Markusi 2

Yesusi dong nyontarai piaya pei penaang

(Mat. 9:1-8; Luk. 5:17-26)

1Ape bototoi ea na awe Yesusi teweri to bendari Kapernaumi pa, interi nyontarai paya entarao Yesusi we nyaina na manu wane. 2Impaina nyontarai paya empau endama embawaweri ya impaina nu pa donungna kai, toyana aturarei na manu repong pai tato donung kuira. Interi Yesusi wiuwua parari Allai ne Arera pai weya. 3Interi nyontarai embe manua endama engko nyontarai muang we piaya pei na kewang pei wu Yesusi ma. 4Mana engkori esua wa tutu nyontarai tau, impaina engkori embeita wu manu wawongpai. Interi esepa randaung pei, empiri na kewang we denanai pai, na nyontarai pitau enerabuang randana pa tate Yesusi renapa. 5Na awe Yesusi reo pi etonapa, I rearoana we ya endoao I. Impaina kewio we nyontarai piaya pai doyo, “Eh Neu kumai pa au, nemu sasari pa yupirandenia to!” 6Mana nayana kuru akama Yaudi pa embetotoi emayoi nayana, ya esanetatuata na esanerarong etoyo: 7“Topitotoi nyontarai nini kewio toyana pa. Wo nyontarai pei ne mambiri pea wa we dupirandeni sasari pa, mantau Allai memeari ki. I kengkani Allai.” 8Mana na yanato Yesusi piana aneao esanetatuata pa, impaina kewio doyo, “Pitoidonane mesanetatuata toyana na mesanerarongpai pae? 9Totoai mawa we etopana pa; ‘Yoyo, nemusasari pa piana yupirandenia to,’ ete yoyo ‘Towa, ruwa nemu kewang pai ruan to e’? 10Mana imbaro mesanekakepana we na nunei mamo Kumai Nyontarai nei ne paya we dupirandeni sasari.” Interi kewio we nyontarai we piaya wadi doyo, 11“Etopana we au, towa, ruwa kewang we buena naipai toweri to nemu manu pai!” 12Nyontaraipai tewa meraru riuwa ne kewang we denanai pai ria tori na nyontarai paya endena pa, impaina ya esarokutuya interi etaparanding Allai, etoyo, “We tonina pa tandeoa na ea wami.”

Yesusi yau Lewi we duari

(Mat. 9:9-13; Luk. 5:27-32)

13Piana pa Yesusi teweri ea to kareng ruru Galilea pai, nyontarai madu peaya enda wurima, interi I denyau ya. 14Interi Yesusi ria rire kareng yani pai, na awe ria na nu yani pai, I reo nyontarai weyau wiwai pei meyoi na manu weyau wiwai nai pai, anong pei Lewi, Alpiusi ne kumai dina. Interi Yesusi kewio wei doyo, “Ruama ruakong Yau!”. Impaina Lewi tewa interi riakong Yesusi.

15Interi na awe Yesusi meyoi dampi rai na Lewi ne manu pai pa, nyontarai we esau wiwai pa madui kong nyontarai we etong sasari paya, etampi kuira kong Yesusi kong ne nyontarai etuari paya, wo madu pea yati etuari paina. 16Na awe kuru akama Yaudi paya na pandura nyontarai embe Farisi paya, endeo Yesusi we meyoi dampi kuira kong nyontarai we esau wiwai paya kong nyontarai sasari paya na yana pa, engkawio we Yesusi ne nyontarai etuari paya etoyo, “Topitotoi mene Mantaunyau pai dampikong nyontarai weyau wiwai kong nyontarai embe sasari paya yana pa e?” 17Yesusi tarao ene kawiopa interi kewio weya doyo, “Nyontarai we esuiwa, eserai we doteri wa, mana nyontarai we esui paya; Erama nina era we eyau nyontarai we emai paya wa, mana we nyontarai embesasari paya.”

Nyontarai Yaudi ene anang pa parari puasa pa

(Mat. 9:14-17; Luk. 5:33-39)

18Apeana awe Yoanis Pembaptisi ne nyontarai etuari paya kong nyontarai embe Farisi paya embepuasa, interi nyontarai peaya endama engkawio we Yesusi etoyo, “Topitotoie Yoanisi ne we etuari paya kong nyontarai embe Farisi paya embepuasa, mana nemu nyontarai etua Au paya wereria nina pae?” 19Yesusi rioa weya doyo, “Topino, muang we nyari ne munara didau pai, yau ne pandura paya to ne munara didau pai ma mamo, ne pandura paya embepuasa e? Wereria ya etampi rai! 20Mana ingkai a we rama wane, muang didau pai engkori warui ya, nayana mamo ingkai embepuasa ki.”

21I sopang nari sosiau pei ea wu yara doyo, “Nyontarai pei pioabu irei awarung na asung waworu we dingkapioi na asung tawa nei wa, tutu na toyana pa irei awurungwe waworu nei pioabu asung we tawapai, interi ne we teabu pai ingkai beba raweina ea. 22Topiyana tato, nyontarai pei yoni angguri waworu wu kaketa piaung rerawa we tewa wadi wa, wo toyana mamo angguri waworu wadi ingkai yai ma dona kaketa tawa wadi teabu, kong angguri wadi tewowu mae kaketa wadi tekakutu. Mana angguri waworu wadi andi esoni na kaketa waworu pei tato.”

Yesusi ne nyontarai ura ea kodu paya engkutu potang pai na a Sabati pai

(Mat. 12:1-8; Luk. 6:1-5)

23Na a Sabati Yaudi pei Yesusi kong ne nyontarai etuari paya endakutu romi potang pei, kong na endakutu romi pai pa ne nyontarai paya etetang potang bongwau.1 24Nyontarai embe Farisi peaya endeo piwe toyana interi entopana we Yesusi etoyo, “Remoa! Pipatotoi nemu nyontarai etua Au paya enari pi uara we enari na a Sabati Yaudi pai pa e?”

25Interi Yesusi rioa weya doyo, “Mia wo piana metatora pitoai Dauti nyari pa, na awe i kong ne nyontarai paya embawi tutu ene roweang pea wa pa.2 26Aino Dauti yua to Allai ne Yawa Mamarang pai na awe Abyatari riuwe Imami Baba pa, interi dewa roti pa we dang kong dona we ne wetuari paya etang pa. Mana naina Kawio we Musai soipai wo, imamipa yati etampa.”3 27Interi Yesusi sopana we nyontarai embe Parisi paya doyo, “A Sabati nei mamo Allai nyari weuna we nyontarai paya kong Allai nyari nyontarai neya we a Sabati pai wa. 28Impaina Kumai Nyontarai nei mamo we Seni we a Sabati Yaudi pai tato.”