Markusi 6

Entampi Yesusi na awa nempai

(Mat. 13:53-58; Luk. 4:16-30)

1Interi Yesusi teweri kuira kong ne nyontarai etuari paya to mantau awa nempai. 2Na a Sabati Yaudi pai, I denyau na manu Yaudi esominai pai. Jemaati tau esarokutuya na awe entarao Yesusi denyau pa, impaina engkawio etoyo, “Naina totoi nyontarai nini dedu pitaubai yana pae? Anekurayang topitotoi pei nyontarai nini pai deduta pae? Tandoao wa we I wo nyari pitantuma yana pa. 3Tutu tata wo tandearoani we I wo tukang ai dina, Maria ne kumai, kong Yakobusi, Yosesi, Yudasi kong Simoni eneta dina. Ne Rarowawing peati engkong tatane.” Interi ya entampiri. 4Interi Yesusi kewio weya doyo, “Nyontarai nabi pei entuang wei na nupa totoi ea mana na awa mantau nempai, kong neta aririra paya kong ne mandarong paya entuang wei wa.”1 5Na nu yani Yesusi dong pitantuma koiri wa, aino dong nyontarai pe embe totoi empanang na riuwa warangpa oya. 6aI arokutuya tutu ya endoao wa.

Yesusi denatu nyontarai ura ea kodu we etuari paya we kaikodu.

(Mat. 10:5-15; Luk. 9:1-6)

6bInteri Yesusi riawaria na awa pei to awa pei ea mae denyau. 7I yau Ne manarua ura ea kodu paya mae denatu ya we kaikodu we embuwu Allai ne Kawio pa. I dong paya weya we etintadawa semi-semi paya, 8kong I derera weya imbaro endeo engko pianea na endampa pe, aino aisoipai ki, mana rotipe, kaketape, pe na waietingkae esanerabuang pa tato wengki.2 9Mia mesaya mesaembangpa mae mendeo mengko asung we metindiwang mia pea pe. 10I tato kewio doyo, “Topino na nupei nyontarai pei demamang mia na ne manupai mamo, menai nayana ki mempika nu yani. 11Mae topino menda sisu nu pei ea, kong topino nyontarai nayana emaidai etamamang mia kong emaidai entarao mia mamo, mempika nu yani. Mae mentatai wawu na mesaemi pa we uara weya.”3 12Interi manarua ura ea kodu paya, enda embuwua we nyontarai paya we andi esanetaweri warui ene sasari pa. 13Kong ya etadawa semi-semi we empau, kong esepu maning na nyontarai we esui we empau mae etong ya empanang4.

Herodesi demi pimamuna pei sekutu Yoanis Pembaptisi raukanang pai

(Mat. 14:1-12; Luk. 9:7-9)

14Mananu Herodesi tato taraoa parari Yesusi, wo anong pa piana tapira kong nyontarai engkawiora etoyo, “Yoanis Pembaptisi piana tewa na nyontarai engkada paya to, kong aidonane I ne paya we dong pitantuma pa.” 15Mana nyontarai peaya entopana etoyo, “Iwo Eliai na.” Eaya tato entopana etoyo, “I wo nabi pei parari nabi paya na a pampompa.”5 16Na awe Herodesi tarao piyana pa i kewio doyo, “Wereria, iwo Yoanis Pembaptisi we piana etekutu raukanangpai, mae andi tewa eampa.”

17Wo tarai Herodesi demi nyontarai entapu Yoanesi mae etoni yua to wangkapai, tutu kio neta Pilipusi ne wawini Herodiasi we riauti pa. 18Tutu Yoanisi piana yua Herodesi pampang doyo, “Remo ko nemetapai ne wawini we ruauti pe, yana mamo nari pisarara pa we Kawio Musai soi pa!”6 19Tutu yana pa donane Herodiasi anekayou Yoanisi mae anetatuata we do miuni mana deduta wa. 20Wo Herodesi menduani we rearoan Yoanisi wo nyontarai mei kong memarang dina. Impaina demi ne pimamuna paya etawu Yoanisi na wemai na wangka rarong pai. Na awe Yoanisi kewio mamo Herodesi anerarong pai wemadori wa, toyana ki mana anewe tarao Yoanisi ne kawio pa.

21Toyana ki mana Herodiasi tato dedu a we miung Yoanisi, na awe Herodesi dong munara we ne a nyani dawini pai. Na a yani i nyari munara baba we ne we endu anong tadai na ne wemananupa, we perwira baba paya kong we weempampong na rai Galilea paya. 22Na a yani Herodiasi ne kumai wawing pai riama kong meai. Ne meai pa wiaua Herodesi kong nyontarai we empanduya paya esanerarong pa. Mananu wadi kewio we karawing wadi doyo, “Pitoai anembea pa buewara ki. Yau ingkai yona we au!” 23Interi Herodesi pepora wei doyo, “Pipatotoi ea we buewara pa ingkai yona we au, aino neu eruwe mananu ne wopea!” 24Kumai wadi ria dutang nyani doyo, “Pitoai ingkai yewari pa e?” Nyani kewio doyo, “Yoanis Pembaptisi dukamipai!” 25Interi kumai wadi teweri merarua wu mananu Herodesi mae kewio doyo, “Yau yewarapi, na nina tato Yoanis Pembaptisi dukamipai na parawai pei!” 26Mananu Herodesi tarao kawio pa anerarong pai yai kia, mana tutu piana i pepora to na nyontarai we endawurima pa endenapa impaina i sampi piwe kumai wawing pai dewara pa wa. 27Interi Mananu wadi demi nyontarai maninuing pei we imbaro kio Yoanisi dukamipai ma. Nyontarai yani ria sekutu Yoanisi raukanangpai na wangka rarong pai. 28I kio dukamipai na parawai pei mae doni wu karawing wadi mae karawing wadi doni we nyania. 29Na awe Yoanisi ne we etuari paya entarao piyana pa, ya endama we engko Yoanisi netarai kakopa wadi, interi etatari.

