Alkitab Bahasa Ansus
Markusi 8
Yesusi dong nyontarai pe embe piaura we ring we manua (4,000) etampi
(Mat. 15:32-39)
Na ayani nyontarai we empau kia endama empandura na yana. Ya ene roweang pea wa, impaina Yesusi yau ne manarua paya ma mae kewio doyo, “Aneurarongnei aneuwea tutu anewiwuo nyontarai we empau nea. Wo piana ape botoru to ya etua Yau kong ya ene roweang pea wa. Kong topino Yemi ya entaweri to ene manu wane na embawi mamo, ya ingkai entabari na rang rabuang wanei, wo ea yati enda na raora we woroi wane ma paina.” Ne manarua paya engkawio etoyo, “Topino raora nini pai menanopi paina, na totoi amatadu roti pe pau kia we nyontarai nea etang ki emoi pa?” Yesusi dutang weya doyo, “Mia mene roti pe bototoi?” Ya etoyo, “Boitu.” Interi I demi nyontarai we empau paya emayoi na kakopa pai. Na yana I kio roti boitu pa, dewa piboki oa, piobabaua mae dona we Ne manarua paya we ya embiwoa we nyontarai we empau paya, interi ya etong pararia. Ya tato ene diang maia pea, kong piana I dewa piboki oa, interi demi ya embiwoa ea. Interi nyontarai empau paya etampia emoi. Interi endurikui roti wopape tantenang pa ea, paupa bayai pe boitu. Nyontarai paya wake piaura we ring we manua. Interi Yesusi demi ya enda. I meraru wieita to wa wadi kong Ne manarua paya mae entampira to raora Dalmanuta.
Nyontarai embe Parisi etewa kamang
(Mat. 16:1-4)
Interi nyontarai embe Farisi pe embetotoi enda wu Yesusi ma, ya embawari kong Yesusi. We entou I paina, ya etewa kamang pei kong Yesusi kamang we rana Allai.1 Impaina Yesusi anerarong dutani tutu kawio entopana pa, interi kewio doyo, “Pitoiandi nyontarai na pui nina ya etewara we enari kamang pae? Yau etopana we mia, tarai we nyontarai nisa topitotoi kia, Yau enari kamang pei wa.” Yesusi pika ya, interi I wieita wu wapai mae entampira to ruru dowani.
Parari ragi nyontarai embe Parisi kong ragi Herodesi
(Mat. 16:5-12)
Yesusi ne manarua paya emparandeng engko rotipa, mae koiri ki andi engkori na wa rarong pai pa. Interi Yesusi yua ya kewio doyo, “Metamamang kong aidimia kong we ragi nyontarai embe Farisi kong ragi Herodesi aino etong ene unawa pa.”2 Interi Yesusi ne manarua paya engkawio waweriao ya etoyo, “I kewio toyana, tutu tatawo tane roti pea wa.” Na awe Yesusi aneaoa pitoiai engkawiorapa, I kewio doyo, “Pitoi mia metoyo mengkiari roti peawa pae? Mia tato mesanetatuata kong mesanekakepana wa e? Mesanerarong pa maitui kia, impaina mesanetatua piwe katene tawa pa wa e? Mia mendekami we mendeoa to, mana pipatotoi mendeoa wa pae? Kong membetarakambirei we mentaraoa, topitotoi mentarao wa e? Piana memparandenia pe,3 awe piobabau roti pe boring we nyontarai pe piaura wering we ring etang pa, roti wopapepa tantenang pa dedu bayai bototoi pa e?” Ya engkawio etoyo, “Bayai pe ura eya kodu.” Kong awe roti pe boitu we nyontarai pe empiaura wering we manua pa, mendurikui wopape we tantenang pa dedu bayai bototoi pa e? Ya etoyo, “Bayai boitu.” Interi Yesusi kewio weya doyo, “Impaina mia mesaneaoa wami e?”
