Alkitab Bahasa Ansus
Markusi 4
Sosiau parari nyontarai we riayang pikami
(Mat. 13:1-23; Luk. 8:4-15)
Na a pei Yesusi ria ea denyau na kareng ruru Galilea pai. Na yana nyontarai tau endama esoriwari I, impaina wieita to wa we deweoi na yana pai meyoi nai mae denyau nyontarai tau paya. Mae nyontarai tau paya etoa na reipa, na ruru arawa pai entarao ne anyau pa.1 Kong I denyau pi pau na sosiau weya. Na Ne anyau pa kewio weya doyo: “Mentarama! Nyontarai we nyari romi pei, ria ra riayang pikami pa. Na awe riayang pikami pa, ea tawa na rang arawa pa, interi aya paya esapoma etang ra kai. Ea tato tawa na kakopa wekami, we ne kakopa pa pau wa, interi pikami pa kemamai sua meraru tutu kakopa pa meni paina. Mana awe wopai piana wieita pa, pikamipai meninunung kong memaa tutu wewa wa. Ea tawa na nu we papea aisasinai rarong pa, interi papea aisasinai pai kemamaia beba kepang pikami paia keda, impaina webong wa. Mana pikami pa eaya tawa na kakopa wemai, pikamipai kemamai na wengkia kong webong, ne bongpai piau raweina, ea piarei ea ura raweina, ea piatoru raweina, ea tato piaring raweina.” Interi Yesusi kewio doyo, “Topino mentarakambirei pea mamo mentaraoa aiwara!”
Pitoai dona Yesusi kewio denyau na sosiau pa
Na awe Yesusi memeari pa, ne nyontarai etuari wauya kong ne nyontarai ura ea kodu wauya etutani parari sosiau yani. Rioa weya doyo, “We mia mamo Allai dong ne weweng pa we mesaneao pi anyuing parari Allai ne riu we Mananu pa. Mana we nyontarai endoaoa wa paya, pipatotoi Yenyau ya na sosiau pa. Imbaro
‘Endeoa kia, mana endearoana wa,
entaraoa kia, mana esaneoa wa,
imbaro endeo entaweri we Allai pe kong I dupirandeni ya pe.’ ”2
Interi I kewio weya doyo, “Mentapu sosiau nini pai wae? Toyana mamo topitotoi mentapu sosiau eaya kuira pa e? Mentarama. Nyontarai we riayang pikami pa mamo we wiuwu Allai Ne Arera pa. Pikami we tawa na rang arawa pa mamo, perari nyontarai we entarao Allai Ne Arera pai, interi Nyombatangpai riama dewa kawio we katene entaraoa yana warui ya. Toyana tato na pikami we tawa na kakopa wekamipa, perari nyontarai we entarao Allai Ne Arera pai mae na mararu etamamang we Arera pa na emararising, mana Allai Ne Arera pai wewoa na esanerarongpai wa kong naya katea ki. Na awe etadu didiwa pea tutu Allai ne kawiopa mamo, ya esutopui warui Seni. Pikami ea tawa na papea aisasinai, perariapi nyontarai we entarao Allai Ne Arera pai, mana ya esaneriru we topitotoi embeng na nunei pa kong endewe etadu ra we pau kong piwe moyawa pa. Piyana pa kuira yua to esanerarongpa apui kekepang Allai Ne Arera pai impaina webong wa. Mae pikami we tawa na kakopa areri pai, parari nyontarai we entarao kawio pa kong endu na wemai Allai Ne Arera pai, ya emparari ai we kemamai webong, ne bongpai piau raweina, ea we piarei ea ura raweina, ea we piatoru raweina kong ea tato we piaring raweina.”
Sosiau parari Padamara we engkawuni
(Luk. 8:16-18)
Interi Yesusi kewio weya ea doyo: “Nyontarai pei kiai ne padamara pei kewungwidori na babeu pei ete doni sura na pata pei wawa wa, mana doni yawa na rerawuani.3 Wo pitau we anyuing pa ingkai ra taparera kong we mawa wa ingkai tantaraoa ra dea.4 Topino mentarakambirei pea we mentaraoa mamo mentaraoa aiwara.”