Yesusi dong nyontarai embe piaura wering we ring (5,000) etampi

(Mat. 14:13-21; Luk. 9:10-17; Yoh. 6:1-13)

30Interi rasuri we rawandempe Yesusi denatu ya pa, ya entawerima empandura kong Yesusi mae entopana Wei pitau we piana enari kong etanyaua pa. 31Tutu nyontarai tau peati endama kong eaya tato entaweri, impaina etadu a pea we etampi wa. Interi Yesusi kewio weya doyo, “Mendama tandato nu we mananopi imbaro tamameari na wana mae tambaua tata katea.” 32Impaina ya esana wapai we etanyuing enetarai pai to nu we mananopi. 33Mana na awe ya eto etapai pa, nyontarai we empau paya endeo ya kong piana esanetatua etapaitoa pa to. Impaina nyontarai we empau paya na bendari na nu yani pai, ya enda emararu na rang reipai, empampong na etamang na nu we Yesusi etapai wea pa. 34Na awe Yesusi wia warui wapai torei pa, I reo nyontarai we empau paya. I anewiwuo ya, wo ya emparari domba we engkiari mantaiwai. Interi I denyau anyau madupei weya.7 35Piana wopai ria domemang we diru, ne nyontarai etuari wauya endawurima engkawio etoyo, “Nu nini menanopi kong piana do diruto. 36Bomi ya entaweri imbaro ya embori roweang pea weya na awa we kikeu na nina pa.” 37Mana Yesusi doyo, “Miati metongsa etampi pa!” Yesusi ne manarua ura ea kodu wauya etoyo, “Topitotoi andi amandara amambori roti ne arga pe peraki8 piaura rai e? Wereria wiria.” 38Interi Yesusi dutang weya doyo, “Roti pa bototoi ai menempa e? Mia mendeoa wo!” Ya endeoa, impaina etoyo, “Roti pe boring kong diang pe kodu.” 39Interi I demi nyontarai paya engkai emayoi takakutui na naningpung pa wawong. 40Toyana ya emayoi takakutui pa eaya piaring, kong eaya piakodua ura. 41Interi Yesusi piana kio roti boring pa kong diang kodu pa, I reo to rora peidi dewa piboki, interi piobabau roti pa mae dona we ne nyontarai etuari paya, imbaro embiwo we nyontarai paya toyana tato na diang pa, ya embiwo we nyontarai we empau paya engkai. 42Interi nyontarai paya kuira ya etang ki emoi. 43Toyana nyontarai pa endurikui wopape we tantenang pa dedu bayai pe ura ea kodu donung. 44Nyontarai muang we etang roti pa embe piaura wering we ring (5,000).

Yesusi riana ai wawong pai

(Mat. 14:22-33; Yoh. 6:16-21)

45Yana rakaipa Yesusi meraru deirora ne manarua paya, embeita to wapai mae etapai pampong to ruru dowani, to bendari Betsaida, mae I demi nyontarai we empau paya entaweri. 46Piana Yesusi pika nyontarai paya, I ria to wi peia we tendau nayana.

47Na awe piana diru to, ne nyontarai ura ea kodu wauya etapaia sisu ruru rabuang paito, mana Yesusi nyai meari na rei pa rai. 48Awe I reo ya we esaseung we embo wa wadi tutu esoa wanang yopai, a yani piana diru rabuang wake saraka riora botoru wu bowonang ayari pa. I ria na ai wawong pai wu yara mae I dongparari ingkai ria raweing ya. 49Awe ya endeoi ria na ai wawong pa, ya etorato I wo wori dina, interi ya etanana pampang, 50wo ya engkai endeo I mae ya esarokutuya kia. Mana I meraru kewio weya doyo, “Aidimia! Yau nina, mendeo mematai pe!” 51Interi I wieita na wa wadi wu yara eai mae wanangpai medori. Ya esarokutuya kia tutu piwe tantuma yana. 52Wo piwe tawa na roti pa mamo ya esaneatori wami, mae ya esanerarong pa kabung.

Yesusi dong panang we nyontarai we esui na raora Genesareti

(Mat. 14:34-36)

53Na awe empapa na ruru dowani, ya etawoi na kareng Genesareti. 54Katene emati warui wapai pa, na mararu nyontarai pa endearoni we Yesusi riama yani. 55Impaina nyontarai paya etapai tate nupa kai, mae engko nyontarai we esui paya na andaung wawong pa wu Yesusi, to nu totoi we entarao I nyaina pa: 56To nu totoi ea I ria oapa, na bendaripa ete awa pa. Nyontarai pa empika we esui paya wu nu awayang pa mae etewara we Yesusi imbaro etakatui Ne asung pampang pai ki. Kong nyontarai tau we etakatui Yesusi ne asung pampang pa empanang.