Markusi 13

Yesusi sopang parari Seni Ne Manupai we ingkai wemuna-munai pa

(Mat. 24:1-2; Luk. 21:5-6)

1Awe Yesus meti warui Allai ne Manu Mamarang pai pa, ne manarua paya koiri, kewio wei doyo, “Kuruie, remoa Manupai weng kia kong ne kami pa piaya!” 2Interi Yesusi kewio wei doyo, “Remoa Allai ne Manu Mamarang pai we piaya wanei e? Na a wane pitau we mendeoi nini ingkai nyontarai entotaia menaing, mae kami koiri wiatia na kamipei wawong nea wa.”

Yesusi kewio parari uira we ne weetuari paya etaduta ki

(Mat. 24:3-14; Luk. 21:7-19)

3Na awe Yesusi meoi na wi Saituni, I arota we Allai ne Manu Mamarang pai pa, Petrusi, Yakobusi, Yoanisi kong Andariasi etutani na emameari etoyo, 4“Kowiora we ama, apa totoikai we katene topana toyana pa ingkai tawa pararia pae? Kong pitoai we kamang pa, topino pi toyana pa ingkai tawa pae?”

5Interi Yesusi kewio we ne manarua manua paya doyo, “Mesaneapong imbaro donane nyontarai pea embeangkari miape. 6Wo nyontarai empau ingkai endama embo anoune, mae etoyo, ‘Mananu Mampariri we metamamanipi di Yau!’ Kong ya embeangkari nyontarai madu peaya. 7Mae topino mentarao kawio parari marowa pea ete kawasa embemarowa waweria weya mamo mendeo memataipe. Taubai nina andi tawa pampongwo, mana yana wo nunei menaing peina wami. 8Wo kawasa ingkai entawa emamuna embateta kawasa eaya pa kong negara peaya embateta negara pea. Na yana mundi baba weriu nupa totoi ea kong piwawi ingkai tawa ki. Piyana pa kai, katene uira retenang na nunei ria domenaing peina pararia wawing we yui we do deiwawing. 9Mana mia mesaneapong ki! Mia ingkai etong mia to Majelisi Akama paya kong endaruba mia na manu Yaudi esomi na pa kong engko mia to mananu paya mae we empampong paya, tutu mendoao Yau mae metua Yau paina, kong pi topiana pa we rang we mia imbaro membuwua parari Yau weya. 10Mana Arera Weweng pa andi embuwua pampong to kawasa pa kuira wo. 11Mae topino ya entapu mia mae etong mia to we engkutu kawio paya, mamo mendeo mesaneriru pe we pitoai andi mengkawiora pa pe, mana pitoai mesanetatuata we mengkawiora pa mengkawiora ki, wo mia mengkawiora wa, mana Duainunung Mamarang pai di yumao mia paina mengkawio ki.1

12Neta pei ingkai wio neta pai we emuni, toyana tato we yai paya embiwo ene kumai paya. Kumai paya ingkai embateta we ene yai kong esinyami paya mae ingkai emung ya. 13Nyontarai paya kuira ingkai esaneung mia tutu metua Yau paina. Mana matei di nukepana ki wepuipa mamo ingkai dedu pariri pa.”2

Uira we memba kong Mampariri tarai wa paya

(Mat. 24:15-28; Luk. 21:20-24)

14Na awe ingkai mendeo Nyontarai Memuna pai kia Allai aneuniwa pai doana Allai ne manu pai donia keraria pa. We metatora kawio ne pa mia andi mesanekangkuna na wemai. Na a yani, we menai na Yudea andi membawua to raora wewipa.3 15Nyontarai we mena manu wawong yei pa, mendeo membia toung pe mae mesua to mene manu rarongpai we mengko pianea pe, 16mae we menai na romi pa mendeo mentaweri we mengko asung pe.4 17Aneuoa kia we wawing we etaiyoa kong we etong u we ene kumai paya na ayani pai pa. 18Mentandau, imbaro pitau yanapa kuira reo tawa na awe marepi dea pa pe. 19Wo na a yani pai mamo uira wemoya wa kangkuna ingkai tawa, uira yani tawa na ea pa wa, na retenang Allai nyari nuneipa ma sisu ninapa mae tawa naria ea wa.5 20Mae topino Seni pioui apa pa ra tanang wami, mamo nyontarai pei tato ingkai wieng wa; mana tutu nyontarai we Seni diri ya pa, dona ne I pioui apa paia tanang pa.

21Na a yani nyontarai pei kewio we mia doyo, “Mendema, Mananu Mampariri pi dinini, ete ‘Mendea Mananu Mampariri pi andi yani,’ mendeo mendoaoi pe. 22Wo mampariri tarai wa kong nabi tarai wa ingkai endama, mae ya enari pi anyawa kong pi tantuma pa we embeangkari nyontarai Allai diri ya pa, topino ya empaya we enari ya toyana. 23Impaina, mesaneapong mia! Yau piana epampong etopang pinina pa kuira we mia.”

Awe Kumai Nyontarai pai teweri eama pai

(Mat. 24:29-36; Luk. 21:25-33)

24“Mana na a yani pai, piana uira pai teweri eampa, wo pai ingkai berorang mae yembaipai dea wa6 25kong piori pa ingkai entawa warui rora pai, kong mambiri na rora pai ingkai piodidouwa.7 26Na a yani nyontarai ne ingkai endeo Kumai Nyontarai pai ria na mandipi rarong pa, na ne paya pa kia kong na Ne deaweria tedai pa.8 27Mae na a yani tato, I ingkai demi ne mampang paya we empandukui nyontarai Diri ya pa na nunei tentenang, na wope waneia sisu wope wane.”

Pianyawa na ai ara pai

(Mat. 24:32-35; Luk. 21:29-33)

28Metanyau na anyau parari sosiau na ai ara pai. Topino ne arirawani pa penanang mae kemamai, mamo mesanetatuata we marepi mekakopi piana kikeu to. 29Toyana tato, topino mendeo piyana pa tawa pa mamo, mesaneaoa we a pai piana kikeu to. 30Yau etopana we mia, “Tarai we nyontarai na awa pui nina paya engkadara engkai wami, mamo pitau yana pa tawa wo. 31Rora kong nunei ingkai nyai, mana Neu Kawiopa nai wami. 32Mana parari a yani pai mamo nyontarai pei retatuati wa, mampang paya na rora-marising pai wereria, kong Kumai Nyontarai pai tato wereria, mae Yai na rora-marising pai meari.”9

Anyau we imbaro tatamamang

(Mat. 24:36-44)

33“Mesaneapong kong metamamang! Wo a pai mamo menduinari wa. 34Piyanapa parari nyontarai pei pika ne manupai mae donta to raora woroi. Interi dona we ne woming paya koiri-koiri mariwa we endu pa, mae deirora we dewawu aturarei pai imbaro demamang na wemai.10 35Impaina mia metamamang, wo menduinari apa totoi tuang we ne manupai ingkai teweri eama pai. Teweri na kikeu we dirupa, ete diru rabuangpa, ete kikeu we ayari bua pa ete wo pai tepira pae? 36Imbaro topino na tantuma i tewerima pa mamo dedu mia we metena wa. 37Pitoai Etopana we mia nina pa, Etopana we nyontarai paya kuira aino: Mesaneapong kong Metamamang!”