Markusi 1

Arera Parari Yoanis Pembaptisi

(Mat. 3:1-6,11-12; Luk. 3:3-6,15-17; Yoh. 1:19-28)

1Arera Weweng parari Yesus Kristusi, Allai Antung pai ainina pa. 2Arera Weweng yana pa parari na pampongpa nabi Yesayai soi na weraung mamarang pai doyo,

“Mesanekakepana, Yemi Neu mampaing pei we pempong Au.1

I ingkai nyari rangpaia menyena we Au.

3Nyontarai yani pai yau pampang na mapang wane:

‘Monyena rangpai we Seni,

Bong rangpai yeriwang we I.’ ”2

4Toyanapa Yoanis Pembaptisi meti na mapangpai kong wiuwua doyo: “Mesanetaweri warui mene sasari pa mae metong menetarai pa we ewebaptisi mia kong Allai ingkai dupirandeni mene sasari pa.” 5Interi nyontarai na raora Yudea tantenang kong na bendari Yerusalemi empau enda wurima. Mae ya endoao ene sasaripa we Allai. Impaina Yoanis webaptisi ya na maria Yordani. 6Yoanisi ne asungpa na unta netuing kong wai dingkae anerabuapai na piaung rerawa mae piwe dangpei kerayami kong dunung andiwa dukaru pa.3 7I wiuwua doyo: “Ingkai nyontarai pei riatuwa yau ma, I piaya raweing yau. Etuang we eyepa ne wai aebampa mamo emai wa. 8Yau ewebaptisi mia na maria, mana I ingkai webaptisi mia na Duainunung Mamarang pai.”

Yoanisi webaptisi Yesusi

(Mat. 3:13-17; Luk. 3:21-23; Yoh. 1:32-34)

9Na a yani pai Yesusi ria na Nasareti ma na raora Galilea, kong Yoanis webaptisi I na maria Yordani. 10Awe I meti warui mariapai pa, I reo rorapai tebau kong Allai ne Duainunung Mamarang pai perari aya mandung wia mawau meoi na I. 11Interi nyondaupui pei kewio na rora-marising pai maweu doyo, “Neu Kumai Aneuwiwuti pa Au, Auno aneuweng Au pa.”4

Nyombatang sou Yesusi

(Mat. 4:1-11; Luk. 4:1-13)

12Na ayani to Duainunung Mamarang pai dara Yesusi to mapang wanea. 13Na mapangpai I nyai woroi ape piakodu, I nyaina yana na piaung we na ri pa enemadu pa kuira mae mampang paya embesarawiri I. Na yana tato Nyombatang sou I.

Yesus denyawi na Galilea

(Mat. 4:12-17; Luk. 4:14-15)

14Na awe Yoanisi piana entapuri eampa Yesusi riato Galilea we wiuwu Allai ne Arera Weweng pa, 15kewio doyo, “A we Allai do riu we Mananu pa piana maito. Mesanetaweri kong mendoaoa we Arera Weweng pai!”5

Yesusi yau ne weetuari paya we retenang

(Mat. 4:18-22; Luk. 5:1-11)

16Na awe Yesusi ria rire kareng ruru Galilea arawa pa, I reo Simoni kong Andariasi, Simoni neta pai. Asaru umuna erang na ruru wadi, tutu asaru mamo mamung diang di asaru. 17Yesusi kewio we asaru doyo, “Mundama murua Yau, mae ingkai Yong maru mumbe mantapu nyontarai we etua Yau.” 18Interi umpika erangpa mae uruari. 19Kong Yesusi riatopong woroi katea mamo reo Yakobusi kong Yoanisi, Sebedeusi ne kumai pa asaru, urosaiwa une erangpai na wapai rarong pa. 20Interi Yesusi meraru Yau asaru, na yanato umpika untamami Sebedeusi, na wa wadi rarong kong nyontarai we engkonti paya mae urua Yesusi.

Yesusi nyari panang pa we nyontarai we semi-semi yumaoi na Kapernaumi

(Luk. 4:32-37)

21Yesusi kong ne we etuari paya empapa na Kapernaumi na a Sabati Yaudi piana tawa pa, Yesusi yua na manu Yaudi esominai pai mae denyau.

