Markusi 9

1Yesusi kewio naria ea weya doyo, “Yau etopana we mia, taraie na nyontarai we endama nea nina, ea engkada wa ki endeo Allai ne riu we Mananu pa ria na mambiri ma pa.”

Yesusi ne tarai dea ra wieria na wi pei

(Mat. 17:1-13; Luk. 9:28-36)

2Ape bowonang we dapira pa, Yesusi kio Petrusi, Yakobusi kong Yoanisi mae kiong ya I wieita to wi we tedai pei. Nayana mantau ya emeari ki. Interi Yesusi rekamipa ra weia ea na endenapa,1 3mae Ne asungpa buara wieria. Nyontaraipei wa na nunei we pia asung pa, ei pia asungpa ra biua peraria wa. 4Interi na tantuma Nabi Eliai kong Nabi Musai untapira ma uroa ungkawio kong Yesusi. 5Petrusi kewio we Yesusi doyo, “Kuruie, wengkia we tanaina raora nini pai. Ama ingkai amanari yawa pe toru, koiri we Au, koiri we Musai kong koiri we Eliai.” 6I kewio toyana pa, wo riuinari pitoai sopana pa, tutu ya ematai kia. 7Interi mandipi pei wiama kewungwido ya mae na mandipi rarong pai nyondaupui pei kewio doyo, “Neu Kumai we aneuweni pina, mentarao I.”2 8Na tantuma, awe endewawariao raora yani pai, ya endeo nyontarai pei wa, wo mantau Yesusi meari.

9Na awe embia warui wi pai, Yesusi derekamana we ya, imbaro endeo embuwua we nyontarai pei pe we piwe endeoa pa, kioo Kumai Nyontarai pai tewa na nyontarai we engkada paya ene madukuira pa. 10Ya endu arera wadi mae etutang waweriao ya pipatotoandi daoi tonini doyo, “Kumai Nyontarai nei ingkai tewa na nyontarai we engkada paya enemadu pa.” 11Interi ya etutang we I etoyo, “Pitoandi kuru akama Yaudi paya entopana we Eliai andi ria pampong mawo?”3 12Yesusi sopana weya doyo, “Tarai Eliai ingkai ria pampongma kong dong pitau nea manyena we Mananu Mampariri ingkai riama pa. Mana topitotoi na Arera Mamarang pai soikamana we Kumai Nyontarai nei, I ingkai dedu didiwa pitaubai kong ingkai nyontarai entatipari pa e? 13Mana Yau ekawio we mia: tarai Eliai piana riama to mana nyontarai etongpampinomi na weuna wa parari we mantau esaneaoapa. Piyana parari pitoi entoi na Weraung Mamarang pai parari i pa.”

Yesusi dong panang we kumai we dedu semi-semi

(Mat. 17:14-21; Luk. 9:37-43)

14Na awe Yesusi, Petrusi, Yakobusi kong Yoanisi entaweri wu Ne manarua ea wauya pa, ya endeo nyontarai we empau esoriwari Ne manarua ea wauya pa. Mae kuru akama Yaudi embetotoi embawari pianea kong ya. 15Na awe nyontarai we empau endeo Yesusi pa, ya esarokutuya kong ya engkai etapaia etamang Yesusi. 16Interi Yesusi dutang ne manarua ea paya doyo, “Pipatotoandi membawari kong ya wei pae?”

17Nyontarai pei na we empau paya kewio doyo, “Kuruie, neu kumai nei engkori wu Auma, tutu semi-semi dauwi ki woretamung. 18Kong anemai, na awe semi-semi pai yumaoi pa, i keyai to kakopa wawong wadi, mae wore kowowuai kong keridereng, netarai tepapari. Yau piana yewara we nemu nyontarai etua Au paya, imbaro ya etadawa semi-semi pai mana ya etaduta wa.” 19Interi Yesusi kewio weya doyo, “Eh, nyontarai pui we mendoaoa wami pa ni mia, ape bototoi ea Yau andi yemamang mia we mendoaoa pae? Mengko kumai pai ma!” 20Interi engko kumai wadi wurima. Awe semi-semi pai reo Yesusi pa, pyodidou kumai wadia netarai pai tepapari, kong kumai wadi wiata keidui na kakopa wadi, woreng pa wekowowuai. 21Interi Yesusi dutang we kumai wadi tamani doyo, “Piana ape bototoi woroi dedu piwe tonina pae?” Tamani kewio doyo, “Piana na kumai nei meia pa. 22Kong ea mamo semi-semi piapari to adia wadi rarong ete wu maria wadi rarong we miuni. Mana topino Yai Au boduta we puata mamo, anemuwiwu we ama kong puata ama.” 23Yesusi yuari doyo, “Topitotoi Au topana boyo: Topino Au boduta e? We nyontarai endoaoa paya mamo pitaubai pa, mawa kia!” 24Nayana to kumai wadi tamani denana doyo, “Yau eroaoa. Puata yau, nyontarai we eroaoa wa nea yau!” 25Awe Yesusi reo nyontarai we empau enda pampang ma we empandura pa, I yua semi-semi pai na paya doyo, “Eh semi-semi we bona mamo kumainei woretamung kong pero pa au, Yau yeirora au moti warui kumai nini kong remo wua taweri eampe!” 26Interi semi-semi pai meti kong denana mae pyodidou kumai wadi na kangkuna. Kumai wadi riaperari nyontarai we keda, impaina nyontarai we empau paya engkawio etoyo, “Kumaipai piana keda to.” 27Mana Yesusi riu na kumai wadi warang wau mae biauni interi kumai wadi mantau tewa.

