Markusi 3

Yesusi dong panang pa we nyontarai we waradoei keda pei na a Sabati pai

(Mat. 12:9-14; Luk. 6:6-11)

1Na a Sabati Yaudi pei ea Yesusi yua taweri ea wu manu Yaudi esominai pai. Na yana nyontarai pei wara doei keda. 2Nyontarai embe Parisi pa embetotoi endekakepang Yesusi na aidina, topino Yesusi nyari nyontarai yani penaang na a Sabati Yaudi pai mamo, etadu sarara we etimbu I. 3Yesusi kewio we nyontarai we wara doei keda pai doyo, “Ruama boati na rabuang ne!” 4Interi Yesusi kewio weya doyo, “Na kawio we Musai soi pa mamo, denyau tata we na a sabati Yaudi pai mamo tamamuna kong tamung nyontaraie?” Wereria wiria, mana denyau tata we tanari wemai pa kong tampariri nyontarai. Mana ya aidisa. 5Yesusi anerarong papea tutu ene esuwirera pa, donane I keou. Impaina rewawariao nu we doanai pai kong kewio we nyontarai wadi doyo, “Tuwa waramupai ma!” Interi nyontaraipai suwa warang paia, impaina warangpai penaang. 6Interi nyontarai embe Farisi wauya emati emararu engkawio maikong nyontarai we entabari we Herodesi, ya esanerarong koiri we emung Yesusi.

Yesusi dong panangpa we nyontarai we empau paya

7Interi Yesusi kiong ne nyontarai etuari paya esaya wu ruru paia, kong nyontarai empau enda na raora Galilea etua Yesusi. Nyontarai empau tato endana raora Yudea, 8na bendari Yerusalemi, na raora Idumea, na raora maria Yordani domurang wanei kong na nu wekiria na bendari Tirusi kong Sidoni. Ya kuira endawu Yesusi ma, tutu ya entarao pitaubai we Yesusi dona pa paina. 9Yesusi demi ne nyontarai etuari paya emanyena wa pei demamang we I, wo nyontarai paya empau paina, imbaromi endeo engkepang Yesusi pe.1 10Yesusi wo dong nyontarai madupei empanang, impaina nyontarai we etaiwau ui pa, etairora ya wu Yesusi ma, imbaromi ya embaratui I. 11Anemai semi-semi paya endeo Yesusi pa, ya emayoi esaebu na Yesusi renapa kong etanana etoyo, “Au wo Allai Antung di Au.” 12Mana Yesusi yua ya kangkuna, we entopana we matei dina pa.

Yesusi diri nyontarai ura ea kodu we etuari

(Mat. 10:1-4; Luk. 6:12-16)

13Interi Yesusi wieita to wi peia. I yau nyontarai we anewengsa paya kong ya endawuria. 14Yesusi diri nyontarai pe ura ea kodu we embe rasuri etaruari pampang, we demi ya embuwu ne Arera Weweng pai, 15kong dong mambiri weya we etintandawa semi-semi paya. 16Nyontarai ura ea kodu we diri ya paya mamo: Simoni, we Yesusi yau anompei Petrusi, 17Yakobusi kong neta Yoanisi, Sebedeusi ne kumai di asaru, asaru mamo Yesusi yau usanomi pei Boanergesi, ne wang pei kumai kaidu. 18Kong Andareasi, Pilipusi, Bartoromeusi, Matiusi, Tomasi, Yakobusi Alpiusi ne kumai dina. Yesusi tato Yau Tadeusi, Simoni nyontarai we demuna we Israeli wau entori warui Roma wauya pai, 19kong Yudas Iskarioti we ingkai wio Yesusi pai.

Yesusi kong Beelsebuli

(Mat. 12:22-32; Luk. 11:14-23)

20Interi Yesusi teweri wu manu meoi nai pai ea. Nyontarai taubai paya enda ema empandura na yana, impaina Yesusi kong ne nyontarai etuari paya etadu a pea we etampi wa. 21Awe Yesusi ne mandarong paya entarao piyana pa, ya endama eto engkori, wo etoyo Yesusi piana yewawi to.

22Kuru akama Yaudi paya we endana Yerusalemi ma pa etoyo,2 “Semi-semi paya ene mananu pai, aino Beelsebuli yumao Yesusi. I dong paya pa we Yesusi, impaina Yesusi dedawa semi-semi paya yana.”3

23Impaina Yesusi yau ya interi kewio weya na sosiau pa doyo, “Topitotoi Nyombatangpai dedawa ne semi-semi paya raie? Wereria. 24Topino negara pei ne rai paya embawaweri yara entebabau mamo, negara yani ingkai we muna-munai. 25Tato we mandarong pai, topino ya embawaweri yara entababau mamo, mandarong yani ingkai we munamunai. 26Toyana tato, we Nyombatang pai, topino i demuna kangkuna we mantau ne semi-semi paya kong i tebabau koiri-koiri, mamo i we munamunai to. 27Nyontarai pei doyo yua we dewaa we piaya pei pinempa na ne manu pai mamo, i andi dawi nyontarai yani pampongwo. Interi yuara we dewa we piaya yani pai pinempa ki. 28Yau etopana kangkuna we mia: Allai ingkai dupirandeni sasari taubai kong kangkania we nyontarai pa enari waweriao ya pa. 29Mana parari nyontarai pei kengkani Duainunung Mamarang pai mamo, Allai dupirandenia wa. Mae Allai subakamana we dong sarara, tutu i piana dong sasario Allai dupirandeni na eawa ki woroi-woroi.”4 30Yesusi kewio toyana wo ya engkawio etoyo Yesusi wo ene mananupai yumaoi paina.

Mateidi Yesusi Yau ya we neta nempa

(Mat. 12:46-50; Luk. 8:19-21)

31Na awe Yesusi denyau rai mamo nyani kong ne neta paya endama. Katene ya etoa na ri wane, mae ya etami nyontarai pei yau Yesusi. 32Nyontarai we empau paya emayoi esoriwari Yesusi, ya engkawio we Yesusi etoyo, “Remua nyamui kong nemeta nemu paya, yati enai na ri wane, kong esamupa we etadu Au.” 33Yesusi kewio weya doyo, “Matei di neu inani kong matei di neu neta paya pae?” 34Interi Yesusi reaoa we nyontarai we empau esoriwari paya, mae kewio doyo, “Nini pai mamo inani dina kong neu neta pe yana. 35Matei dongparari Allai ne awia pa, iwo neta neu muang dina kong iwo neta neu wawing dina, iwo inani-dina.”