22Nyontarai we entaraoi paya esarokutuya kia. Wo I denyau ya pa parari nyontarai we ne mambiri, warui kuru akama Yaudi paya etanyau pa.6 23Na a yani na manu Yaudi esominai pai, nyontarai pei semi-semi yumaoi. I denana doyo, 24“Hei Yesusi nyontarai Nasareti pa Au, bong pitoi we amapae? Au bo mung amae? Yau ereuaroana we mateidi Aupa: We Momarang na Allai!” 25Mana Yesusi deirorai doyo, “Aidinau, moti warui nyontarai nini!” 26Semi-semi pai piodidou nyontarai wadi na kangkuna, interi denana na rauwapui poya mae meti warui nyontarai wadi. 27Nyontarai wauya engkai esarokutuya kia, impaina engkawio waweriao ya etoyo, “Pitoiandi sonini paie? Anyau waworu pina. I kewio na paya. I deirora semi-semi paya mae ya entuang wei.” 28Interi kawio parari Yesusi pa embuwua na mararu tate raora Galilea tantenang.

Nyontarai we empau Yesusi dosa empanang.

(Mat. 8:14-17; Luk. 4:38-41)

29Yesusi meti warui manu Yaudi esominai pai. Interi I ria kong Yakobusi kong Yoanesi wu Simoni kong Andariasi une manu pai. 30Simoni neoni wawingpai wiata tutu yui deininuanang. Ya emararua entopana we Yesusi parari wawingpai we yuipa. 31Impaina Yesusi riawu Simoni neonia, mae riu na warangpa, interi riupatari tewa. Ui deininuanang pa nyai warui mae i wesarawiri ya. 32Wopai ria do sawa, engko nyontarai tau we esui kong semi-semi yumao ya peaya wu Yesusi ma. 33Nyontarai tau we na bendari wadi embawawu ya na manu wadi ne aturarei repong pai. 34Interi Yesusi nyari nyontarai empau we etadu ui totoi empanang kong dedawa semi-semi pitau. I rioa wa, we semi-semi paya we engkawio pa, wo endearoani paina.

Yesusi denyau na bendari pea weiya

(Luk. 4:42-44)

35Kamaipai ayari dea wami, Yesusi tewa mae meti tori. I riato nu we mananopi mae tendau nayana. 36Mana Simoni kong ne maniwowi paya enda we eserai Yesusi. 37Na awe etaduti pa mamo engkawio etoyo, “Yaie! Nyontaraipa engkai eserai Au.” 38Mana Yesusi kewio weya doyo, “Mendama tanda to nupa ea, to bendari pa we kikeu na raora nini, imbaro na wana Ewuwu Arera Weweng nei, tutu aidonama Erama nina.” 39Interi I riato raora Galilea tantenang, mae na yana I wiuwu Arera Weweng na manu Yaudi esominai pa. I tato dedawa semi-semi paya warui nyontarai semi-semi yumao ya pa.7

Yesusi dong panang we nyontarai we yui pado pei.

(Mat. 8:1-4; Luk. 5:12-16)

40Nyontarai we yui pado pei riama meoi aebu na Yesusi renawau mae i dewara doyo, “Yaie! Muaya mamo, bong yau epanang.” 41Yesusi anewiwu kia we nyontarai pai. Impaina I riuwa warampa mae warawawu nyontarai wadi mae kewio doyo, “Yo emaya we au ponang, impaina ponang to.” 42A yanito ui pado pai nyai warui nyontarai yani, mae i penang. 43Interi Yesusi demi nyontarai wadi ria mae yuari na kangkuna, 44“Doyo Anengkakepana remo kowiora we nyontarai pei parari pinina pe, mana ruawu imami paya, mae bonyawi nentarai pai we piana ponangto. Mae bong pikika pieung pa we Allai tutu ponang pa, pikika pieung yani parari we Musai kewiora pa, imbaro we pianyawa we nyontarai paya kuira we taraie piana ponangto.”8 45Mana nyontarai wadi ria kewio kakera piyana mae wiuwua to nu totoi ea, impaina Yesusi ria denyawi rekami pa wa na nyontarai paya endenapa na bendari rarong pai. I nyai na raora we mananopi na bendari ri pa; mana nyontarai na nu pa totoi ea enda pampang wu Yesusi ma.