Skip to content
BibleKenya

Alkitab Bahasa Ansus

Markusi 12

Sosiau parari we etarara romi angguri

(Mat. 21:33-46; Luk. 20:9-19)

Interi Yesusi kewio naria ea weya na sosiaupei doyo, “Nyontarai pei nyari ne romi angguri pei mae nyari warungpai wari romipai. I yirai kambirei pei we dindoya angguripai na pa mae nyari yawa tedai pei we etingtamamana romi angguri pai na pa. Interi doni wu nyontarai peaya we etarara romipai imbaro angguripai ne awe engkutui pa mamo embiwo bauwa maiya, mae i donta to raora we woroi.1 Mae piana angguri wadi merai we engkutui pa, I demi ne nyontarai woming pei wu we etarara romipai we kio we embiwo wei pa. Mana ya entapu womingpai mae endorai, interi etami teweri na warakakawiri. Interi nyontarai we ne romipai demi woming pei wieia ea weya. Nyontarai nini pai ya endorai ki dukamipai we kapapo mae ya entatipari. Interi i demi ne nyontarai womingpei ea, mae nyontarai nei ya emuni. Ya enari toyana pampang we woming empauo nyontaraipai demi ya pa, eaya endora ya kong ea ya emung ya. Ninane ne nyontarai koiri ea, iwo ne kumai we anewoi pina. Impaina i demi weya, doyo, ‘Neu kumai nei ingkai ya entuang wei rai.’ Mana we etarara romi wauya endeoi yana pa, engkawio waweriao ya etoyo: ‘I wo kumai we ingkai dedu tamani pinene pina. Mendama tamuni, imbaro pinene tangko we tata.’ Ya entapuri mae emuni, interi esoi tori warui romi angguri wadi.”

Interi Yesus dutang doyo, “Impaina pitoai ingkai tuani we ne rominei donapae? I ingkai riama mae miung we etarara romi wauya, interi rioao nyontarai pea embei ya we etarara romi wadi ea.” Mia wo metato rirang nini pai na weraung mamarang pai wamie? Aino:

“Kami we enari manu paya engkaipiri pai, riaea we kami retenang to.2

Pinina pa Seni di nyaripa, pi we piboki kia na tandena ne.”

Interi mananu Yaudi paya eserai we entapu Yesusi, tutu ya endekamana we yatino sosiau pai sopang kamana weya pa. Mana ya ematai we nyontarai we empau paya, impaina ya enda mae empikari.

Parari embai pe we Kaisari

(Mat. 22:15-22; Luk. 20:20-26)

Interi mananu Yaudi paya etami nyontarai embe Farisi pe embetotoi kong nyontarai we entabari kong Herodesi paya we engkawio etong autang we Yesusi eserai piwe dosarara pa. Nyontarai yasa endama kong engkawio we I etoyo, “Kuruie, amandekamana we, Au wo nyontarai we moi, kong Au motai nyontaraipei wa, wo Au wuerai rengkami wa, mae anemurarong we mai bonyau parari pitoai Sen Allai kewiora we nyontarai neya pa. Impaina parari tane mamba pai mamo, amambai wiwai we Kaisari ete wereriae? Andi amambaita ete wereriae?” Mana Yesusi rekamang etosajara wau, impaina kewio weya doyo, “Pitoandi mentou Yau pae? Mengko pe dinari peima Erewoi!” Interi ya engkorima. Toyana I dutang taweri weya doyo, “Matei enduruwi na pe nini pa kong matei anong pa entoi nai pae?” Etoyo, “Kaisari dina.” Interi Yesusi kewio weya doyo, “Toyana mamo, metona we Kaisari pi Kaisari nempa, kong we Allai pi Allai nempa.” Ya esarokutuya we entarao I kewio pa.

Nyontarai embe Saduki etutang parari nyontarai esuwi warui kaida wau.

(Mat. 22:23-33; Luk. 20:27-40)

Interi nyontarai embe Saduki we endoaoa wa we nyontarai engkada paya ingkai esuwi taweri pa wa, ya endawu Yesusi ma. Ya etutang we I etoyo,3 “Yai Kuruie! nabi Musai soi kawio nina we tata doyo, ‘Topino nyontaraipei didau mae ne kumai pei wami mana keda, mamo neta pai andi riau ne wawini ea, imbaro kabongpai dawing kumaipei we neta we piana keda yani pai.’ 4 Pampong pa nyontarai mambenetai pe embeitu. Neta retenang pai didau kong nyontarai wawing pei, mana netapai keda mae kiari kumai. Interi kumai kodu wadi tato riau wawing wadi ea mana keda, i tato kiari kumai. Toyana we kumai toru wadi tato. Toyana tato, we kumai embeitu wauya engkai, ya engkiari kumai. Interi wawing wadi tato keda. Na awe nyontarai engkada pa esuwi warui ene kaidapa mamo, na neta embeitu pa mateidi ne wawinipai pae? Wo wawingpai riau neta embe itu pa engkai paina.” Yesusi kewio weya doyo, “Mia mesanearara kia, wo mia mesanebau Weraung Mamarang pai wa kong Allai ne mambiri pa wa. Wo topino nyontarai engkada paya esuwi eampa, ya endidau kong ei riauti ea wa, mana ya embeng parari mampang paya na rora-marising. Mae toyana tato parari we nyontarai esuwi warui kaida wau. Mia metatora na weraung Musai soi pa parari papea aisasinai pai wae? Na kawio pa, Allai kewio we Musai doyo, ‘Yau Allai Abarami, Allai Isaki kong Allai Yakupi.’56 I wo Allai we nyontarai we engkada wa, mana Allai we nyontarai embeng. Mia mesanearara kia!”

