Paliya Bible
नीरगमन 14
रात्ली दर्या ने पार करनु
तत्यार यहोवा मुसा ने केदो, “ईस्रायली माणहु ने हुकम आप के तीहया पासा आवीन मीगदोल अने रात्ली दर्या नी वचमे, पीहाहीरोत नी ह़ाते, बालसपोन नी अगळ आह़फाम नो पड़ावो नाखे, अने तीनीत अगळ दर्या नी काठे तम्बु उबा करे। ता फीरोन ईस्रायली माणहु ना बारा मे वीच्यार करहे, ‘तीहया अंजाण्या देस मे भटकीन घबराय ज्या अने उजाड़ी जागा मे घेरवाय जेला से।’ ता मे फीरोन ना मन ने काठु कर देही, अने तीहयो तीमनी पछळ जहे। ता फीरोन अने तीना आखा टोळा नी लारे मारी बड़ाय हयहे; अने मीस्री माणहु जाण लेहे के मे यहोवा से।” अने तीहया तेमेत कर्या।
जत्यार मीस्र ना राजा ने आहयी खबर जड़ी के तीहया माणहु नाह ज्या, ता फीरोन अने तीना अदीकार्या नु मन तीमना वीरोद मे बदली ज्यु, अने तीहया केवा बाज ज्या, “आमु आहयु ह़ु कर्या के ईस्रायली माणहु ने अमारी पवराय सी छुटकारो आपीन जवा देदा!” ता तीहयो आह़फा नी घोड़ागाडी जोपाड़्यो अने आह़फा नी सेना ने ह़ाते लेदो। तीहयो छोव ह़ो वारु सी वारु घोड़ागाडी अने मीस्र ना आखा बीजा घोड़ागाड्या बी लेदो अने तीहया घोड़ागाड्या पोर अदीकार्या बहला हता। अने यहोवा फीरोन राजा ना मन ने काठु कर देदो। करीन तीहयो ईस्रायली माणहु नी पसळ ज्यो; पण ईस्रायली माणहु हीम्मत भेळ अगा नीकळीन जवा बाज र्या हता। पण फीरोन ना आखा घोड़ा, घोड़ागाड्या, अने घोड़ा पोर बहण्या भेळ मीस्री सेना तीमनी पछळ जाय्न तीमनीन्तां, जे पीहाहीरोत नी ह़ाते, बालसपोन नी अगळ, जां ईस्रायली रात्ली दर्या ना काठे पड़ावो नाखीन री र्या हता, जाय पुगी। जत्यार फीरोन ह़ाते आयो, ता ईस्रायली माणहु देख्या के मीस्री माणहु अमारी पछळ-पछळ आव्वा बाज र्या; ता तीहया घण जबर बीह ज्या, अने आड़ीन यहोवा पांह मदत मांग्या। अने तीहया मुसा ने केवा बाज ज्या, “मीस्र देस मे माहण्या नी हता ह़ु जे तु तां गेथा आमने मरवा करीन उजाड़ी जागा मे ली आयो? तु आमने मीस्र देस मे गेथा नीकाळीन लावीन अमारी ह़ाते आहयु ह़ु कर्यो? ह़ु आमु आहयी वात तने मीस्र देस मे नी केता र्या के आमने रेवा दे के आमु मीस्री माणहु नी सेवा करया? अमारी जुगु उजाड़ी जागा मे मरवा सी वारु ते मीस्री माणहु नी सेवा करवा वारु हतु।”1 मुसो माणहु ने केदो, “बीहो ना, उबा-उबा छुटकारा नु काम देखो, जे यहोवा तमारी जुगु आज करहे; काहाके जे मीस्री माणहु ने आज तमु देखो, ईमने अळतेण अळी कदी नी देखो। यहोवा आह़फोत तमारी जुगु झुमायहे, करीन तमु होगा रेवो।”2 ता यहोवा मुसा ने केदो, “तु ह़ुका मने आड़ र्यो? ईस्रायली माणहु ने के, के अगा जावो। अने तु तारी लाकड़ी चुटीन तारो हात दर्या भणीन नाम्बो कर, अने तीहयी बे भाग हय जहे; ता ईस्रायली माणहु दर्या नी वचमे हय्न धरती पोर माय्न चालीन जत रेहे। अने ह़मळ, मे खुद मीस्री माणहु ना मन ने काठु करु, अने तीहया दर्या मे बी तीमनी पसळ आवहे। ता फीरोन अने तीनी आखी सेना, अने घोड़ागाड्या अने बहण्या ने खत्तम हयवा नी लारे मारी बड़ाय हयहे। अने जत्यार