Toyana Yesusi kewio naria ea doyo, “Neu anyau we mentaraoa pa mendetatuata aiwara. Wo nyontarai we endetatuata na wemai ya ingkai entapu Neu anyau pa pau raweina ea. Mae nyontarai we emba Neu anyau paya, maidau we wata ko yapa ingkai Eko warui ya tato.5 Nyontarai we dosaiwa anyau Yona weipa mamo ingkai Yona pau raweina ea wei. Mae nyontarai we dosaiwara wa we anyau dedutapa, mamo anyau katea we wata kontipa ingkai Eko warui.”6
Sosiau parari Allai riu we Mananu pa
Interi Yesusi kewio doyo, “Allai ne riu we Mananu pa mamo tonina: Parari nyontarai we riayang pikami pa na kakopa pa, piana riayania kai pa, i teweri wu ne manu pai ea, mae diru raida pikami pai kemamai beba. Impaina topitotoi pikamipai kemamai kong beba pa i rearoani wa. Kakopa pai andi donia webongpa, retenang peino weraungpai, interi nebopupai, katea ea mamo ne bongpai. Mae ra kioo ne bongpai na awe engkutui pa, nyontarai pai riara kiutui tutu awe engkutui pai riama to.”7
Sosiau parari pikami we kirinti wiri
(Mat. 13:31-35; Luk. 13:18-19)
Yesusi kewio eaya doyo, “Na pitoi ea tatona we tatintatua Allai ne riu we Mananupa eampae? Impaina Yo etopang sosiau pei we mia ea. Allai Riu we Mananupa netarai parari sosiau nini. Pitantanang pei ne kami pai kirinti warui pi kami na pitantanang na nunei pa. Nyontarai pei kioria riayang na kakopapa, pikami yani esawi we pitantang sesawi dina. Mana na awe piana kemamai pa, andi beba raweina warui raung ei pa kuira mae ne arirawani we baba. Impaina aya we esapo paya, esapo ma enari ene karaini na arirawani pa.”
Na sosiau pau toyana pa, Yesusi wiuwu Allai ne Arera pai we nyontarai paya. Yesusi denyau ya parari pitoai endekamana pa. Yesusi denyau nyontarai taubai paya mamo denyau ya pampang na sosiau pa, mana denyau ne nyontarai etuari paya mamo I kewio bauara dea weya.
Yesusi yua wanangpai kong tarowapai
(Mat. 8:23-27; Luk. 8:22-25)
Na a yani, awe rawandeng to, Yesusi kewio we ne nyontarai etuari paya doyo, “Mendama tantapira to ruru dowani.” Impaina Yesusi ne nyontarai etuari paya embeita to wa we Yesusi dewoi nai pai, interi ya etapai warui nyontarai empau paya. Wa eipa etapai konta. Woroi wami interi dowarapai wia era mae tarowa yao wapai rarongpai, impaina wapai kikeu we dewira. Na a yani Yesusi dena na wapai rarongpui pai, dukamipai wiata na aduana pei. Impaina ne weetuari paya embauni mae etoyo, “Kuruie, tangkada rai, mae anemutatuta we pianea wae?” Interi Yesusi doa, piayao dowara wadi mae kewio we ruru wadi doyo, “Aidina, modori to!” Interi wanang wadi kong ruru wadi medoria keda. Impaina Yesusi kewio weya doyo, “Totoai memataita pa? Totoai mendoaoa wa pa?”
Weetuari paya endeo piyana pa ematai kapara mae engkawio waweria weya etoyo, “Nyontarai neio mateina, impaina wanangnei kong tarowanei untuang wei pae?”
Source notes (7)
- Cross-reference Luk. 5:1-3
- Cross-reference Yes. 6:9-10
- Cross-reference Mat. 5:15; Luk. 11:33
- Cross-reference Mat. 10:26; Luk. 12:2
- Cross-reference Mat. 7:2; Luk. 6:38
- Cross-reference Mat. 13:12, 25:29; Luk. 19:26
- Cross-reference Yl. 3:13
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.