Airora kapung pina

(Mat. 22:34-40; Luk. 10:25-28)

Interi kuru akama Yaudi pei tarao Yesusi kong nyontarai embe Saduki etutang waweriao ya pa, mae rearoana we Yesusi rioa weya na mai kia, impaina nyontarai yani riawuri ma dutani doyo, “Yesuse, airora totoi di wekapung pae?” Interi Yesusi kewio doyo, “Airora we kapung retenang pi andino: Nyontarai Israeli pa mia mentarama! Seni wo tane Allai dina, Seni wo Memeari ki.7 Bosaiwa Seni peidi, kong nemu Allai na anemurarong tantenang, na dumuanunungpai tantenang, na we anemutatuta pa tantenang, na nemu paya pa tantenang. Mae airora we kodu pi: Bosaiwa nyontarai peaya parari bosaiwa waweri aupa. Airora pei ea wa, we beba raweing warui airora we kodu nini pai wa.”8 Interi kuru akama Yaudi pai kewio we Yesusi doyo: “Tarai pitarai, Kuruie, kawio we topana pa, wo Allai pe koiri ki, kong Allai pei ea wa andi Mantauni ki.9 Mae I tatosaiwari na tasenemirarong pa tantenang kong na tasanetatua pa tantenang kong na paya pa tantenang, kong tasaneo nyontarai ea ya weia parari mantau tata nina woroi warui pikika taubai we tanunung kong pikika ea wau.”10 Yesusi reoa we nyontarai wadi kewio na kurayang, mae I kewio wei doyo, “Au woroi wa warui Allai ne riu we Mananupa!” Kong nyontaraipei andi berui we dutang pianea we Yesusi wa.

Parari Mananu Mampariri

(Mat. 22:41-46; Luk. 20:41-44)

Na awe Yesusi denyau na Allai ne Manu Mamarang pai, I kewio doyo, “Topitotoi pei kuru akama Yaudi paya entopana we Kristusi wo Dauti ne kumai dina pae? Dauti mantauni wo Duainunung Mamarang pai yumaoi kewio doyo,

‘Sen Allai kewio we neu Seni doyo,

Moyoi na wara Dowatang nei,

ki we embemarowa we Au pa Yong ya entuang we Au.’11

Topino Dauti mantauni yauwi Kristusi we ne Seni dina, topitotoi we I wekumai we Dauti pae?” Nyontarai we empau entarao I na esanerarong mararising.

Arera we aneapong we Kuru Akama paya.

(Mat. 23:5-7; Luk. 20:45-47)

Naina anyau we Yesusi sopana pa kewio doyo, “Mesaneapong we kuru akama Yaudi paya, ya emarising we enda esasung asung pampang kong esane we ea entuang weya na nu awayang pa.12 Esane we emayoi na pong, na nu we nyontarai omi weya pa emayoi na pa, na manu Yaudi esomi napa kong na nu munara pa. Ya embeangkari wawing kabong paya kong etawa ene manupa. Ya etanyuing nyontarai nyondekami pa na entandau pa taringbai. Ya wo andi ingkai etadu mambabati we mamba raweina pa!”

Pikika na wawing kabong we kiari pi

(Luk. 21:1-4)

Apeana Yesusi meoi na Allai ne Manu Mamarang pai ne wararei pai mae arota kayang pikika pai mae rekakepang topitotoi nyontarai we empau paya esoni pikika pa na kayang pai rarong pai. Nyontarai we ene pibarui pa empau esoni pikika pau na kayangpai. Interi wawing kabong we kiari pi pei yoni pe kobang pe kodu, we rekami pa maia wiri. Impaina Yesusi yau ne manarua paya mae kewio weya doyo, “Ekawio we mia na tarai, wawing kabong we kiari pinini pai dona pa pau raweingna warui nyontarai tau we esoni pe to kayang pikika pai rarong pa. Wo ya engkai etona na pitau we enempa, mana wawing kabong ninipai dona na pi maidau we nempa kai.”

Source notes (12)
  1. Cross-reference Yes. 5:1-2
  2. Cross-reference Mzm. 118:22-23
  3. Cross-reference Mat. 22:23; Luk. 20:27; Kis. 23:8
  4. Cross-reference Ul. 25:5-6
  5. Footnote Kel 3:16
  6. Cross-reference Kel. 3:6
  7. Cross-reference Ul. 6:4-5
  8. Cross-reference Im. 19:18
  9. Cross-reference Ul. 4:35
  10. Cross-reference Hos. 6:6
  11. Cross-reference Mzm. 110:1
  12. Cross-reference Luk. 11:43

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.