Alkitab Bahasa Ansus
Markusi 10
Anyau parari didau kong mambeawang we untakutu
(Mat. 19:1-9)
Na yana Yesusi endawarui nu yani, enda to raora Yudea mae endato raora maria Yordani dowani. Kong nyontarai we empau endama we esoriwari I. Mae topisiri pa I denyau ya naria ea. Interi nyontarai embe Farisi pea endama kong ya eto esaneangkari Yesusi mae etutang wei etoyo, “Topitotoi nyontarai muang pei menaing ne wawini raie?” Mana Yesusi kewio weya doyo, “Pitoai Musai woretuwara we mia pae?” Ya engkawio etoyo, “Musai rioa weya topino nyontarai pei do menaing ne wawini mamo andi soi weraung menaing pei.”1 Interi Yesusi kewio weya doyo, “Musai soi airora yani pai we mia tutu mesanerarong pa maitui paina. Mana na nunei retenang pa, Allai piana nyari ya muang kong wawing,2 wo muang pai ingkai pika tamani kong nyani mae we koiri kong wawini,3 impaina asaru unetarai koiri. Toyana asaru umbe kodu ea wa mana umbe koiri. Toyana pa pitoai Allai piana dona we koiri pa, nyontarai pei endeo emanaing pe.”
Na awe piana enda sisu manu wadi pa, ne manarua wauya etutang wu Yesusi parari piyana ea. Interi I kewio weya ea doyo, “Nyontarai pa matei menaing wawini mae didau kong wawing pei wei ya ea, i wieng na mamota rarong pai we ne wawini.4 Mae topino wawini menaing awani mae didau kong muang pei weiya ea, mamo i dong mamota.”
Yesusi myuangso kumai paya
(Mat. 19:13-15; Luk. 18:15-17)
Interi nyontarai paya engko kumai mararia paya wu Yesusi ma, imbaro I warawawu ya; mana ne nyontarai etuari paya esua nyontarai paya. Toyana Yesusi reo piyanapa, I keou ya mae kewio doyo, “Mempika kumai paya enda wu Yauma, mendeo mesua ya pe, wo nyontarai we entoyasa yati esua to Allai ne riu we Mananu pane. Tarai, Yau etopana we mia yoyo: Nyontarai pa matei di demamang wa we Allai ne riu we Mananu pa parari kumai mararia nei pai mamo, i ingkai yua to Allai riu we Mananu rarong pa wa.”5 Interi I tepu kumai paya mae riuwa warang pa, I myuang so ya.
Nyontarai we nepi pau aseung we yua to Allai ne mananu wau
(Mat. 19:16-26; Luk. 18:18-27)
Na awe Yesusi ria topong pa, nyontarai pei depai wurima meoi aebu mae arota Yesusi dutani doyo, “Kurui we weng pa Au, pitoandi yoni we yedu wieng ki woroi-woroi pae?” Yesusi kewio doyo, “Pitoandi boyo Yau eweng pae? Nyontarai pei weng wa wo mantau Allai mieari ki. Au piana remoaroang Allai ne airora pato aino: Remo mung nyontarai pe, remo momota pe, remo monanapi pe, remo kowio pampinoma pe, remo weangkari pe, tuang we tamamui kong nyamui!”6 Interi nyontarai wadi kewio we Yesusi doyo, “Kurue, tau yana piana yong pararia na ewe aimiomang pato.” Mana Yesusi yeori mae anewoi, interi kewio wei doyo, “Mana pipe koiri andi boni wami pa, toweria wo pinemupa mae bong pe pa we nyontarai engkiari pi. Na toyana au ingkai bodu ra na rora-marising, interi ruama bua Yau.” Nyontarai wadi tarao kawio yana pa, anerarong tekutu interi ria mae aneng dutani tutu ne ra pa pau raweina paina. Interi Yesusi reo tate ne nyontarai etuari paya mae kewio weya doyo, “Mawa wa we nyontarai we ne pi barui pa yua to Allai Ne riu we Mananu rarong pa.” Ne nyontarai etuari paya esarokutuya we entarao Yesusi kawio pa. Mana I kewio piang nariaea doyo, “Neu kumai pa mia, tarai we aseung we esua to Allai ne riu we Mananu pa rarong. Mawa kia we unta pei yua na kambirei wairui pai warui nyontarai we ne pibarui pei yua to Allai ne riu we Mananu pa rarong.” Yesusi ne nyontarai etuari paya entarao kawio pa donane ya esarokutuya kia ea mae engkawio waweria weya etoyo, “Toyana mamo matei ingkai dedu pariripae?” Yesusi reo ya mae kewio doyo, “We nyontarai neya piyana pa ene paya pea we enari wa, mana Allai di ne paya we nyari pa, wo Allai piaya we nyari pipa totoi ea.”
