Paliya Bible
नीरगमन 11
आखरी गरा नी चेतावणी
अळतेण यहोवा मुसा ने केदो, “एक अळी गरा मे फीरोन अने मीस्र देस पोर लावही, आनीन अळतेण तीहयो तमने आञे गेथा जवा देहे; अने जत्यार तीहयो जवा देहे ता तमने आखा ने पक्को नीकाळ देहे। मारा माणहु ने मारो आहयो हुकम ह़मळाव के एक-एक अदमी आह़फाम ना ह़ाते वाळा पांह, अने एक-एक बयर आह़फी नी ह़ाते वाळी पांह ह़ोनु-चांदी नु वजन मांग लेय।” ता यहोवा मीस्री माणहु ने आह़फा ना माणहु पोर दयाळा बणाय नाख्यो, एतरुत नी पण तीहयो माणेह मुसो मीस्र देस मे फीरोन ना अदीकार्या अने बीजा आखा माणहु नी नींगा मे घणो मोटो माणेह हतो।1 अळतेण मुसो फीरोन ने केदो, “यहोवा आसम केय: आदी रात नी आड़े-धेड़े मे मीस्र देस नी वच मे हय्न चालही। ता मीस्र देस मे राजगादी पोर बहवा वाळा फीरोन सी लगाड़ीन घट्ये दळवा वाळी पावर्याण ना पेल-खोळ्या सोरा तक अने जानवरु ना बी जे पेल्ना से आखा मर जहे। अने आखा मीस्र देस मे आखा घणा रड़हे, आञे तक के एवु नी ते हयु अने नी अळी कारु हये। पण ईस्रायली माणहु ना वीरोद मे नी ते माणहु अने नी ते जानवरु, आञे तक के कुतरु तक नी भुके; जीनी सी तमु जाण लेहु के मीस्री माणहु अने ईस्रायली माणहु मे, मे यहोवा फरक करु।” ता तारा आहया आखा अदीकार्या मारीन्तां आवहे अने मने वांदीन आहयु केहे, “तारा आखा माणहु भेळ नीकळ जा, अने अळतेण मे बी नीकळ जही।” आहयु कीन मुसो घणी रीह मे फीरोन अगळ गेथो जत र्यो। यहोवा मुसा ने की देदलो हतो, “फीरोन तमारी वात नी ह़मळे; काहाके मे मीस्र देस मे ढेरेत चमत्कार करु।” मुसो अने हारुन फीरोन अगळ आहया आखा चमत्कार कर्या; पण यहोवा फीरोन नु मन अळी बी काठु कर देदो, करीन तीहयो ईस्रायली माणहु ने आह़फा ना देस मे गेथा जवा नी देदो।
Source notes (1)
- Cross-reference नीरगमन 3:21
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.