Skip to content
BibleKenya

Alkitab Bahasa Ansus

Markusi 14

Esanetatuata we emung Yesusi

(Mat. 26:1-5; Luk. 22:1-2; Yoh. 11:45-53)

A pe kodu ea mamo, awe a Paska pai kong anani Roti weragi wa ingkai etoni. We embedung we imami paya kong kuru akama Yaudi paya, eserai rang we entapu Yesusi na aididina we emuni.1 Wo ya engkawio etoyo, “Ninane reo tawa na anani Paska nei pe, imbaro nyontarai we empau endeo etauamuna we tata pe.”

Nyontarai wawing pei yi maning na Yesusi dukami pai

(Mat. 26:6-13; Yoh. 12:1-8)

Na awe Yesusi nyaina Betania, na Simoni we a we rampa dedu ui pado pai, ne manu pai, mae I meoi dampi pa, na yana nyontarai wawing pei riama kio botori pualami memarang we yoni maning narwastu we yeirowu we ne arga pa tadai kia pei. Nayana i piokai botori raukanang wadi mae yi maning wadio Yesusi duwawuang pa.2 Mana nyontarai pe embetotoi engkayou mae engkawio waweriao ya etoyo, “Wawing nini yi maning narwastu nini we pio? Interi ya engkawio we wawing wadi, wo maning wawadi embowi mamo dedu pe dinari3 pe piaring we toru mae pepa dona we nyontarai we engkiari pianea wa paya.” Mana Yesusi kewio weya doyo, “Mempikariki. Mendeo mesuiripe wo i dong piwe maipa we Yau. Tutu nyontarai we engkiari pianea wa paya yati anemai enaikong mia, mae apa totoi mesaneaoa mamo mia mempata ya, mana Yau enai pampang kong mia wa.4 I piana nyari pi mai we nyari pa. I yi maning yeirowu nei so Neutarai nei pa, menyena we imbaro esirai pa. Yau ekawio we mia: Taraie na totoi ea Arera Weweng embuwua na nunei tantenang, pitoai wawing nei dona nina ingkai engkawiora we esaneuni ki.”

Yudasi piora Yesusi.

Interi Yudas Iskarioti, iwo nyontarai koiri na Yesusi ne manarua ura ea kodu paya, i ria wu we embedung we imami paya we warapika Yesusi weya. We embedung we imami paya emararising kia na entarao Yudasi kawio pa kong engkutua we etong pe pea wei. Interi i yerai a we mai we warapika Yesusi.

Yesusi dang Paska pai kong ne nyontarai ura ea kodu paya

(Mat. 26:17-25; Luk. 22:7-14,21-23; Yoh. 13:21-30)

Na a retenang anani Roti Weragi Wa, na awe nyontarai engkutu domba Paska pai, Yesusi ne manarua paya engkawio wei etoyo, “Na totoi Au anembea we amanda amatona manyena roweang Paska pai we Au pae?” Interi I demi manarua pa umbe kodu mae derera kamana doyo, “Munda to bendari paia; na wana muradu nyontarai pei kio karabasa we yoni maria ingkai muruari kong muntopana we wene manu we yua nai pai muroyo: ‘Kurui derera doyo: Na rerawuani totoi ingkai Yang roweang Paska pai kong neu nyontarai manarua nea kuira pae? Interi nyontarai yani ingkai denyawa we maru, rerawuani we na yei we beba, we piana menyena demang nayana to. Nayana maru andi mumanyena roweang Paska we tata!’ ” Toyana Yesusi ne nyontarai manarua kodu pa asaru unda umpapa na bendaripai. Na wana asaru uraduta tau yana tarai parari piwe Yesusi sopana pa. Interi asaru umanyena roweang Paska pai.

Wo pai sawara piana berorangto, Yesusi kong ne nyontarai ura ea kodu paya kuira endato manu wadia. Awe emayoi na yana we etampi pa Yesusi kewio doyo, “Yau etopana we mia, tarai nyontarai pei na mia we meoi dampikong Yau ne ingkai wio Yau ki.”5 Ya etaidu kia mae koiri-koiri na ya engkawio we I etoyo, “Seni e, yau wa e?” I kewio doyo, “Nyontarai yani mamo, koiri na nyontarai ura ea kodu ne mia, i andi yoang rotipai wu paruai kakubang kong Yau ne. Tarai we Kumai Nyontarai nei ingkai keda parari we Weraung Mamarang pai kemang Wei pa, mana wemoyawa kia we nyontarai we wio Kumai Nyontarai nei! Weng peino nyontarai yani pai nyani dawini wa.”