Wiwai we nyontarai etua Yesusi paya
(Mat. 19:27-30; Luk. 18:28-30)
Petrusi kewio we Yesusi doyo, “Amawo piana amampika pitaubai pa mae amatua Au!” Yesusi kewio weya doyo, “Yau etopana we mia, tarai we matei di tutu Yau kong tutu Arera Weweng pai, i pika ne manu pai ete neta muang pai ete rarowawing pai ete nyani kong tamani ete ne kumai paya ete kakopa we nempa, nyontarai yani pai a nini ingkai deduta taweri piaring raweina ea manu pa, neta muang kong rarowawing, nyani, kumai kong pitau we nempa. Kong yanapa meari wa mae i tato dedu didiwa pa mana na awe ramawane i ingkai dedu wieng ki woroi-woroi pa. Mana nyontarai empau we empampong ingkai empipui ea mae nyontarai we empipuipa ingkai empampong ea.”7
Yesusi kewio wetoru parari ne kaida wau
(Mat. 20:17-19; Luk. 18:31-34)
Yesusi kong ne nyontarai etuari paya enda to Yerusalemi kong Yesusi ria na pong pa. Ne manarua ura ea kodu paya esaneriru Wei mae nyontarai we empau we etua I na karupui paya ematai. Yesusi yau nari ne manarua ura ea kodu paya mae I sopana weya pitoai ingkai tawa na I pa, I kewio weya doyo, “Nina ne tanda to Yerusalemi kong Kumai Nyontarai ingkai empikari wu we embedung we imami kong kuru akama Yaudi, kong ya ingkai etong mambabati kaida pa we I ki. Mae ya empikari we kawasa we endearong Allai wa paya, mae ya engkangkani, engkanyukikai, endarubati kong emuni, mana ape botoru mamo I ingkai tewa.”
Pi Yakobusi kong Yoanisi urewara pa
(Mat. 20:20-28)
Interi Yakobusi kong Yoanisi, Sebedeusi ne kumai pa asaru, ungkikeu Yesusi mae ungkawio uroyo, “Kurue, usanekangkuna we bongpi we urewara kong Au ne!” Yesusi kewio we asaru doyo, “Pitoai musanewea we Enari we maru pae?” Interi asaru ungkawio uroyo, “Usanewe umayoi na Nemu wedea raweina pai rarong, ei meoina dowatang pai kong ei na dowiri pai.” Mana Yesusi kewio we asaru doyo, “Maru wo munduinari piwe murewara pa wa. Impaina maru mumbarui we murunung nyopi we donung na uira parari we ingkai Eyunung nei e? Kong mumbarui we muradu baptisi we andi Eyaduta nei e?”8 Asaru ungkawio uroyo, “Uraduta.” Yesusi kewio we asaru doyo, “Tarai maru ingkai murunung nyopi we Eyunumi kong ingkai na baptisi we parari Yau ewebatisi nei pa. Mana matei meoi na Neudowatang ete na Neudowiri nei, Yau neu haki pea we yonawa. Yana ingkai Allai dona we nyontarai pa mateidi piana manyena wei pa.” Manarua esura ea wauya engkayou we Yakobusi kong Yoanisi asaru na awe entarao une kawio pa. Mana Yesusi yau ya interi kewio weya doyo, “Mia mendearoana we kawasa endearong Allai wa paya, we embedung we ene parenta paya engkangkani ene raipai ya na weuna wa. Mae ene nyontarai endu anong baba paya, etairora na embarami paya.9 Na mia mamo toyana wa. Matei di anewe beba na mia pa, andi ria we sarawiri mia pa,10 kong mateidi do pempong na mia mamo, andi we woming we mia mengkai wo. Wo Kumai Nyontarai riama nina mamo ria we ea embe sarawiri I wa, mana we I wesarawiri kong we dong Netarai pai we pariri we nyontarai empau paya.”
Yesusi dong panang we Bartimeusi
(Mat. 20:29-34; Luk. 18:35-43)
Interi Yesusi kong ne nyontarai etuari paya enda empapa na bendari Yeriko. Kong na awe Yesusi meti warui bendari Yeriko pai, Ne nyontarai etuari paya engkuira kong nyontarai we empau paya empapo yama. Na yana nyontarai we kiari pi kong rekabe pei, anompei Bartimeusi, Timeusi ne kumai dina. I meoi na rangpai arawa pa. Na awe taraoa we Yesusi nyontarai Nasareti pai ria kutua na yana, i bia woreng mae yau doyo, “Yesusi Dauti ne Kumai pa Au, anemo yau!” Nyontarai madupei esuari imbaro aidini. Mana i yeau kangkuna ea doyo, “Dauti ne Kumai pa Au, anemo yau!” Interi Yesusi doaweta mae kewio doyo, “Mesawi ma!” Ya esau nyontarai we rekabe pai mae etoyo, “Anemurarong pai piaya, towa boa, Yesusi yau au.” Nyontarai we rekabe wadi warapika asung pampang pai, interi piotetaria tewa doa mae ria we Yesusia. Yesusi dutani doyo, “Pitoai anembea we Yona we au pae?” Nyontarai we rekabe wadi doyo, “Rabunie11, yau anewe erewoa ea!” Interi Yesusi kewio wei doyo, “Rua, tutu roaoa Yau pa, impaina ponaang!” Ayani to i reoa ea, interi i dua Yesusi.
Source notes (11)
- Cross-reference Ul. 24:1-4; Mat. 5:31
- Cross-reference Kej. 1:27, 5:2
- Cross-reference Kej. 2:24
- Cross-reference Mat. 5:32; Luk. 16:18; 1Kor. 7:10-11
- Cross-reference Mat. 18:3; Luk. 18:17
- Footnote Keluaran 20:12-16; Ulangan 5:16-20
- Cross-reference Mat. 20:16; Luk. 13:30
- Cross-reference Luk. 12:50
- Cross-reference Luk. 22:25
- Cross-reference Mat. 23:11; Mrk. 9:35; Luk. 22:26
- Footnote Rabuni mamo kawio Arami pina, mai parari kawio Iberani Rabi ne arti pei Kuru
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.