फीरोन, अने तीना घोड़ागाड्या, अने घोड़ा पोर बहण्या पोर मारी जीक नी लारे मारी बड़ाय हयहे, ता मीस्री माणहु जाण लेहे के मे यहोवा से।” ता भगवान नो दुत जे ईस्रायली माणहु नी अगळ-अगळ चाल्या करतो हतो, तां गेथो जाय्न तीमनी पसळ जत र्यो; अने वादळा नो खम्बो तीमनी अगळ गेथो सेटो हय्न पसळ जाय्न उबो हय ज्यो। आहयी रीते तीहयो मीस्री माणहु नी सेना अने ईस्रायली माणहु नी सेना नी वच मे आय लाग्यो; तां वादळु अने अंदारलु ते हतु, ते बी ईस्रायली माणहु ने राते वीजाळु जड़तु र्यु; अने मीस्री माणहुन्तां अंदारु हतु, अने बेम सेना एक बीजा नी ह़ाते नी आय सकी। ता मुसो आह़फा नो हात दर्या भणीन नाम्बो कर्यो; अने यहोवा उगवणु नु घणु जुदु वाहळु मोकल्यो, अने दर्या नु पाणी बे वाटा मे वटाय ज्यु अने मालीक दर्या ने ह़ुकलो जागो बणाय देदो।3 ता ईस्रायली माणहु दर्या नी वच मे ह़ुकला जागा पोर चालीन ज्या, अने पाणी तीमनी जमणी ह़ोड़ अने डखरी ह़ोड़ भीतड़ुन तेम उबु हय र्यु हतु।4 ता मीस्री, मतलब फीरोन ना आखा घोड़ा, घोड़ागाड्या अने घोड़ा पोर बहण्या तीमनी पछळ दर्या नी वच मे जत र्या। अने ह़वारे परगड़ फाटे यहोवा वादळा अने आक्ठु ना खम्बा मे गेथो मीस्री माणहु नी सेना पोर नींगा नाखीन तीमने घबराड़ नाख्यो। अने तीहयो तीमना घोड़ागाड्या ना चाकटा ने नीकाळ देदो, जीनी सी तीमनु चालनु काठु हय ज्यु। ता मीस्री आह़फा-आह़फात केवा बाज ज्या, “आवो, आपणु ईस्रायली माणहु नी अगळ गेथा नाह जीया; काहाके यहोवा तीमनी भणी गेथो आपणी ह़ाते झुमाय र्यो।”
अळतेण यहोवा मुसा ने केदो, “तारो हात दर्या भणीन नाम्बो कर के पाणी मीस्री, अने तीमना घोड़ागाड्या, अने घोड़ा पोर बहण्या पोर पासु वयवा बाज जाय।” ता मुसो आह़फा नो हात दर्या भणीन नाम्बो कर्यो, अने दर्या ह़वारे हयते-हयते पेले जेवी हती तेवी हयवा बाज जी; ता मीस्री नाहवा बाज ज्या, पण यहोवा तीमने दर्या मे डुबाड़ नाख्यो। पाणी पासु आव्वा सी, जेतरा घोड़ागाड्या अने घोड़ा पोर बहण्या ईस्रायली माणहु पसळ दर्या मे आवला हता, तीहया आखा मतलब फीरोन राजा नी आखी सेना दर्या मे डुब जी, अने तीमनी मे गेथु एक बी नी बच्यु। पण ईस्रायली दर्या नी वचमे ह़ुकला जागा पोरेत हय्न जत र्या, अने पाणी तीमनी जमणी ह़ोड़ अने डखरी ह़ोड़ भीतड़ुन तेम उबु हय र्यु हतु। आहयी रीते यहोवा तीहया दाड़े ईस्रायली माणहु ने मीस्री माणहु ना हात मे गेथो सोड़ायो; अने ईस्रायली माणहु, मीस्री माणहु ने दर्या ना काठे मरला पड़ रेला देख्या। जत्यार ईस्रायली माणहु, यहोवा मीस्री माणहु पोर जे आह़फा ना हात नी सक्ती देखाड़्यो, तीने देखीन सी बीहवा बाज ज्या अने यहोवा पोर अने तीना चाकर्या मुसा पोर बी भरहो कर्या।
Source notes (4)
- Cross-reference नीरगमन 16:3; 17:3
- Cross-reference वेवस्थावीवरन 20:4; यहोसु 10:14; यसाया 30:15
- Cross-reference भजन सहीता 106:9; 114:3
- Cross-reference 1 कुरन्थी 10:1; ईब्रानीयो 11:29
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.