28Na awe Yesusi piana yuana manu wadi, mae ne manarua paya mantau engkonti. Ya etutani etoyo, “Pitoi donama amatadawa semi-semi nei wa pae?” 29Yesusi kewio weya doyo, “Pi tonina pa mamo mantau metadawa na mentandau nei ki.”

Yesusi kewio nariaea parari ne kaida wau

(Mat. 17:22-23; Luk. 9:43-45)

30Yesusi kong ne manarua paya enda warui nu yani mae enda rirera na raora Galilea, kong Yesusi meidai nyontarai pea endearoang piyana pe, 31wo I denyau ne manarua paya paina. I kewio weya doyo, “Kumai Nyontarai ingkai entampiri we nyontarai embararong pa, mae ya emuni, mae piana ape botoru eampa, I tewa warui kaidapa pai.” 32Ya esaneao kawio yana wa, mana ya ene barui pea wa we etutani.

Matei beba raweina pa

(Mat. 18:1-5; Luk. 9:46-48)

33Interi Yesusi kong ne manarua paya enda sisu na Kapernaumi. Na awe enda sisu na manupai, I dutang we ne manarua paya doyo, “Pitoai katene mengkawiora na rang rabuang pae?” 34Mana ya aidisa, wo na rang rabuang pa embawaweri ya we matei di beba raweina naya pa.4 35Interi Yesusi meoi mae yau ne manarua ura ea kodu paya, kewio weya doyo, “Topino nyontarai pei anewe do weretenang mamo, andi piria nyamui warui ya engkai mae i wesarawiri nyontarai paya kuira.”5 36Impaina Yesusi kio nyontarai kumai pei mae doni meoi na enemadukuira pa, interi I tepu kumai wadi mae kewio weya doyo, 37“Matei yewawa kumai pei parari ninane na anou Ne, i yewawa Yau. Mae matei yewawa Yau mamo, i yewawa Yau meari wa, mana i kong yewawa we demi Yau pai tato.”6

Nyontarai dua Yesusi wa dedawa semi-semi

(Luk. 9:49-50)

38Yoanisi kewio we Yesusi doyo, “Kuruie! Ama wo amandeo nyontarai pei we dua tata wa dedawa semi-semi pai na Anomu pa, interi amasua nyontarai wadi, tutu i dua tata wa.” 39Mana Yesusi kewio weya doyo, “Mendeo mesuari pe! Wo nyontarai pei wa, we piana nyari pitantuma na Anoune, na mararu i kengkani Yau wa. 40Nyontarai pei doamuna we tata wa, mamo i tebari we tata.7 41Tarai, Yau ekawio we mia we nyontarai pa matei dong maria nyopi koiri we metunumi tutu mia wo metua mananu Mampariri pai paina, i ingkai dedu ne wiwai pa.”8

Piwe donane nyontarai etong sasari

(Mat. 18:6-9; Luk. 17:1-2)

42“Nyontarai pa mateidi donama kumai endoao Yau paya ei dong sasari mamo, weng wei peino engkae kami pai na raukanangpai mae engkai to rawanang pai. 43Parari waramupai dong sasari mamo, tuekutui, tutu wengpei wua to wieng kio woroi-woroi pa na waramu kawuru, yana pa mai raweingna warui waramu kodu mae eso au to rawanang adia pai, to adia rarong we meo na ea wa.9 [44Na raora yani pai awi pa engkada wa, kong adia pai meo wa.] 45Topino aemupai dau au bong sasari mamo, tuekutui, tutu weng peino wuato wieng ki woroi-woroi pa na wokikoi, weng warui aemupa kodu mana eso au to rawanang adia rarong pai pa; [46na raora yani awi pa engkada wa, kong adia pai meo wa.] 47Toyana rengkamipa dau au we bong sasari mamo koraipai, tutu weng peino wuato Allai ne riu we Mananu pa na rengkami pa koiri weng warui rengkamipa kodu mana eso au to rawanang adia rarong pai,10 48na raora yani awi paya engkadawa kong adiapai meo wa.11 49Tutu nyontarai pa koiri-koiri ingkai entou ya na adia. 50Ai wadi wo weng mana topino ai wadi merandeng mamo mia metonia we ai taweri wa. Impaina na membengpa andi memparari ai, mae memadori kong nyontarai ea wauya.”12