Paliya Bible
नीरगमन 10
आंठवी गरा: टीड्या नो हमलो
अळतेण यहोवा मुसा ने केदो, “फीरोन ने तां जा; काहाके मेत तीनु अने तीना अदीकार्या नु मन आनी करते काठु कर लेदलो से के मारी सेलाणी नो चमत्कार तीमनी वच मे देखाड़ु; अने तमु तमारा सोरा अने सोरा ना सोराम ने आहयी वात ना बारा मे देखाड़ो के यहोवा मीस्री माणहु ने केवो हाही-ठट्टा मे उड़ायो अने आह़फा ना ह़ु-ह़ु सेलाण्या तीमनी वचमे देखाड़लो से; जीनी सी तमु आहयु जाण लेहु के मेत यहोवा से।”1 करीन मुसो अने हारुन फीरोन ने तां ज्या अने तीहया तीमने केदा, “ईब्रानी माणहु नो यहोवा तने आहयी रीते केय: तु कारु तक मारा हक मे नी हये? मारा माणहु ने जवा दे के तीहया मारी भक्ती करे। कदीम तु मारा माणहु ने नी जवा देतो ता ह़मळ, वाहणे मे तारा देस मे टीड्या नो टोळो लावही, अने तीहया धरती ने एवा ढाक लेहे के तीहयी देखाव तक नी पड़े; अने तमारु जे कंय गारा सी बच र्यु तीने तीहया खाय जहे, अने तमारा जेतरा झाड़का बारा उगला से तीमने बी तीहया खाय जहे, अने तीहया तारा घोर मे, अने तारा अदीकार्या आञे तक के आखा मीस्री माणहु ना घोर मे भराय जहे; एतरा टीड्या तारा बाप-दादा अने तीमना डाह-डाहा बी जत्यार गेथा तीहया धरती पोर पयदा हया तां गेथा आज तक कारु नी देख्या।” ता मुसो फीरोन ने तां गेथो बाहर जत र्यो।
ता फीरोन ना अदीकार्या तीने केवा बाज ज्या, “हीय्यु माणेह कारु तक अमारी जुगु फंदो बण रेहे? हीय्या माणहु ने जवा दे के हीय्या हीमना भगवान यहोवा नी भक्ती करे। ह़ु हजु तक नी जाणतो के आखु मीस्र देस खत्तम हय ज्यु?” करीन मुसा ने अने हारुन ने फीरोन पासा बोलाव्वा मोकल्यो, अने तीहयो तीमने केदो, “जत रेवो, अने तमारा भगवान यहोवा नी भक्ती करो; पण जे जवा वाळा माणहु से तीहया कोय-कोय से?” मुसो केदो, “आमु ते सोरा-सोरी, गाडरा-बोकड़ा, गाय-बोळद्या भेळ अने सोरा गेथा लगाड़ीन डायला तक आखान आखा जहु, काहाके आमु ने यहोवा जुगु तीवार वाळवु से।” ता फीरोन आहयी रीते तीमने केदो, “यहोवा तमारी ह़ाते रेय; कदीम मे तमने सोरा भेळ जवा देम, ता देखो तमारा मन मे बुराय से। नी, आसम नी हय सके; तमु अदमी-अदमी जाय्न यहोवा नी भक्ती करो, तमु ने आहयुत जोवे।” अने तीमने फीरोन अगळ गेथा नीकाळ देदा।
ता यहोवा मुसा ने केदो, “मीस्र देस भणीन तारो हात उचो कर के मीस्र देस मे टीड्या हमलो करे अने मीस्र देस नु जेतरु अन अने झाड़का जे गारा सी बच जेला से आखु ने खाय जाय।” करीन मुसो आह़फा नी लाकड़ी ने मीस्र देस भणी नाम्बी कर्यो, ता यहोवा आखी दाड़ो अने आखी रात उगवणु नु वाहळु लायो; अने जत्यार ह़वारे हयु ता तीहयु उगवणु नु वाहळु टीड्या ना टोळा लायु। अने टीड्या नो टोळो आवीन मीस्र देस ना आखा जागे बह ज्यो, तीहया टीड्या नो टोळो एतरो मोटो हतो, के नी ते ईमनी सी पेले एवा टीड्या देख्या, अने नी ईमनी बाद एवा कारु बी देखवा जड़े।