Yesusi dong panang we nyontarai rekabe na Betsaida
Na awe Yesusi kong ne manarua paya etapaia sisu na Betsaida pa. Na yana nyontarai pa embetotoi engko nyontarai rekabe pei wu Yesusi ma, ya etewara wei imbaro I warawawu nyontarai rekabe wadi. Interi Yesusi riu na nyontarai rekabe wadi warang wau mae kiori tori warui awa yani. Interi I kenyuo nyontarai wadi rekami wau kong warawawuri mae dutani doyo, “Piana au remo pianea tone?” Interi nyontarai wadi retopong mae kewio doyo, “Yau erewo nyontarai paya etoa enda mana erewo ya emparari ai.” Interi Yesusi warawawu nyontarai wadi rekami pa ea, impaina nyontarai pai reoa tarai kong piana penang. Toyana i reo pipatotoi ea na dea. Interi Yesusi demi nyontarai wadi teweri to ne manu paia mae kewio doyo, “Remo wua to bendari pai pe.”
Petrusi rioa we Yesusi wo Mananu Mampariri dina
(Mat. 16:13-20; Luk. 9:18-21)
Interi Yesusi kong ne nyontarai etuari paya endato awa we nai na raora kiria we Kaisarea Pilipi. Na rang rabuangpa I dutang we ne nyontarai etuari paya doyo, “Nyontarai pa entopana etoyo mateidi Yau pae?” Ya endoa etoyo, “Eaya entopana etoyo, Yoanis Pembaptisi, eaya tato entopana etoyo, nabi Eliai, eaya tato entopana etoyo, nyontarai pei na nabi na pampong paya.”4 Yesusi dutang weya ea doyo, “Na mia mamo matei di Yau pae?” Interi Petrusi rioa doyo, “Au wo Mananu Mampariri di Au.”5 Interi Yesusi yua ya na kangkuna imbaro endeo embuwua we ei ea parari I pe.
Yesusi retenang kewio parari ne kaidapa kong parari topitotoi nyontarai etuari pa pitoi etaduta pa
(Mat. 16:21-28; Luk. 9:22-27)
Interi Yesusi denyau ne manarua paya doyo, “Kumai Nyontarai nei andi yedo uira tau ki. Mananu Yaudi paya, we embedung we imami paya, kong kuru akama Yaudi paya ingkai entampiri, kong emuni mae piana ape botoru ea mamo I tewa naria ea.” Yesusi kewio piyana pa na anyuing wa we ne manarua paya. Mana Petrusi pio Yesusi topui, mae yuari. Impaina Yesusi dedaiweri yeo ne nyontarai etuari paya mae I yua Petrusi kewio doyo, “Nyombatang pa au rua warui reunane, wo au anemuao piwe Allai anetatuata pa wa, mana au anemutatua parari we nyontarai esanetatuata pa.”
Interi Yesusi yau nyontarai we empau paya kong ne manarua paya mae kewio weya doyo, “Nyontarai pa matei do dua Yau mamo andi pika pitau nempa, kong yedo ne aitabapai mae dua Yau.6 Tutu nyontarai pa matei do derara duainunung pai, i ingkai duainunung pai nyai; mae nyontarai pa matei na nunei nini anewiwu Yau kong Neu Arera Weweng nei donane duainunung pai nyai warui, i ingkai dedu wieng ki woroi-woroi7. Moyawa we nyontarai pei yerai dedu nunei tantenang mana i duainunung pai nyai. Tutu pitoandi ingkai dona we dindiwang duainunung pai pae? Wo nyontarai pa mateidi memaya rioa tutu Neu anyau ne kong Neu kawione na nyontarai etong sasari kong nyontarai pui nina we enukepana wanea wa enemadukuira nina mamo, Kumai Nyontarai nei tato ingkai memayao nyontarai yani na awe I ria taweri na Tamani ne wedea raweina pa rarong, kong mampang we emamarang pa etaruari pa.”
Source notes (7)
- Cross-reference Mat. 12:38-39; Luk. 11:16,29
- Cross-reference Luk. 12:1
- Cross-reference Yer. 5:21; Yeh. 12:2; Mrk. 4:12
- Cross-reference Mrk. 6:14-15; Luk. 9:7-9
- Cross-reference Yoh. 6:68-69
- Cross-reference Mat. 10:38; Luk. 14:27
- Cross-reference Mat. 10:39; Luk. 17:33; Yoh. 12:25
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.