Kamang anani mamarang na Diru

(Mat. 26:26-29; Luk. 22:15-20; 1Kor. 11:23-25)

Awe Yesusi kong ne manarua paya na etampi pa, Yesusi kio roti pa, dewa piboki oa, piobabau roti pa interi dona weya mae kewio doyo: “Neutarai pina, mengkori mae metani.” Interi I kio nyopi pai, dewa piboki mae dona weya, kong ya engkai etunung na nyopi wadi. Kong I kewio weya doyo, “Neu riapina, ria we kewio kamana na Allai kong ne nyontarai neya pina, ria we tewowu we nyontarai neya kuira pina.6 Yau ekawio we mia: Taraie, Yau yunung angguri nini pai ea wa kio awe yunumi pa, aino angguri waworu pai, na Allai ne riu we Mananu pa.”

Petrusi ingkai piora Yesusi

(Mat. 26:30-35; Luk. 22:31-34; Yoh. 13:36-38)

Piana ya endoi rarung we etaparanding Allai akai pa, ya enda to wi Saituni. Interi Yesusi kewio weya doyo, “Mia mengkai ingkai membawu warui Yau. Wo piana entoi kamana na Weraung Mamarang pai etoyo: ‘Yau ingkai erora gembarapai kong domba paya entatera.’ 7 Mana na awe ingkai Esuwi warui kaida pai, Yau ingkai epampong mia to Galilea.”8 Petrusi kewio we Yesusi doyo, “Mainamamo ya engkai empika Yai Au mana yau wereria.” Interi Yesusi kewio wei doyo, “Etopana we au, taraie na anei, diru nini tato, mangkuei dona we kodu wami mamo au piana pora Yau we toru to.” Mana Petrusi kewio kangkuna doyo, “Topino yau andi ekada kong Au ki, yau epora Au wa.” Ea wau ya engkai engkawio toapeina tato.

Yesusi tendau na Getsemani

(Mat. 26:36-46; Luk. 22:39-46)

Interi Yesusi kong ne manarua paya enda sisu nu we anongpei Getsemani. Yesusi kewio we ne manarua paya doyo, “Memayoi na nina, mae Era etandau wo.” Mae I kio Petrusi, Yakobusi kong Yoanisi itondakongti. A yanito I metai kia kong aneriru, interi I kewio we itoru doyo, “Aneurarongnei deidu kia, parari aneao we yo ekada. Mitonai na nina mae mitoramang.” I satia topong katea, pika Netarai pai to kakopa pai mae tendau imbaro reo dedu uira yani pe. I kewio doyo, “Yai e, Yai pa Au, Au wo mawa kia we nuari pipatotoi. Muaya mamo ruwa uira we yeduti nini pai warui Yau wo, mana parari pitoai Aneuweane wa mana parari Yai anemuweapa.” Na yana I tewerima dedu itoru itorena. Mae I kewio we Petrusi doyo, “Simoni, au buena e? Au wo puaya we bomamang saraka koiri ea wae? Mitoramamang mae mintontandau, imbaro pianei sou mitoru pe, duainunung nei wo wiauara, mana tanetarai nei piaya wa.” Interi I ria naria ea mae tendau sopang kawio yana ea. Mae na awe I teweri emapa dedu itoru we itorena, wo itondekamipa piana memba kong itoru itonduinari pitoai andi itontopana we I pa. Interi I teweri we toru pai mae kewio we itoru doyo, “Mitorena kong mitombaua mitoru ne raie? Maia to. Nina wo ape piana mai to, mitondea, Kumai Nyontarai ingkai empikari wu nyontarai we embe sasari pa. Mitontawa, mae mitondama tanda. Nyontarai we ingkai wio Yau nei piana kikeu to.”

Entapu Yesusi

(Mat. 26:47-56; Luk. 22:47-53; Yoh. 18:3-12)

Yesusi kewio rai mamo, nyontarai koiri na ne manarua ura ea kodu paya anong pei Yudasi. I kong nyontarai marandang weengko sondu kong ai we etingdora pa endama. Ya wo nyontarai we embedung na imami kong kuru akama Yaudi kong mananu Yaudi paya etamiya pa. Yudasi piana sopana weya to doyo, “Nyontarai we ingkai wopewoi pai, andinato, mentapuri kong menkori wieng.” Mae na awe ria dedu Yesusi mae kewio wei doyo, “Kuruie! interi wopeo I.” Toyana ya entapu Yesusi mae engkori. Nyontarai koiri na ya piating sondu pai, interi dewakiri Imami Baba pai ne woming pai tarakambirei impaina tarakambirei koiri tekutu. Yesusi kewio weya doyo, “Mia metorato Yau wo nyontarai mamuna di yau e? Impaina mendama mempiakai na sondu kong aibaburi we mentapu Yau na pa nina e? Anemai mamo enai na menemadu kuira pa eyanyau na Allai ne Manu Mamarang pai, mana mia mentapu Yau wa. Mana andi mai parari we entoi na Weraung Mamarang taoa.”9 Interi ne nyontarai etuari paya engkai empika I kong embawu warui. Nyontarai aimiomang pei, ayani pai yesung irei we remimoma mae meni ki dingkawung netarai pai, i dua Yesusi. Ya eto entapuri, mana i pika irei pai mae depai na netarai kekawiri.

