Alkitab Bahasa Ansus
Markusi 7
Allai ne airorapa kong Yaudi pa ene anangpa
(Mat. 15:1-20)
Apeana nyontarai we embe Farisi embetotoi kong kuru akama Yaudi paya embetotoi, enda na Yerusalemi wu Yesusi ma. Endeo Yesusi ne nyontarai etuari paya embetotoi etampi na endoi embaramipa wa. Ya etong parari Yaudipa ene anangpai wa. Wo nyontarai embe Farisi paya emparari nyontarai Yaudi peaya we etampi wa aino endoi embaramipa wa, tutu endukepang kanang na entapumi paya pa. Kong entaweri na pasaripai mamo etampi wa mana endoipapi ene taraipa pampong wo. Kanang madupe ai endu pa, parari endoi nyopi, babeu kong piawawa ea we enari na tembaga pa. Nyontarai embe Farisi kong kuru akama Yaudi paya, ya endukepang kanang na entapumipa na wemai. Ai donama etutang Yesusi etoyo, “Pitoai donama nemu nyontarai etua Au paya embeng parari kanang tantapumi woriai paya wa, mana etampi na embarami pa kararia nina pae?” Yesusi rioa weya doyo, “Pitoai na pampompa Allai kewiora na Ne weraung mamarang pai na nabi Yesayai parari mia nyontarai metong sambamboni pa, piana tawa to, aino soi doyo,
‘Kawasa nini esomi we Yau na esoremi arawa,
tutu esanerarongpa woroi warui Yau.1
Ya wo esomi we Yau na weuna wa
wo anyau we etanyauwa pa mamo airora na nyontarai pina.’ ”2
Yesusi kewio pampang doyo, “Allai Ne kawiopa metongpararia wa, mana metong parari kanang na nyontarai paya.”
Interi I kewio naria ea weya doyo, “Tarai memanuainung kia we mentampi Allai ne airora pai, imbaro metarara kanang mantau menempai pa. Tutu Musai piana sopana doyo,
‘Tuang we tamamui kong nyamui,
mae
matei di piora tamani kong nyani mamo ingkai keda.’ 3
Mana mia metanyau metoyo, ‘Pianea wa, we topino topana we tamamui kong nyamui asaru boyo, piwe yona we yimpata marupa piana yona we Allai eampa.’ Pitoai mia metaunyauwa toyana pa piana dong nyontarai yani anewaweri we tamani kong nyani asaru wa. Na anyau metanyauwa toyana pa denyawa we Allai ne Arera pai mempikara we metongparari mene kanangpa. Kong pi pau toyana pa mia metong pararia tato.”
Impaina Yesusi yau nari nyontarai we empau paya, interi kewio doyo, “Mia mengkai mentara mamoo Yau, kong mesanekakepana na wemai. Pipatotoai na ripa, yua na nyontarai pei apui pa, kio kararia wa, mana ne metitori na nyontaraipai, yanaino kio kararia pa.” [Mate au wetarakambirei pea we taramoa mamo, andi taramoa aiwara!]
Interi ria yua na manupei we pikari warui nyontarai empau paya, na yana ne nyontarai etuari paya etutani parari sosiau we katene I sopani yana. Impaina rioa weya doyo, “Mia tato mesanetatuata wae? Menduinaria wa we piwe na ri pa yuato nyontarai pei mamo dong kararia wae? Tutu we yua pa, yua wu tasanerarong pai wa mana wu tasanemipai, interi tampikara na neainipai.” Na toyana pa I kewio kangkuna we roweampa kuira we tapua wa na Allai renapa. Kewio naria ea doyo, “Pitoai meti tori na nyontarai pei anerarongpai, yana paino dong nyontaraipai kerariapa, wo na rarong, na nyontarai anerarong pai anetatua pimamuna pa kia ai donapa; memota, menanapi, miung nyontarai, dena kong nyontarai ene muang ete wawini, rekami baba we nepi, nyari pi mamuna pa, weangkari barui, nyari pi meniniawari pa, anerarong yui we nyontarai, kengkani nyontarai, anerarong tedai kong dungkamipai meitui. Pimamuna pitau nina paino meti na anemurarong kong kio kararia we nyontarai neya pa.”
Wawing Siro-Fenisia we rioaoa Seni
(Mat. 15:21-28)
Interi Yesusi ria warui nu yani mae ria to raora kikeu we bendari Tirusi. I yua to manu pei kong aneoa wa we nyontarai pei reaoi pe, mana ne riama pa anyuing wa. Nyontarai wawing pei ne kumai wawing pai semi-semi yumaoi. Na mararu tarao parari Yesusi we riama pa, interi ria meoi aebu pa na Yesusi renapa. Wawing wadi mamo nyontarai Yunani dina na kawasa Siro-Fenisia. I dewara kangkuna we Yesusi we dedawa semi-semi pai warui ne kumai wawing pai. Interi Yesusi kewio wei doyo, “Au wo nyontarai Yaudi di au wa, impaina topino epata au mamo, mai parari nyontarai we andi dong roweang we ne kumai paya, mana roweang yana ne kumai paya etampia emoi wami, mae roweangpa yoa wu wona wadi.” Mana wawingpai kewio doyo, “Senie, tarai. Mana wona we na meja wawa pai etang keang we kumai paya etona tawa na mejapai aweu pa.” Impaina Yesusi kewio we wawingpai doyo, “Toweria, tutu kawio topana pa denyawa we roaoa tarai, impaina semi-semi pai meti warui nemu kumai pai eampa.” Wawingpai teweri to ne manupaia, interi deduta we ne kumai pai wiata na aidisa na ne andaung pai, mae semi-semi pai piana metiwaruia.
Yesus nyari nyontarai tarakambirei paro kong woremamong penang
Interi Yesusi ria warui raora bendari Tirusi ea mae ria pampangna ria rire raora bendari Sidoni to ruru Galilea pai, ria na rabuang raora Dekapolisi. Na yana nyontarai pea engko nyontarai we tara-paro kong woremamongpei wu Yesusia kong etewara we I, imbaro riuwa warangpa na nyontarai yani. Mae piana Yesusi kiori warui nyontarai empau paya, impaina umameari. I suwa warakeapai to tarakambirei pai, interi kenyuo mantau warakeapai mae suwari wu nyontaraipai worepang paia. Interi Yesusi reo to rorapai pioa asengpa mae sopana doyo, “Efata!” na kawio enempa, mamo, “Teparera.” Impaina na a yani to nyontaraipai tarakambirei kodu pa teparera we tarana, mae na yana tato ui riuwido worempai penang mae kewio na wemai. Yesusi derekamana we nyontarai we enai nayana pa imbaro endeo engkawiora we nyontaraipei pe. Yesusi yua ya toyana pampang ki, mana kawasa paya embuwua pampang we nyontarai eaya paya. Ya esarokutuya kia kong etoyo, “I nyari pitaubai pa wengkia, we entarakambireipa paro pa entaraoa, we esoretamung pa engkawio.”
Source notes (3)
- Cross-reference Yes. 29:13
- Footnote Yesayai 9:13
- Cross-reference Kel. 20:12, 21:17; Im. 20:9; Ul. 5:16
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.