Markusi 5

Yesusi dedawa semi-semi pai warui nyontarai Gerasa pai

(Mat. 8:28-34; Luk. 8:26-39)

1Interi Yesusi kiong ne nyontarai ura ea kodu paya, esua na ruru dowani na raora nyontarai Gerasa paya. 2Katene, Yesusi wia warui wapai, mamo nyontarai we semi-semi paya esumaoi pai, wiana aisata wane ma dedu Yesusi. 3Nyontarai yani nyaina wana mae nyontarai pei piaya we dawiti wa, na wai besi ki, mana piokakutua, 4tutu i wo etawiti pampang na wai besi pa, mana wai besi pa piokakutua, impaina nyontarai pei piaya we riu widori wa. 5Raida diru dari na nu aisata wane kong na wipa mae ria denana, kong riora netaraipai na kami.

6Na awe reao Yesusi na woroi pa, depaia dedu Yesusi, suang meoi aebu yomi we I. 7-8Yesusi kewio we semi-semi paya doyo, “Eh, semi-semi pa au, moti warui nyontarai nini.” Mana nyontarai semi-semi pai yumaoi pai yeau kangkuna doyo, “Yesuse, Allai Wetedai Raweina pai Antung pa Au! Nemu pianea kong yau wa! Na Allai Anongpa yoyo remo bongtati yau pe!” 9Interi Yesusi dutang wu nyontarai we semi-semi yumaoi pai doyo, “Anomu pe?” Nyontarai wadi rioa we Yesusi doyo, “Anoupei Legioni1, tutu amampau kia.” 10Impaina nyontarai we semi-semi yumaoi pai, dewara kangkuna we Yesusi imbaro dedawa semi-semi paya emati warui raora yani pe.

11Na wana, na wi tararei wane tapui madupei eserai etampi na wana, 12interi semi-semi paya etewara kangkuna we Yesusi etoyo, “Bomi ama amasua na tapui wanea!” 13Yesusi rioa we piwe etewara pa. Interi semi-semi wauya ematia esua na tapui paya. Tapui paya empau piaura we ring we kodu, etapai esayadung na tararei pai wu ruru wadia engkada esarewa.

14Nyontarai we etaiwai tapui wauya etapaiya entopana na bendari pa kong awa na yana pa. Interi nyontarai wauya emati ma endeo pitoai tawa toyana pa. 15Ya endawu Yesusia, endeo nyontarai we rawandeng pe semi-semi esumaoi pai piana penangto. I meoi kong piana yesuni to. Impaina nyontarai paya ematai. 16Nyontarai we endeo piyana meari paya, engkawiora we nyontarai etapai ma paya, parari pitoi tawa pa na nyontarai semi-semi esumaoi pai kong piwe tawa na tapui paya pa. 17Interi nyontarai tau na raora yani etewara kangkuna we Yesusi imbaro ria warui raora enembau.

18Na awe Yesusi wieita naria meoi na wapai rarongpa, nyontarai katene semi-semi paya emati warui pai, dewara kangkuna imbaromi ria kong Yesusi. 19Mana Yesusi miaya wa, I kewio we nyontaraipai doyo, “Toweri wu manu nemu waneia, wu nyontarai na awa nemu pai kong topana weya, parari pitaubai we Seni nyari we au pa kong Anerarongpai weweng we aupa!”

20Impaina nyontarai yani pai ria mae wiuwua na raora Dekapolisi2, pitaubai we Yesusi dona na netarai nempai, mae ya kuira esarokutuya.

Yesusi dong Yairusi ne kumai pai penang, kong dong panangpa we wawing we yui dawing riapai

(Mat. 9:18-26; Luk. 8:40-56)

21Impaina Yesusi kong ne nyontarai etuari paya, etapai kutua na wapai to ruru dowani ea. Na ruru arawa pai, nyontarai madu peaya endama esoriwari Yesusi. 22Interi nyontarai we wedung na manu Yaudi esominai pai, anompei Yairusi. Na awe reo Yesusi pa i diangkai aebu pa. 23Kong dewara kangkuna wu Yesusi doyo, “Neu kumai wawing pai yui, waketo keda. Ruama bong waramupa wata na netaraipai, imbaromi penang kong keda wa.” 24Interi Yesusi riakong nyontarai yani. Nyontarai paya empau etuari kong etairora ya kikeu I.

25Na yanapa nyontarai wawing pei, piana pudape ura ea kodu yui dawing ria. 26I dedu didiwa pitau tutu pi nempa donara kai wu doteri paya we, imbaro etoni penaang. Mana penaang wa, wo ne uipai wemioya wa raweina ea. 27Wawing yani piana tarao kawio parari Yesusi, impaina na nyontarai we empau paya, i kikeu Yesusi na wapui kong dekatui Yesusi asung pampang pai. 28Wo anetatuata doyo, “Yepaia yekatui Ne Asung pampang pai ki, mamo epanaang.” 29A yani paito ui riapai menaing, kong i retuwa netaraipai piana penaang warui uipai to. 30Na a yani to Yesusi rearoana we mambiri pea mati warui netarai pai. Interi dedaiweri na nyontarai we empau paya kong dutang doyo, “Matei di riu Neu asung pampang nei pa e?” 31Ne nyontarai etuari paya etoyo, “Kurui e! Mantau remoa topitotoi nyontarai nini ya etairora ya kikeu Au, kong Au butang we matei dekatui Au pa nina e?” 32Interi Yesusi rewaria we reo matei dong piyana pa. 33Wawing yani pai metai kong didora, tutu aneao piwe tawa na netaraipai pa. Impaina ria ra suang meoi aebu pa na Yesusi renapa. Mae kewio parari pitoai nyari we Yesusi pa. 34Interi Yesusi kewio we wawingpai doyo, “Eh Neu kumai pa au, nemu roao Yau pa donama piana ponaang. Impaina ruana wemadoria. Kong nemu ui pai menaing warui au ea anto.”

35Na awe Yesusi kewio rai, nyontarai endama na Yairusi wewedung we manu Yaudi esominai pai ne manu pai ma kong etoyo, “Nemu kumai wawing pai piana keda to, remo woseung we ko Kurui eampe.” 36Mana Yesusi meidai tarao kawio enempa pe, mae kewio we wewedung we manu Yaudi esomi nai pai doyo, “Remo motai pe, roaoa ki!” 37Interi Yesusi rioa wa we nyontarai pei ria konti pe, mantau Petrusi, Yakobusi, kong Yoanisi, Yakobusi neta pai. 38Na awe endara etadu wewedung na manu Yaudi esomi nai pai ne manupai pa, na wana Yesusi reo nyontarai endotu, esai kong etaidu na endaupui poya. 39Interi Yesusi yua kewio we nyontarai wauya doyo, “Pitoi dona mia mendotupa kong mesai pae? Kumai nini kedawa, mana dena!” 40Mana ya emari Yesusi. Impaina Yesusi demi nyontarai paya enda tori warui manu pai. Interi kio kumai pai tamani kong nyani kong Ne nyontarai toru we itonda konti pai. Ya esua wu mandarong we etong kumai pai wianai pa. 41Interi Yesusi riu kumai yani warang pa doyo, “Talita kum,” ne arti pei: “Neu kumai wawing pa au, Etopana we au, towa to!” 42Na yanapa to kumai pai tewa doa ria, wo ne puda pe piana ura ea kodu paina. Nyontarai we enai na yana paya esarokutuya kia. 43Mana Yesusi derekamana kangkuna weya kia, imbaromi endeo embuwua piyana pa we nyontarai eaya pe. Interi I demi nyani kong tamani urong kumai pai dampi.