Markusi 11

Yesusi ria sua to bendari Yerusalemi

(Mat. 21:1-9; Luk. 19:28-38; Yoh. 12:12-15)

1Na awe Yesusi kong Ne manarua paya endara engkikeu we bendari Yerusalemi, aino kikeu we awa Betfage kong Betania na wi Saituni, Yesusi demi ne nyontarai pe umbe kodu. 2Kewio we asaru doyo, “Munda wu awa we na musaropong wanea. Awe munda musua na wana mamo, ingkai mundeo keledai menanang pei engkaei doa, nyontarai pei yanai wa. Mungketui mae mungkori ma. 3Topiana nyontarai pei sopana we maru doyo, ‘Pitoidona mungketu keledai yani pae?’ Muntopana muroyo: ‘Seni aneweipa. I ingkai meraru doni teweri tonina ma pa.’ ” 4Nyontarai kodu pa asaru undara, mae uradu keledai antung pei we enkai na rangpai arawa kikeu aturarei manu wadi, interi usepa wai pai. 5Nyontarai pe embetotoi etoa na yanapa etutang asaru etoyo, “Pipa totoi mungketu keledaipai pae?” 6Interi undoa weya parari we piana Yesusi kewiora pa. Impaina nyontarai paya embarakari interi ungkoria. 7Interi ungko keledai wadi wu Yesusia, mae emporare ene asung pampangpa etona wana keledai karupuang wadi, interi Yesusi wieita nai. 8Nyontarai madu pei emporare ene asung pampang pa na rangpai, eaya tato engkayai ai arawang we weraungpa makae we engko na romipa mae esoa na rangpai. 9Nyontarai we endapampong Yesusi tutu ea enda na engkarupui pa esau etoyo,

“Hosana!

Amataparanding Au, myuang we mananu we ruana Seni anongpa,1

10myuang na wemananu rarong we riama pai, mananu parari tane woria Dauti,

Hosana! Amataparanding Allai we na nu wetedai pa Au!”

11Interi Yesusi ria sisu Yerusalemi pa, yua to Allai ne Manu Mamarang pai. Na yanapa rekakepang taubai yani kiai, mana piana dodiru to impaina meti na yana ria to Betania, kiong ne manarua ura ea kodu paya.

Yesusi kewio tendawi ai ara wadi

(Mat. 21:18-19)

12Kamai ayari pai Yesusi kong ne manarua paya empika Betania pa, Yesusi ruradidui wewi. 13Naina woroi I reo ai ara pei piana weraung. Interi kikeuwi aipai we topino i dedu bong pei. Mana awe dedu aipai pa, I reo pianea wa mae weraungpai meari, tutu wemarepi wa we webong paina. 14Impaina riuwara we ai wadi doyo, “Na a nini pai topong, ei ingkai dang nemu bongnei wa kio woroi-woroi.” Ne manarua paya kong entaraoa kawio sopana pa.

Yesusi yua to Allai ne Manu Mamarang pai

(Mat. 21:12-13; Luk. 19:45-48; Yoh. 2:13-16)

15Interi Yesusi kong Ne nyontarai etuari wauya enda sisu Yerusalemi. Na yana Yesusi yua wu wararei Allai ne Manu Mamarang pai, I dedawa nyontarai etawayang kong embo pi na Manu Mamarang pai ne warareipai. Mae I biari meja we endiwang pe na pa kong pata we emayoi embo ayamandu na pa. 16I tato yuara kangkuna nyontarai we engko pi endakutua na Allai ne Manu Mamarang pai ne wararei paya. 17Interi denyau nyontarai na yana paya doyo, “Na Weraung Mamarang pai soi kawio pea aino: Neu Manu Mamarang nei ingkai esauwi we manu kawasa nunei entandau nai dina, mana metoni we manu mananapiri.”2 18Awe wewedung we imami paya mae kuru akama Yaudi entarao piwe Yesusi dona wau, impaina eserai rang we emuni, wo ematai we-I tutu nyontarai we empau paya esarokutuya we-I kong esanewe entarao kawio we denyaua pa paina. 19Dokikeu we dirupa Yesusi kong ne manarua paya emati enda warui bendaripai.

Ai ara we piana mema kong Yesusi ne anyau parari tandau pa

(Mat. 21:20-22)

20Kamai ayari pai, Yesusi kong ne manarua ura ea kodu paya endara ekikeu ai ara pai, ya endeo ai wadi mia ra sisu newoa wau. 21Petrusi aneao piwe rawandepe tawa pa, impaina kewio we Yesusi doyo, “Kurue remoa! Ai ara we rawandempe tondawi pi piana miato.” 22Yesusi rioa weya doyo, “Mendoaoa we Allai! 23Yau etopana we mia, tarai matei au topana we wi wane boyo, ‘Topating mae toweri warui nu nini mae tawa to rawanang rau!’ mana anemukaeng we kawio topana toyana pa pe, mana roaoa we pitopana toyana pa ingkai tawa ki, mamo piyana pa ingkai pararia.3 24Tutu Yau etopana we mia, pitotoi metewara kong mentandau wea pa, mia andi mendoaoa tarai we piyana pa piana metaduta to, mamo piyana pa ingkai dona we mia. 25Mae awe metoa we mentandau we Seni mamo, mia andi metupirandeni sasari we nyontarai pei nyari we miapa pampong wo, imbaromi Mentamami na rora-marising tato dupirandeni mene sasaripa.”4 [ 26Mana metupirandeni sasari we nyontarai etona we mia pa wa mamo, Mentamami na rora-marising tato ingkai dupirandeni mene sasari pa wa.]

We embe mananu we Yaudi paya etutang parari Yesusi we ne mambiri pa.

(Mat. 21:23-27; Luk. 20:1-8)

27Interi Yesusi kong ne manarua ura ea kodu paya entaweri ea to bendari Yerusalemi. Na awe Yesusi ria na Allai ne Manu Mamarang ne warareipai pa, we embedung na imami paya, kuru akama Yaudi paya kong we empampong na Yaudi paya endawuri ma, 28mae etutani etoyo, “Naina totoi bodu mambiri yana pa e? Mae matei di dong mambiri yana we Au pa, impaina nuari piyana pa?” 29Yesusi rioa weya doyo, “Yau tato yo yutang pianea we mia. Mentopana we Yau pararia, imbaro Yau ingkai ekawiora we mia na mambiri matei Yau enari piyana pa. 30Yoanisi we webaptisi kawasa pai, matei di dong mambiri wei pa, Allai ete na nyontarai pei e?” 31Ya engkawio waweria weya, mae etoyo, “Topino tatoyo na Allai, I ingkai doyo, Toyana mamo topitotoie mendoaoa we Yoanisi wami pa? 32Mana mawa wa we tatoyo na nyontarai!” Wo ya ematai nyontarai madu paya, tutu nyontarai madu paya endoaoa we Yoanisi mamo tarai nabi dina. 33Interi endoa we Yesusi etoyo, “Amanduinaria wa.” Impaina Yesusi kewio weya doyo, “Toyana mamo Yau tato etopang pianea we mia wa parari na mambiri matei enari pinina pa.”