से; आहया दाड़े खमीर वाळो रोट्लो नी खाजो। अबीब ना मयने आज नात दाड़े तमु नीकळला से। एतरे जत्यार यहोवा तमने कनानी, हीत्ती, एमोरी, हीब्बी अने यबुसी जाती ना माणहु ना देस मे पुगाड़हे, जीने तीहयो तमारा आड़ा-बुड़ा ने आपवा करीन ह़ाम खादलो, जीनी मे दुद अने मोद ना झोरु वये, ता तमु आहयात मयने तीवार ने मनावजो। आहया ह़ात दाड़ा तक खमीर वगर ना रोट्ला खाया करजो, अने ह़ातवा दाड़े यहोवा जुगु तीवार मनावजो। आहया ह़ात दाड़ा मे खमीर वगर ना रोट्ला खाजो, तमारा आखा देस मे नी ते खमीर वाळो रोट्लो, अने नी ते तमारी पांह खमीर देखायवा जोवे। अने तीहया दाड़े तमु आह़फाम ना सोरा ने आहयु कीन ह़मजाड़ देजो के आहयु आमु तीहयात काम ना कारण कर र्या, जे यहोवा आमने मीस्र देस मे गेथा नीकळ आव्वा नी टेमे अमारी जुगु करलो। आहयु तमारी जुगु तमारा हात मे एक सेलाणी रेहे, अने तमारा डोळा अगळ फोम कराव्वा वाळी चीज ठेरहे; जीनी सी यहोवा ना नेम तमारा मोडा पोर रेय: काहाके यहोवा आह़फा ना ताखत वाळा हातु सी मीस्र मे गेथो तमने नीकाळलो से।2 करीन तमु आहया नेम ने हर साल संय टेम पोर मान्या करजो।
पेल-खोळ्यो सोरो
“अळतेण जत्यार यहोवा तीहयी ह़ाम नी अनसारे, जे तीहयो तमारा आड़ा-बुड़ा ह़ाते अने तमारी ह़ाते खादलो से, तमने कनानीयो ना देस मे पुगाड़ीन तीने तमने आप देहे, ता तमु तीहया पुरा आखा गेथा पेल-खोळ्या सोरा ने मालीक जुगु अलग करजो। तमारा जानवरु ना आखा पेल्ला नर बच्चा मालीक ना से।3 अने गदड़ी ना पेल्ला बच्चा ना बदले गाडरा आपीन छोड़ाय लेजो, अने कदीम तमु तीने नी छोड़ावे ता तीनु गळु तोड़ देजो। पण आह़फाम ना पुरा आखा गेथा पेल-खोळ्या सोरा ने छोड़ाय लेजो। अने आव्वा वाळा दाड़ा मे जत्यार तमारा सोरा पुछे के ‘आहयु ह़ु से?’ ता तीमने केजो, ‘यहोवा आमने पवराय ना देस गेथो मतलब मीस्र देस मे गेथो आह़फा नी हात नी ताखत सी नीकाळ लावलो से। तीहयी टेमे जत्यार फीरोन राजो एकहेट्यो हय्न आमने जवा नी देवा हींड्यो, ता यहोवा मीस्र देस मे माणहु सी लगाड़ीन जानवरु तक आखु ना पेल-खोळ्या हयला ने मार नाख्यो। आहयात कारण सी जानवरु मे गेथा जेतरा आह़फा-आह़फाम नी आय्ह ना पेल्ना नर हता, तीमने आमु यहोवा नी करते बादा चड़ावया; पण खुद ना पेल-खोळ्या सोरा ने आमु बदलो आपीन छोड़ाय लीया। आहयो तमारा हातु पोर एक सेलाणी ह़रको अने तमारा बेम डोळा नी वच मे टीका ह़रको ठेरे; काहाके यहोवा आमु ने मीस्र देस मे गेथा आह़फा नी ताखत सी नीकाळ लावलो से।’”4
वादळा नो खम्बो अने आक्ठु नो खम्बो
जत्यार फीरोन ईस्रायली माणहु ने जवा नो हुकम आप देदो, ता पलीस्तीयो ना देस मे हय्न जे वाट जाय री हती; तीहयी वाट ह़ातेत हती; ते बी भगवान आहयु सोचीन तीहयी वाट्ये माय्न नी ली ज्यो के कंय माय्न आसम नी हय जाय के जत्यार आहया माणहु लड़ाय देखे ता पसताय्न पासा मीस्र देस आवती रेय।5 करीन भगवान तीमने फीरावी-फीरावीन रात्ली दर्या ना जंगल नी वाटे माय्न ली ज्यो। अने ईस्रायली माणहु हालर बांदीन मीस्र देस मे गेथा नीकळ ज्या। अने मुसो युसुफ ना हाटका ने ह़ाते लेतो ज्यो; काहाके युसुफ ईस्रायली माणहु ने आहयु कीन, “भगवान तमने फोम करहेन करहे, अने तीमने आना बारा मे पक्की ह़ाम खवाड़लो हतो के तीहया तीना हाटका ने आह़फाम नी ह़ाते आञे गेथा ली जाय।”6 अळतेण तीहया सुक्कोत ह़ेर गेथा अगा ज्या अने तीहया उजाड़ी जागा वाळा देस ना आखरी मे वह़ला एताम ह़ेर मे पड़ावो नाख्या। यहोवा तीमने दीहु वाट देखाड़वा करीन वादळु ना खम्बा मे, अने राते वीजाळु आपवा करीन आक्ठु ना खम्बा मे हय्न तीमनी अगळ-अगळ चाल्या करतो हतो, जीनी सी तीहया राते बी अने दीहु बी चाल सके। तीहयो नी ते वादळु ना खम्बा ने दीहु अने नी आक्ठु ना खम्बा ने राते माणहु नी अगळ गेथा सेटा कर्यो।
Source notes (6)
- Cross-reference गीनती 3:13; लुका 2:23
- Cross-reference गीनती 15:39; मत्ती 23:5
- Cross-reference नीरगमन 34:19; लेव्यवेवस्था 27:26; गीनती 18:15; यहेजकेल 44:30
- Cross-reference वेवस्थावीवरन 6:8
- Cross-reference गीनती 14:1
- Cross-reference उबजणाय कीताप 50:25; यहोसु 24:32
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.