Yesusi na Majelisi Akama endenawau

(Mat. 26:57-68; Luk. 22:54-55,63-71; Yoh. 18:12-14,19-24)

Interi engko Yesusi to Imami Baba paia. Na yana we embedung we imami paya, mananu Yaudi kong kuru akama Yaudi paya, engkai empandura na yana. Mae Petrusi dua Yesusi na woroi ki yua to Imami Baba pai ne manu wararei repong pai apui, mae na yana i meoi na maninuing paya ene madukuira pa kikeu adia pai we rerata netarai pai. We embedung we imami paya, Majelisi Akama eserai pisarara pea we etimbu Yesusi imbaro dedu mambabati we kaidapa, mana ya etadu pisarara pea wa. Nyontarai madupei entopang kawio tarai wa we etimbu Yesusi, mana pitoai entopana pa, engkawio etimbateta mantau ya, engkawio kawio koiri wa. Interi nyontarai pe embetotoi entubabakepani na kawio tarai wa we embateta Yesusi mae etoyo, “Piana amantarao nyontarai nini pai kewio doyo: ‘Yau ingkai eria Allai ne Manu Mamarang we nyontarai enari nei, mae na ape botoru mamo ingkai Enari ei ea, we nyontarai enari na embarami pa wa.’ ”10 Mana nyontarai we embesaksi paya kawio etimbu Yesusi pa, ei kong ei ea pa mai wa, ya embateta mantau ya na kawio engkawiora pa.

Impaina Imami Baba pai tewa doa na sidang pai ne rabuang mae dutang we Yesusi doyo, “Totoi Au roa wa we pitau we nyontarai paya etimbu Au wea pa nina e?” Mana I aidini toyana mae kewio pianea wa. Interi Imami Baba pai dutang Wei ea doyo, “Impaina Au wo Mananu Mampariri, Allai we Memarang raweina pai Ne Kumai pai di Au e?” Yesusi rioa doyo, “Yau na, mae mia ingkai mendeo Kumai Nyontarai meoi na wewe Piaya raweina ne dowatang kong riama na mandipi rarong pai.”11 Impaina Imami Baba pai pioayabu mantau ne asung pa mae kewio doyo, “Pitoai taserai saksi eampa e? Mia piana mantau mentarao I kengkani Allai. Mesanetatuata pa topino?” Interi ya esanerarong koiri we engkutua we I andi dedu mambabati kaida pai.12 Interi nyontarai pe embetotoi engkanyukikai I mae engkawung rekamipa kong endorai mae engkawio wei etoyo, “Hee nabi pa au, buaoa we matei yati endora Au pa!” Toyana maninuing wau ya tato endorai.

Petrusi piora Yesusi

(Mat. 26:69-75; Luk. 22:56-62; Yoh. 18:15-18,25-27)

Na ayani Petrusi nyaina manu wadi wararei repong na umbau rai. Interi nyontarai woming wawing na Imami Baba pai ria to nu yani ma, awe wawing wadi reo Petrusi meoi rerata netarai wadi pa, wawing wadi rekakepani mae kewio doyo, “Au tato anemai mamo pondura kong Yesusi nyontarai Nasareti wadi.” Mana i pepora doyo, “Yau erunari I wa kong aneuao pitoai buaoa pa wa.” Interi i riato aturarei baba na manu repong wadi [toyana mangkuei dona.] Na awe woming wawing wadi reo Petrusi naria ea, i kewio we nyontarai we enai na yana doyo, “Nyontarai nini pai wo koiri tato na ya.” Mana Petrusi pepora ea. Woroi wami mamo nyontarai we enai na yana engkawio we Petrusi etoyo, “Au tato nyontarai koiri na ya, au wo nyontarai Galilea di au paina!” Interi Petrusi tendau waweri mae pepora doyo, “Yau eruinari nyontarai we mentopani pai wa!” Na yana to mangkuei dona we kodu pina. Impaina Petrusi aneao we Yesusi piana kewio wei doyo: “Mangkuei dona we kodu wami pa, mana au piana pora Yau we botoru to.” Interi Petrusi yaia deidu.

Source notes (12)
  1. Cross-reference Kel. 12:1-27
  2. Cross-reference Luk. 7:37-38
  3. Footnote Dinari pai mamo, Parenta Roma pai ene pe. Pe dinari koiri mamo mai parari wiwai we nyontarai ne maria we riu pa na a koiri
  4. Cross-reference Ul. 15:11
  5. Cross-reference Mzm. 41:10
  6. Cross-reference Kel. 24:8; Yer. 31:31-34
  7. Cross-reference Za. 13:7
  8. Cross-reference Mat. 26:32, 28:16
  9. Cross-reference Luk. 19:47, 21:37
  10. Cross-reference Mat. 26:61, 27:40; Mrk. 15:29; Yoh. 2:19
  11. Cross-reference Dan. 7:14
  12. Cross-reference Im. 24:16

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.