2 तीहया टीड्या आखी धरती पोर आसम छवाय ज्या, के आखा देस मे अंदारु हय ज्यु। अने तीहया टीड्या देस ना आखा झाड़का ने, अने झाड़ ना फोळ ने, तीमनी आखी मेर जे कंय गारा सी बच जेलु हतु, आखु खाय ज्या। आञे तक आखा मीस्र देस मे कंय बी लील्लु नी बच्यु, अने नी ते चोगान ना झाड़का बच्या; ता फीरोन वार लगाड़्या वगर मुसा ने अने हारुन ने बोलाय्न केदो, “मे ते तमारा भगवान यहोवा अगळ अने तमारी अगळ बी पाप करलो से। करीन हाव आहयीत काव मारो पाप माफ करो, अने तमारा भगवान यहोवा पांह वीन्ती करो के तीहयो मारी पोर गेथो आहयी मोत नी आफत ने सेटी करे।” ता मुसो फीरोन ने तां गेथो बारो जाय्न यहोवा पांह वीन्ती कर्यो। ता यहोवा बुडवणी नी घणी जुदी वाहळी लावीन टीड्या ने उडाड़ीन रात्ली दर्या मे डुबाड़ देदो, अने मीस्र देस ना काना बी जागा मे एक बी टीड्यो नी बच्यो। पण ते बी यहोवा फीरोन नु मन ने काठु कर देदो, जीनी सी तीहयो ईस्रायली माणहु ने जवा नी देदो।
नव्वी गरा: अंदारलु
अळतेण यहोवा मुसा ने केदो, “तारो हात वादळु भणीन नाम्बो कर के मीस्र देस पोर अंदारलु छवाय जाय, एवु अंदारलु के हात वेर ह़ोलकवा पड़ जाय।” ता मुसो आह़फा नो हात वादळु भणीन नाम्बो कर्यो, अने आखा मीस्र देस मे तीन दाड़ा लग घण-जबर अंदारलु छवायलु र्यु।3 तीन दाड़ा तक मीस्री माणहु कोय बी एक-बीजा ने देख नी सक्या, अने नी कोय आह़फाम ना जागे गेथा उठ सक्या; पण आखा ईस्रायली माणहु ना घोरु मे वीजाळु र्यु। ता फीरोन राजो मुसा ने बोलावीन केदो, “तमु जावो, यहोवा नी भक्ती करो; तमारा सोराम ने बी ह़ाते ली जावो, पण तमारा गाडरा-बोकड़ा अने गाय-बोळद्या ने रेवा देवो।” मुसो केदो, “तने आमने बादा अने होम बादा जुगु जानवरु बी आपवा पड़हे, जीमने आमु अमारा भगवान यहोवा जुगु चड़ावया। एतरे अमारा जानवरु बी अमारी ह़ाते आवहे, तीमनु एक खुर्यु बी नी रेय, काहाके तीमनीत मे गेथु आमने अमारा यहोवा नी भक्ती नु ह़मान लेवा नु से, अने आमु जत्यार तक तां नी पुग जीया तांह तक नी जाणता के ह़ु-ह़ु लीन यहोवा नी भक्ती करवा पड़हे।” पण यहोवा फीरोन नु मन काठु कर देदो, जीनी सी तीहयो तीमने जवा नी देदो। ता फीरोन मुसा ने केदो, “मारी अगळ गेथो जत रे; अने चेतीन रे; मने तारु मोडु अळी नी देखाड़जे; काहाके जे दाड़े तु मने मोडु देखाड़ही तीहयात दाड़े मार नाखही।” मुसो केदो, “तु वारु केदो; मे तारु मोडु अळी कारु नी देखु।”
Source notes (3)
- Cross-reference वेवस्थावीवरन 4:9; भजन सहीता 44:1
- Cross-reference भजन सहीता 78:46; 105:34; परकासीतवाक्य 9:2
- Cross-reference भजन सहीता 105:28; परकासीतवाक्य 16:10
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.